Hukumu ya Moabu

¹Kuhusu Moabu. BWANA wa majeshi, Mungu wa Israeli, asema hivi, Ole wake Nebo! Kwa maana umeharibika; Kiriathaimu umeaibishwa, umetwaliwa; Misgabu umeaibishwa, nao umebomolewa.[#Isa 15:1; Hes 32:38]

²Sifa za Moabu haziko tena; katika Heshboni wameazimia mabaya juu yake, Haya! Njooni, na tumkatilie mbali asiwe taifa. Wewe nawe, Ee Madmena, utanyamazishwa; upanga utakufuatia.

³Sauti ya kilio toka Horonaimu,

Ya kutekwa na uharibifu mkuu.

⁴Moabu umeharibika;

Wadogo wake wamelia kwa sauti.

⁵Kwa maana watu wapandapo huko Luhithi

Watapanda wasiache kulia;

Nao watu wateremkapo huko Horonaimu

Wameisikia huzuni ya kilio cha uharibifu.

⁶Haya! Kimbieni! Jiokoeni nafsi zenu!

Mkawe kama mtu aliye mkiwa.

⁷Maana, kwa kuwa umeyatumainia matendo yako, na hazina zako, wewe nawe utatwaliwa; na Kemoshi atatoka aende katika uhamisho, makuhani wake na wakuu wake pamoja.[#Zab 49:6,7; 52:7; Yer 9:23; 1 Tim 6:17; Ufu 18:17; Hes 21:29]

⁸Naye mwenye kuteka nyara atakuja juu ya kila mji, wala hakuna mji utakaookoka; bonde nalo litaangamia, nayo nchi tambarare itaharibiwa; kama BWANA alivyosema.

⁹Mpe Moabu mabawa, apate kuruka na kwenda zake; na miji yake itakuwa ukiwa, isiwe na mtu wa kukaa ndani yake.

¹⁰Na alaaniwe mtu afanyaye kazi ya BWANA kwa ulegevu; na alaaniwe auzuiaye upanga wake usimwage damu.[#1 Sam 15:3]

¹¹Moabu amestarehe tangu ujana wake, naye ametulia juu ya sira zake, wala hakumiminwa kutoka chombo kimoja kutiwa chombo kingine, wala hakwenda kufungwa; kwa hiyo ladha yake anakaa nayo, wala harufu yake haikubadilika.[#Sef 1:12]

¹²Basi, tazama, siku zinakuja, asema BWANA, ambazo nitatuma kwake wamiminao, nao watammimina, nao watamwaga vyote vilivyomo vyomboni mwake, na kuzivunja chupa zake vipande vipande.

¹³Na Moabu ataona haya kwa ajili ya Kemoshi, kama nyumba ya Israeli ilivyoona haya kwa ajili ya Betheli, tegemeo lao.[#Amu 11:24; Hos 10:6; 1 Fal 12:29; Amo 5:5,6]

¹⁴Mwasemaje ninyi, Sisi tu mashujaa, watu hodari wa vita.[#Zab 33:6; Mhu 9:11; Isa 16:6; Yer 9:23]

¹⁵Moabu ameharibika, na moshi wa miji yake umepanda; na vijana wake wateule wameteremka kwenda kuchinjwa, asema Mfalme, ambaye jina lake ni BWANA wa majeshi.[#Yer 50:27; 51:57; Mal 1:14]

¹⁶Msiba wa Moabu umefika karibu,

Na mateso yake wanamjia haraka.

¹⁷Ninyi nyote mnaomzunguka, mlilieni,[#Isa 9:4; 14:4]

Nanyi nyote mlijuao jina lake, semeni,

Jinsi ilivyovunjika fimbo ya enzi,

Fimbo ile iliyokuwa nzuri!

¹⁸Ee binti ukaaye Diboni,[#Isa 47:1; 15:2; Yer 46:19; Hes 21:30]

Shuka toka utukufu wako, ukae katika kiu;

Maana atekaye Moabu amepanda juu yako,

Ameziharibu ngome zako.

¹⁹Wewe ukaaye Aroeri,[#Kum 2:36; 1 Sam 4:13,16]

Simama kando ya njia upeleleze;

Mwulize mwanamume akimbiaye na mwanamke atorokaye,

Sema, Imetendeka nini?

²⁰Moabu ameaibishwa, kwa maana amevunjika;[#Hes 21:13]

Ombolezeni na kulia;

Tangazeni habari hii katika Arnoni,

Ya kuwa Moabu ameharibika.

²¹Na hukumu imeifikia nchi tambarare; juu ya Holoni, na juu ya Yasa, na juu ya Mefaathi;

²²na juu ya Diboni, na juu ya Nebo, na juu ya Beth-diblathaimu;

²³na juu ya Kiriathaimu, na juu ya Beth-gamuli, na juu ya Beth-meoni;

²⁴na juu ya Keriothi, na juu ya Bozra, na juu ya miji yote ya nchi ya Moabu, iliyo mbali na iliyo karibu.[#Amo 2:2]

²⁵Pembe ya Moabu imekatika, na mkono wake umevunjika, asema BWANA. Mlevyeni; kwa maana alijitukuza juu ya BWANA

²⁶na Moabu atagaagaa katika matapiko yake, naye atadhihakiwa. Kwa maana Israeli, je! Hakuwa dhihaka kwako?[#Yer 25:15]

²⁷Alionekana kati ya wezi? Maana kila umtajapo watikisa kichwa chako.[#Mit 24:17; Sef 2:8; Yer 2:26]

²⁸Enyi mkaao Moabu, ondokeni mijini,[#Zab 55:6,7; Wim 2:14]

Nendeni mkakae majabalini;

Mkawe kama njiwa atengenezaye kiota chake

Kandoni mwa mdomo wa shimo.

²⁹Tumesikia habari za kiburi cha Moabu;[#Isa 16:6]

Ya kuwa ana kiburi kingi;

Ujeuri wake, na kiburi chake, na majivuno yake,

Na jinsi alivyojitukuza moyoni mwake.

³⁰Najua ghadhabu yake, asema BWANA, ya kuwa si kitu; majisifu yake hayakutenda neno lolote.

³¹Kwa sababu hiyo nitamwombolezea Moabu, naam, nitapiga kelele kwa ajili ya Moabu yote; nitawaombolezea watu wa Kir-heresi.[#Isa 15:5]

³²Nitakulilia, Ee mzabibu wa Sibma, kwa vilio vipitavyo vilio vya Yazeri; matawi yako yalipita juu ya bahari, yalifika hadi bahari ya Yazeri; atekaye nyara ameyaangukia matunda yako ya wakati wa jua, na mavuno yako ya zabibu.[#Hes 21:13]

³³Furaha na shangwe zimeondoshwa, katika shamba lizaalo sana, na katika nchi ya Moabu; nami nimeikomesha divai katika mashinikizo; hapana mtu atakayekanyaga zabibu kwa shangwe; shangwe ile itakuwa si shangwe.[#Isa 16:9,10; Yoe 1:12]

³⁴Toka kilio cha Heshboni mpaka Eleale, naam, mpaka Yahasa, wametoa sauti zao, toka Soari mpaka Horonaimu, hata Eglath-shelishia; maana maji ya Nimrimu nayo yatakuwa ukiwa.[#Isa 15:4-6]

³⁵Pamoja na hayo, asema BWANA, nitamkomesha katika Moabu mtu atoaye sadaka katika mahali pa juu, naye awafukiziaye uvumba miungu yake.[#Isa 15:2]

³⁶Kwa sababu hiyo moyo wangu watoa sauti kama filimbi kwa ajili ya Moabu, na kwa ajili ya watu wa Kir-heresi, moyo wangu watoa sauti kama filimbi; kwa kuwa wingi aliojipatia umepotea.[#Mit 11:4; Mhu 5:13-14; Isa 15:7; Lk 12:20,21]

³⁷Maana kila kichwa kina upara, na ndevu zote zimenyolewa; mikono yote ina alama za chale, na viuno vyote vimevikwa nguo za magunia.[#Yer 47:5; Mwa 37:34]

³⁸Juu ya madari yote ya nyumba za Moabu, na katika njia kuu zake, pana maombolezo, kila mahali; kwa maana nimevunja Moabu kama chombo kisichopendeza, asema BWANA.[#Yer 22:28]

³⁹Jinsi alivyovunjika! Ombolezeni! Jinsi Moabu alivyogeuza kisogo kwa haya! Hivyo ndivyo Moabu atakavyokuwa dhihaka, na sababu ya kuwashangaza watu wote wamzungukao.

⁴⁰Maana BWANA asema hivi, Tazama, ataruka kama tai, na kutandaza mabawa yake juu ya Moabu.[#Yer 49:22; Dan 7:4; Hos 8:1; Hab 1:8; Isa 8:8]

⁴¹Miji imetwaliwa, ngome zimeshambuliwa, na mioyo ya mashujaa wa Moabu siku hiyo itakuwa kama moyo wa mwanamke akiwa katika uchungu wa kujifungua.[#Isa 13:8; Yer 30:6; Mik 4:9]

⁴²Na Moabu ataangamizwa, asiwe taifa tena, kwa sababu alijitukuza juu ya BWANA.[#Zab 83:4; Isa 16:13,14; Mit 16:18]

⁴³Hofu, na shimo, na mtego, zaja juu yako, Ee mwenyeji wa Moabu, asema BWANA.[#Isa 24:17,18]

⁴⁴Aikimbiaye hofu ataanguka shimoni; na yeye atokaye shimoni atanaswa kwa mtego; maana nitaleta juu yake, yaani, juu ya Moabu, mwaka wa kujiliwa kwake, asema BWANA.[#Yer 11:23]

⁴⁵Wamekimbia, wasio na nguvu[#Hes 21:28; 24:17]

Wanasimama chini ya kivuli cha Heshboni;

Ila moto umetoka katika Heshboni,

Na muali wa moto toka kati ya Sihoni

Nao umekula pembe ya Moabu,

Na utosi wa kichwa wa watu wapigao kelele.

⁴⁶Ole wako! Ee Moabu,[#Hes 21:29; Amu 11:24]

Watu wa Kemoshi wamepotea;

Maana wana wako wamechukuliwa mateka,

Na binti zako wamekwenda utumwani.

⁴⁷Lakini nitawarudisha watu wa Moabu walio utumwani, siku za mwisho, asema BWANA. Hukumu ya Moabu imefikia hapa.[#Yer 49:6,39]