Matoleo kwa ajili ya Hema Takatifu

¹BWANA akanena na Musa, akamwambia,[#1 Nya 29:3; 2 Kor 9:7]

²Waambie wana wa Israeli kwamba wanitwalie sadaka; kila mtu ambaye moyo wake wampa kupenda mtatwaa kwake sadaka yangu.[#1 Nya 29:3; 2 Kor 9:7]

³Sadaka utakayopokea mikononi mwao ni hii; dhahabu, fedha na shaba,

⁴na nyuzi rangi za buluu, zambarau na nyekundu, na nguo za kitani safi, na singa za mbuzi;

⁵na ngozi za kondoo dume zilizotiwa rangi nyekundu, na ngozi za pomboo, na miti ya mjohoro,[#25:5 Katika Kiebrania maana si dhahiri.]

⁶na mafuta ya ile taa, na viungo vya manukato kwa yale mafuta ya kupaka, na kwa ule uvumba wenye harufu nzuri;

⁷na vito vya shohamu, na vito vingine vya kutiwa kwa ile naivera, na kwa kile kifuko cha kifuani.[#Kut 28:15]

⁸Nao na wanifanyie patakatifu; ili nipate kukaa kati yao.[#Law 4:6; Ebr 3:6; Ufu 21:3]

⁹Sawasawa na haya yote nikuoneshayo, mfano wa maskani, na mfano wa samani zake zote, ndivyo mtakavyovifanya.

Sanduku la Agano

¹⁰Nao na wafanye sanduku la mti wa mjohoro; urefu wake na uwe dhiraa mbili na nusu, na upana wake dhiraa moja na nusu, na kwenda juu kwake dhiraa moja na nusu.[#Kut 37:1; Kum 10:3; Ebr 9:4; #25:10 Ni urefu wa kutoka kiwiko cha mkono hadi ncha ya kidole kirefu.]

¹¹Nawe ulifunike kwa dhahabu safi, ulifunike ndani na nje, nawe tia na ukingo wa dhahabu kulizunguka pande zote.

¹²Nawe subu vikuku vinne vya dhahabu kwa ajili yake, na kuvitia katika miguu yake minne; vikuku viwili upande mmoja, na vikuku viwili upande wake wa pili.

¹³Nawe fanya miti mirefu ya mshita na kuifunika dhahabu.

¹⁴Nawe tia hiyo miti katika vile vikuku vilivyo katika pande mbili za sanduku ili kulichukua hilo sanduku.

¹⁵Hiyo miti itakaa katika vile vikuku vya sanduku; haitaondolewa.[#1 Fal 8:8]

¹⁶Kisha tia ndani ya sanduku huo ushuhuda nitakaokupa.[#Kut 16:34; 31:18; 40:20; Kum 10:2; 31:26; 1 Fal 8:9; 2 Fal 11:12]

¹⁷Nawe fanya kiti cha rehema cha dhahabu safi; urefu wake utakuwa dhiraa mbili na nusu, na upana wake dhiraa moja na nusu.[#Ebr 9:5; Kut 37:6; Rum 3:25; #25:17 Agano au ‘kifuniko’.]

¹⁸Nawe fanya makerubi mawili ya dhahabu; uyafanye ya kazi ya kufua, katika hiyo miisho ya kiti cha rehema, huku na huku.

¹⁹Weka kerubi moja mwisho mmoja, na kerubi la pili mwisho wa pili; fanya hayo makerubi yawe kitu kimoja na kiti cha rehema, mwisho huku na mwisho huku.

²⁰Na hayo makerubi yatainua mabawa yao juu, na kukifunika hicho kiti cha rehema kwa mabawa yao, na nyuso zao zitaelekeana hili na hili; nyuso za hayo makerubi zitaelekea kiti cha rehema.[#1 Fal 8:7; 1 Nya 28:18]

²¹Weka kiti cha rehema juu ya hilo sanduku, kisha utie huo ushuhuda nitakaokupa ndani ya sanduku.[#Kut 26:34; 40:20]

²²Nami nitaonana nawe hapo, na kuzungumza nawe pale nilipo juu ya kiti cha rehema, katikati ya hayo makerubi mawili yaliyo juu ya sanduku la ushuhuda, katika mambo yote nitakayokuagiza kwa ajili ya wana wa Israeli.[#Kut 29:42; 30:6,36; Law 16:2; Hes 17:4; Eze 9:3; Yak 2:13; 1 Sam 4:4; 6:2; 2 Fal 19:15; Zab 80:1; 90:1; Isa 37:16]

Meza ya mikate iliyowekwa mbele ya Mungu

²³Nawe fanya meza ya mti wa mshita; urefu wake utakuwa dhiraa mbili, na upana wake dhiraa moja, na kwenda juu kwake dhiraa moja na nusu.[#Kut 37:10; 1 Fal 7:48; 2 Nya 4:8; Ebr 9:2]

²⁴Uifunike dhahabu safi, na kuifanyia ukingo wa dhahabu wa kuizunguka pande zote.

²⁵Kisha ifanyie upapi wa kuizunguka pande zote, upana wake utakuwa nyanda nne, nawe uufanyie ule upapi ukingo wa urembo wa dhahabu wa kuuzunguka pande zote.

²⁶Uifanyie vikuku vinne vya dhahabu, na kuvitia vile vikuku katika pembe zake nne, katika miguu yake minne.

²⁷Vile vikuku na viwe karibu na ule upapi, ili viwe mahali pa kutilia ile miti, ya kuichukulia meza.

²⁸Fanya ile miti ya mti wa mshita, na kuifunika dhahabu, kwamba ile meza ichukuliwe kwayo.

²⁹Nawe fanya sahani zake, na miiko yake, na makopo yake, na vikombe vyake vya kumiminia; vifanye vyote vya dhahabu safi.[#Kut 37:16; Hes 4:7]

³⁰Nawe utaiweka mikate ya wonyesho juu ya meza mbele yangu daima.[#Law 24:5-8]

Kinara cha taa

³¹Nawe fanya kinara cha taa cha dhahabu safi; hicho kinara na kifanywe cha kazi ya kufua, kitako chake, na mti wake, vikombe vyake, na matovu yake, na maua yake, vyote vitakuwa vya kitu kimoja nacho;[#Kut 37:17; 1 Fal 7:49; Zek 4:2; Ebr 9:2; Ufu 1:12; 4:5]

³²nacho kitakuwa na matawi sita yenye kutoka ubavuni mwake; matawi matatu ya kinara upande wake mmoja, na matawi matatu ya kinara upande wake wa pili[#Hes 8:4; Kut 37:18,19]

³³vikombe vitatu vilivyotengenezwa mfano wa maua ya mlozi katika tawi moja; tovu na ua; na vikombe vitatu vilivyofanywa mfano wa maua ya mlozi katika tawi la pili, tovu na ua; vivyo hivyo hayo matawi yote sita yatokayo katika kile kinara;

³⁴na katika hicho kinara vikombe vinne vilivyofanywa mfano wa maua ya mlozi, matovu yake, na maua yake;

³⁵na tovu chini ya matawi mawili la kitu kimoja nacho, na tovu chini ya matawi mawili la kitu kimoja nacho, na tovu chini ya matawi mawili la kitu kimoja nacho, kwa hayo matawi sita yatokayo katika kile kinara.

³⁶Matovu yake na matawi yake yatakuwa ya kitu kimoja nacho; kiwe chote pia kazi moja ya kufua, ya dhahabu safi.

³⁷Nawe zifanye taa zake saba; nao wataziwasha hizo taa zake, zitoe nuru mbele yake.[#Ufu 1:12; Kut 27:21; 30:8; Law 24:3,4; 2 Nya 13:11; Hes 8:2]

³⁸Na makoleo yake, na visahani vyake, vyote vitakuwa vya dhahabu safi.

³⁹Kitafanywa cha talanta moja ya dhahabu safi, pamoja na vyombo hivi vyote.

⁴⁰Nawe angalia ya kwamba uvifanye kama mfano wake, uliooneshwa mlimani.[#Mdo 7:44; Ebr 8:5; Kut 26:30; Hes 8:4; 1 Nya 28:11,19]