Abramu aitwa na Mungu

¹BWANA akamwambia Abramu, Toka wewe katika nchi yako, na jamaa zako, na nyumba ya baba yako, uende mpaka nchi nitakayokuonesha;[#Mdo 7:2-3; Ebr 11:8; Mwa 15:7]

²nami nitakufanya wewe kuwa taifa kubwa, na kukubariki, na kulikuza jina lako; nawe uwe baraka;[#Mwa 17:6; 18:18; 46:3; Hes 23:10; Kum 26:5; 1 Fal 3:8]

³nami nitawabariki wakubarikio, naye akulaaniye nitamlaani; na katika wewe jamaa zote za dunia watabarikiwa.[#Gal 3:8; Mwa 24:35; 27:29; Kut 23:22; Hes 24:9; Mwa 22:18; 26:4; 28:14; Zab 72:17; Mdo 3:25]

⁴Basi Abramu akaenda, kama BWANA alivyomwamuru; Lutu akaenda pamoja naye. Naye Abramu alikuwa mtu wa miaka sabini na mitano alipotoka Harani.

⁵Abramu akamchukua Sarai mkewe, na Lutu mwana wa nduguye, na vitu vyao vyote walivyokuwa wamejipatia na hao watu waliowapata huko Harani, wakatoka ili kwenda nchi ya Kanaani; nao wakaingia katika nchi ya Kanaani.[#Mwa 11:31; Ebr 11:8]

⁶Abramu akapita katikati ya nchi mpaka mahali patakatifu pa Shekemu; mpaka mwaloni wa More. Na Wakanaani siku zile walikaa katika nchi hiyo.[#Yn 4:5; Kum 11:30; Amu 7:1]

⁷BWANA akamtokea Abramu, akasema, Uzao wako nitawapa nchi hii. Naye akamjengea BWANA madhabahu huko alikomtokea.[#Mdo 7:5; Gal 3:16; Mwa 17:1; Kum 34:4; Zab 105:9-12; Mwa 13:4]

⁸Kisha akaondoka huko akaenda mpaka mlima ulio upande wa mashariki wa Betheli, akaipiga hema yake; Betheli ilikuwa upande wa magharibi, na Ai upande wa mashariki, akamjengea BWANA madhabahu huko, akaliitia jina la BWANA.

⁹Naye Abramu akasafiri, akazidi kwenda pande za kusini.[#Mwa 13:3]

Abramu na Sarai nchini Misri

¹⁰Basi kulikuwa na njaa katika nchi ile; Abramu akashuka Misri, akae huko kwa muda maana njaa ilikuwa kali katika nchi.[#Mwa 26:1; Zab 105:13; Mwa 43:1]

¹¹Ikawa alipokuwa karibu kuingia Misri, akamwambia Sarai mkewe, Tazama, najua ya kuwa u mwanamke mzuri wa uso;[#Mwa 26:7]

¹²basi itakuwa, Wamisri watakapokuona watasema, Huyu ni mkewe; kisha wataniua mimi na wewe watakuacha hai.[#Mwa 20:11]

¹³Tafadhali useme, wewe u ndugu yangu, iwe heri kwangu kwa ajili yako, na nafsi yangu iishi kwa ajili yako.[#Mwa 20:2; 26:7; Zab 25:21; Efe 4:25]

¹⁴Basi ikawa Abramu alipofika Misri, Wamisri wakamwona huyo mwanamke ya kwamba yeye ni mzuri sana.

¹⁵Wakuu wa Farao wakamwona, nao wakamsifu kwa Farao; basi yule mwanamke akapelekwa nyumbani mwa Farao.[#Est 2:16]

¹⁶Naye akamtendea Abramu mema kwa ajili yake; naye alikuwa na kondoo na ng'ombe, na punda dume, na watumwa, na wajakazi, na punda majike, na ngamia.

¹⁷Lakini BWANA akampiga Farao na nyumba yake mapigo makuu, kwa ajili ya Sarai, mkewe Abramu.[#Mwa 20:18; 1 Nya 16:21; Zab 105:14; Ebr 13:4]

¹⁸Ndipo Farao akamwita Abramu, akasema, Ni nini hili ulilonitenda? Mbona hukuniambia ya kuwa huyo ni mkeo?[#Mwa 20:9; 26:10; Mit 21:1]

¹⁹Mbona ulisema, Huyo ni dada yangu, hata nikamtwaa kuwa mke wangu? Basi sasa, huyo mke wako umchukue, uende zako.

²⁰Farao akawaagiza watu kwa ajili yake, wakampeleka njiani, na mkewe, na kila alichokuwa nacho.