YUDA MAKABAYO KIONGOZI WA WAYAHUDI (166-160 K.K.)

Yuda Makabayo asifiwa

¹Na mwanawe Yuda, aliyeitwa Makabayo,

aliondokea mahali pake.

²Ndugu zake wote wakimsaidia,

Nao walioshikamana na baba yake

Wakavipiga vita vya Israeli kwa furaha.

³Akaongeza utukufu wa watu wake,

Akajivika dirii kifuani kama shujaa,

Na kujifunga silaha za vita.

Alilipanga jeshi lake kwa vita

Na kulilinda kwa upanga wake.

⁴Alikuwa kama simba kwa matendo yake,

Kama mwana simba akinguruma akitaka mawindo.

⁵Aliwafuatia waasi akiwatafuta,

Akawateketeza wale waliowaudhi watu wake.

⁶Walioasi walikufa moyo kwa hofu yake,

Watenda maovu wote walifadhaika,

Wokovu ulisitawi mikononi mwake.

⁷Alitia hasira wafalme wengi,

Akamfurahisha Yakobo kwa matendo yake;

Ukumbusho wake utabarikiwa milele.

⁸Alizungukazunguka katika miji ya Yuda

Akiwafutia mbali waovu,

Akageuza hasira mbali na Israeli.

Sifa zake zikaenea hata miisho ya dunia,

⁹Akakusanya pamoja wale wanaopotea.

Ushindi wa kwanza wa Yuda

¹⁰Apolonio akakusanya mataifa, pamoja na watu wengi kutoka Samaria, ili apigane na Israeli.

¹¹Yuda akapata habari, akaenda kukutana naye, akampiga, akamwua. Watu wengi wakaanguka wametiwa jeraha za mauti, na wengine wakakimbia.

¹²Wakateka nyara; naye Yuda aliutwaa upanga wa Apolonio, akautumia sikuzote.

¹³Seroni, jemadari wa jeshi la Shamu, alisikia ya kuwa Yuda amekutanisha mkutano, jeshi la watu waaminifu na walio hodari wa vita,

¹⁴akasema, Nitalitukuza jina langu na kujipatia heshima katika ufalme kwa kupigana na Yuda na wale walioko kwake wanaoidharau amri ya mfalme.

¹⁵Na pamoja naye walikwenda jeshi kubwa la watu waovu ili wamsaidie kuwalipiza kisasi wana wa Israeli.

¹⁶Akaja karibu na mipando ya Beth-horoni, Yuda akamwendea na kikosi kidogo.

¹⁷Nao walipoliona lile jeshi kubwa likija juu yao walimwambia Yuda, Je! Sisi kundi dogo tutaweza kupigana na umati huu mkubwa wa nguvu? Nasi tumedhoofika kwa sababu hatujaonja kitu leo.

¹⁸Yuda akasema, Ni jambo rahisi watu wengi wazingirwe kwa mikono ya wachache. Kwa mbingu ni mamoja tu, kuokolewa kwa wengi au kwa wachache,

¹⁹maana kushinda vitani hakupatikani kwa wingi wa watu, ila kwa nguvu itokayo mbinguni.

²⁰Wao wanatujia kwa wingi wa jeuri na udhalimu ili kutuharibu sisi na wake zetu na watoto wetu na kututeka.

²¹Lakini sisi tunayapigania maisha yetu na amri zetu.

²²Yeye Mwenyewe atawafadhaisha usoni petu, basi msiwaogope.

²³Akiisha kusema hayo, aliwashambulia kwa ghafla, Seroni na jeshi lake wakapondwa mbele yake.

²⁴Wakawafuatia katika miteremko ya Beth-horoni hata uwandani chini. Wakaanguka watu kama mia nane, na waliosalia waliikimbilia nchi ya Wafilisti.

²⁵Basi, hofu na woga uliwaangukia mataifa ya jirani kwa sababu ya Yuda na ndugu zake;

²⁶jina lake likajulikana hata kwa mfalme, na mataifa yote walisimulia habari za vita vyake.

ANTIOKO AJIANDAA VITA NA WAAJEMI

Sera ya Antioko

²⁷Mfalme Antioko aliposikia maneno hayo alikasirika sana. Akavikusanya vikosi vyote vya askari vya nchi yake, jeshi kubwa mno.

²⁸Akafungua hazina yake akawapa askari wake ijara ya mwaka mzima, akawaagiza wawe tayari kwa haja yoyote.

²⁹Akaona fedha ya hazina yake inapungua, tena kodi haipatikani sana kwa sababu ya uasi na matata aliyoingiza mwenyewe katika nchi tangu zamani.

³⁰Akashuku kama fedha haitamtosha kama zamani kwa gharama na kwa vipawa alivyozoea kutoa kwa ukarimu – naye alikuwa mpaji kuliko wafalme waliomtangulia.

³¹Kwa hiyo alifadhaika sana, akakata shauri kwenda Uajemi kutoza kodi za nchi zile na kukusanya fedha nyingi.

³²Akamwacha Lisia, mtu mstahiki wa ukoo wa mfalme, awe juu ya mambo ya mfalme toka mto Frati hadi mipaka ya Misri,

³³na kumlea mwanawe Antioko hadi atakaporudi.

³⁴Akamkabidhi nusu ya majeshi yake na tembo. Akamwagiza mambo yote aliyotaka yafanyike, na kwamba apeleke jeshi juu ya watu wakaao Uyahudi na katika Yerusalemu,

³⁵ili kuwang'oa na kuivunja nguvu ya Israeli na ya mabaki ya Yerusalemu. Auondoe ukumbusho wao katika mahali pale

³⁶na kukalisha wageni katika mipaka yao yote, akiwagawia nchi kwa kura.

³⁷Ndipo mfalme aliitwaa ile nusu nyingine ya jeshi akaondoka Antiokia, mji wake wa kifalme, mwaka mia arubaini na saba akavuka mto Frati akazipitia nchi za juu.

GORGIA NA NIKANO WANAONGOZA JESHI LA SHAMU KUPIGANA NA WAYAHUDI

Maandalio ya Vita

³⁸Lisia akamchagua Tolemayo mwana wa Dorimene na Nikano na Gorgia, watu hodari katika rafiki za mfalme.

³⁹Akapeleka pamoja nao askari elfu arubaini na wapanda farasi elfu saba, ili waiendee nchi ya Uyahudi kuiharibu, kama mfalme alivyoamuru.

⁴⁰Wakaondoka na jeshi lao lote, wakaja wakapiga kambi karibu na Emao katika uwanda wa chini.

⁴¹Wachuuzi wa nchi wakapata habari, wakachukua fedha na dhahabu nyingi, na pingu, wakaja kambini kusudi wawanunue Waisraeli kuwa watumwa. Majeshi ya Shamu na ya nchi ya Wafilisti wakajiunga nao.

⁴²Yuda na ndugu zake waliona ya kuwa mabaya yameongezeka, hata majeshi wamepiga kambi katika mipaka yao. Wakaikumbuka ile amri aliyoitoa mfalme ya kuwaangamiza watu kabisa.

Mkusanyo wa Wayahudi huko Mizpa

⁴³Wakasemezana kila mtu na mwenzake. Na tuiinue hali nyonge ya watu wetu; tuwapiganie watu wetu na mahali patakatifu.

⁴⁴Watu wakakutanika pamoja ili wawe tayari kwa vita, tena wapate kusali na kuomba rehema na huruma.

⁴⁵Yerusalemu ilikuwa ukiwa kama jangwa,

Hakuna watoto wake walioingia wala kutoka;

Mahali patakatifu palikanyagwa chini,

Wana wa wageni walikuwamo mjini,

Ukawa maskani ya mataifa.

Furaha iliondolewa katika Yakobo,

Sauti ya filimbi na kinubi ilikoma.

⁴⁶Wakakusanyana, wakaja Mizpa, kuelekea Yerusalemu, kwa sababu Waisraeli walikuwa na mahali pa kusali huko Mizpa.

⁴⁷Siku hiyo walifunga, wakajivika magunia na kujitia majivu kichwani na kurarua nguo zao.

⁴⁸Wakakunjua gombo la chuo cha sheria, ambalo juu yake watu wa mataifa walikuwa wamechora taswira za sanamu zao;

⁴⁹wakatoa mavazi ya makuhani, na malimbuko, na zaka, na kuwanyoa Wanadhiri waliokuwa wamezitimiza siku zao.

⁵⁰Wakazililia mbingu kwa sauti kuu, wakisema, Tufanyeje na watu hawa? Tuwapeleke wapi?

^51-52-53Maana mahali pako patakatifu pamekanyagwa na kutiwa unajisi, na makuhani wako wamo katika huzuni na unyonge.

⁵⁴Wakazipiga tarumbeta na kulia kwa sauti kuu.

⁵⁵Baada ya hayo, Yuda aliweka wakuu wa watu, viongozi wa maelfu, na viongozi wa mamia, na viongozi wa hamsini hamsini, na viongozi wa kumi kumi.

⁵⁶Na watu waliokuwa wakijenga nyumba, au kataka kuoa, au wamepanda mashamba ya mizabibu, au wanaona hofu, aliwaagiza warudi kila mtu nyumbani kwake, kama ilivyoamriwa na sheria.[#Kum 20:5-8; Amu 7:3]

⁵⁷Kisha jeshi lake likaondoka likapiga kambi kusini ya Emao.

⁵⁸Yuda akasema, Jifungeni, mwe hodari.

⁵⁹Kesho mwe tayari kupigana na mataifa waliotukusanyikia ili kutuharibu sisi na patakatifu.

⁶⁰Na yatakayokuwa mapenzi ya mbinguni, ndivyo Yeye atakavyofanya.