Mfano wa Yesu

¹Basi na sisi pia, kwa kuwa tunazungukwa na wingu kubwa la mashahidi namna hii, na tuweke kando kila mzigo mzito, na dhambi ile ituzingayo kwa upesi; na tupige mbio kwa subira katika yale mashindano yaliyowekwa mbele yetu,[#Ebr 10:36; Rum 7:21; 1 Kor 9:24]

²tukimtazama Yesu, mwenye kuanzisha na mwenye kutimiza imani yetu; ambaye kwa ajili ya furaha iliyowekwa mbele yake aliustahimili msalaba na kuidharau aibu, naye ameketi katika mkono wa kulia wa kiti cha enzi cha Mungu.[#Ebr 2:10; Zab 110:1]

³Maana mtafakarini sana yeye aliyeyastahimili upinzani mkuu namna hii ya watendao dhambi juu ya nafsi zao, msije mkachoka, mkizimia mioyoni mwenu.[#Lk 2:34]

⁴Hamjafanya vita hata kumwagika damu, mkishindana na dhambi;

⁵tena mmeyasahau yale maonyo, yasemayo nanyi kama kusema na wana,[#Ayu 5:17; Mit 3:11-12]

Mwanangu, usiyadharau maonyo ya Bwana,

Wala usife moyo ukiadhibiwa naye;

⁶Maana yeye ambaye Bwana ampenda, humuonya[#Ufu 3:19]

Naye humpiga kila mwana amkubaliye.

⁷Ni kwa ajili ya kuonywa mnastahimili; Mungu awatendea kama wana; maana ni mwana yupi asiyeonywa na babaye?

⁸Basi kama mkiwa hamna kurudiwa, ambako ni fungu la wote, ndipo mmekuwa wana wa haramu ninyi, wala si wana wa halali.[#Zab 73:14,15]

⁹Na pamoja na hayo tulikuwa na baba zetu wa mwili walioturudi, nasi tukawaheshimu; basi si ni afadhali zaidi kujitia chini ya Baba wa roho zetu na kuishi?[#Hes 16:22]

¹⁰Maana ni hakika, hao kwa siku chache waliturudi kama walivyoona vema wenyewe; bali yeye kwa faida yetu, ili tuushiriki utakatifu wake.

¹¹Kila adhabu wakati wake haionekani kuwa kitu cha furaha, bali cha huzuni; lakini baadaye huwaletea wao waliozoeshwa nayo matunda ya haki yenye amani.[#2 Kor 4:17,18; Yak 3:17]

¹²Kwa hiyo inyosheni mikono iliyolegea na magoti yaliyopooza,[#Isa 35:3]

¹³mkaifanyie miguu yenu njia za kunyoka, ili kitu kilicho kiwete kisipotoshwe, bali afadhali kiponywe.[#Mit 4:26]

Maonyo juu ya kukataa neema ya Mungu

¹⁴Tafuteni kwa bidii kuwa na amani na watu wote, na huo utakatifu, ambao hapana mtu atakayemwona Bwana asipokuwa nao;[#Zab 34:14; Mt 5:8; Rum 12:18; 2 Tim 2:22]

¹⁵mkiangalia sana mtu asiipungukie neema ya Mungu; shina la uchungu lisije likachipuka na kuwasumbua, na watu wengi wakatiwa unajisi kwa hilo.[#Kum 29:18; Mdo 8:23]

¹⁶Asiwepo mwasherati wala asiyemcha Mungu, kama Esau, aliyeuuza urithi wake wa mzaliwa wa kwanza kwa ajili ya chakula kimoja.[#Mwa 25:29-34]

¹⁷Maana mnajua ya kuwa hata alipotaka baadaye kuirithi baraka, alikataliwa (maana hakuona nafasi ya kutubu), ijapokuwa aliitafuta sana kwa machozi.[#Mwa 27:30-40]

¹⁸Maana hamkufikia mlima uwezao kuguswa, uliowaka moto, wala wingu jeusi, na giza, na tufani,[#Kut 19:12,16-22; 20:18-21; Kum 4:11-12; 5:22-27]

¹⁹na mlio wa baragumu na sauti ya maneno; ambayo wale walioisikia walisihi wasiambiwe neno lolote lingine;[#Kut 19:19; 20:19; Kum 5:23]

²⁰maana hawakuweza kustahimili neno lile lililoamriwa, Hata mnyama akiugusa huo mlima atapigwa kwa mawe.[#Kut 19:12-13]

²¹Na hayo yaliyoonekana jinsi yalivyokuwa ya kutisha, hata Musa akasema, Nimeshikwa na hofu na kutetemeka.[#Kum 9:19]

²²Bali ninyi mmeufikia mlima Sayuni, na mji wa Mungu aliye hai, Yerusalemu wa mbinguni, na majeshi ya malaika elfu nyingi,[#Ufu 14:1; 21:2; 5:11; Gal 4:26]

²³mkutano mkuu na kanisa la wazaliwa wa kwanza walioandikwa mbinguni, na Mungu mwamuzi wa watu wote, na roho za watu wenye haki waliokamilika,[#Lk 10:20]

²⁴na Yesu mjumbe wa agano jipya, na damu ya kunyunyizwa, inenayo mema kuliko ile ya Habili.[#Mwa 4:10; Ebr 9:15; 11:4; 1 Pet 1:2]

²⁵Angalieni msimkatae yeye anenaye. Maana ikiwa hawakuokoka wale waliomkataa yeye aliyewaonya juu ya nchi, zaidi sana hatutaokoka sisi tukijiepusha na yeye atuonyaye kutoka mbinguni;[#Kut 20:22; Ebr 2:2; 10:28,29]

²⁶ambaye sauti yake iliitetemesha nchi wakati ule; lakini sasa ameahidi akisema, Mara moja tena nitatetemesha si nchi tu, bali na mbingu pia.[#Hag 2:6]

²⁷Lakini neno lile, Mara moja tena, ladhihirisha kuhamishwa vile viwezavyo kutetemeshwa, kama vitu vilivyoumbwa, vitu visivyoweza kutetemeshwa vikae.

²⁸Basi kwa kuwa tunapokea ufalme usioweza kutetemeshwa, na muwe na neema, ambayo kwa hiyo tumtolee Mungu ibada ya kumpendeza, pamoja na unyenyekevu na kicho;

²⁹maana Mungu wetu ni moto ulao.[#Kum 4:24; 9:3; Isa 33:14]