Hukumu juu ya Babeli

¹Neno hili ndilo alilosema BWANA, kuhusu Babeli na kuhusu Wakaldayo, kwa kinywa cha Yeremia, nabii.[#Isa 13:1; 21:1]

²Tangazeni katika mataifa,[#Isa 46:1; Yer 43:12]

Mkahubiri na kutweka bendera;

Hubirini, msifiche, semeni,

Babeli umetwaliwa!

Beli amefedheheka;

Merodaki amefadhaika;

Sanamu zake zimeaibishwa,

Vinyago vyake vimefadhaika.

³Maana toka kaskazini taifa linakuja juu yake, litakaloifanya nchi yake kuwa ukiwa; wala hakuna mtu atakayekaa humo; wamekimbia, wamekwenda zao, mwanadamu na mnyama pia.[#Isa 13:17]

⁴Katika siku hizo, na wakati huo, asema BWANA, wana wa Israeli watakuja, wao na wana wa Yuda pamoja; Wataendelea njiani mwao wakilia, nao watamtafuta BWANA, Mungu wao.[#Hos 1:11; 3:5; Zab 126:5; 105:4; Zek 12:10; 8:21,22; Isa 45:19]

⁵Watauliza njia ya kwenda Sayuni, na nyuso zao zitaelekea huko, wakisema, Njooni ninyi, mjiunge na BWANA, kwa agano la milele ambalo halitasahauliwa.[#Yer 31:31; 1 Pet 2:25]

⁶Watu wangu wamekuwa kondoo waliopotea, wachungaji wao wamewapoteza; wamewapotosha milimani; wamekwenda toka mlima hadi kilima, wamesahau mahali pao pa kupumzika.

⁷Watu wote waliowaona wamewala; na adui zao walisema, Sisi hatuna hatia, kwa kuwa hao wametenda dhambi juu ya BWANA, aliye kao la haki, yaani, BWANA, tumaini la baba zao.[#Zek 11:5; Yer 2:3; Dan 9:16; Zab 22:4]

⁸Kimbieni kutoka kati ya Babeli, mkatoke katika nchi ya Wakaldayo, mkawe kama mabeberu mbele ya makundi.[#Ufu 18:4; Isa 48:20; Yer 51:6; Zek 2:6]

⁹Kwa maana juu ya Babeli nitaamsha na kuleta kusanyiko la mataifa makubwa, toka nchi ya kaskazini; nao watajipanga juu yake; kutoka huko atatwaliwa; mishale yao itakuwa kama ya mtu shujaa aliye stadi; hakuna hata mmoja utakaorudi bure.

¹⁰Nao Ukaldayo utakuwa mateka; wote wautekao watashiba, asema BWANA.[#Ufu 17:16]

¹¹Kwa sababu mnafurahi, kwa sababu mnashangilia, enyi mnaouteka urithi wangu, kwa sababu mmenona kama mtamba akanyagaye nafaka, nanyi mnalia kama farasi wenye nguvu;[#Isa 47:6]

¹²mama yenu atatahayarika sana; yeye aliyewazaa atafadhaika; tazama, atakuwa taifa lililo nyuma katika mataifa yote, atakuwa jangwa, nchi ya ukame, na nyika.

¹³Kwa sababu ya ghadhabu ya BWANA haitakaliwa na mtu, bali itakuwa ukiwa mtupu; kila mtu apitaye karibu na Babeli atashangaa, atazomea kwa sababu ya mapigo yake yote.

¹⁴Jipangeni juu ya Babeli pande zote,

Ninyi nyote mpindao upinde;

Mpigeni, msiuzuie hata mshale mmoja;

Kwa maana amemtenda BWANA dhambi.

¹⁵Mpigieni kelele pande zote; amejitoa;[#1 Nya 29:24; 2 Nya 30:8; Omb 5:6; Yer 51:58; Zab 137:8; Yak 2:13; Ufu 16:6]

Maboma yake yameanguka, kuta zake zimebomolewa;

Kwa maana ni kisasi cha BWANA; mlipizeni kisasi;

Kama yeye alivyotenda, mtendeni yeye.

¹⁶Mpanzi mkatilie mbali na Babeli,[#Isa 13:14]

Naye ashikaye mundu wakati wa mavuno;

Kwa sababu ya kuuogopa upanga uoneao,

Watageuka kila mtu kwa watu wake,

Nao wataikimbilia kila mmoja nchi yake.

¹⁷Israeli ni kondoo aliyetawanywa; simba wamemfukuzia mbali; kwanza mfalme wa Ashuru amemla, na mwisho Nebukadneza huyu, mfalme wa Babeli, amemvunja mifupa yake.[#Yoe 3:12; Mt 9:36; Yer 23:2; 2:15; 1 Pet 2:25; 2 Nya 28:20; 2 Fal 17:6; 24:10,14; Isa 7:17,20; 8:7,8]

¹⁸Basi, BWANA wa majeshi, Mungu wa Israeli, asema hivi, Tazama, mimi nitamwadhibu mfalme wa Babeli, na nchi yake, kama nilivyomwadhibu mfalme wa Ashuru.

¹⁹Nami nitamleta Israeli tena malishoni kwake, naye atalisha juu ya Karmeli, na Bashani, na nafsi yake itashiba juu ya milima ya Efraimu, na katika Gileadi.[#Isa 65:10]

²⁰Katika siku hizo na wakati huo, asema BWANA, uovu wa Israeli utatafutwa, wala hakuna uovu; na dhambi za Yuda zitatafutwa, wala hazitaonekana; maana nitawasamehe wale niwaachao kuwa mabaki.[#Yer 31:34; Isa 1:9]

²¹Panda juu ya nchi ya Merathaimu, naam, juu yake, na juu yao wakaao Pekodi; ua, ukaangamize nyuma yao, asema BWANA, ukatende kama nilivyokuagiza, yote pia.[#Isa 10:6]

²²Kuna kishindo cha vita katika nchi,

Kishindo cha uharibifu mkuu.

²³Imekuwaje nyundo ya dunia yote[#Isa 16:6; Yer 51:20]

Kukatiliwa mbali na kuvunjwa?

Imekuwaje Babeli kuwa ukiwa

Katikati ya mataifa?

²⁴Nimekutegea mtego, Ee Babeli, nawe ukanaswa, nawe ulikuwa huna habari; umeonekana, ukakamatwa, kwa sababu ulishindana na BWANA.[#Dan 5:30]

²⁵BWANA amefungua akiba yake ya silaha, naye amezitoa silaha za ghadhabu yake; maana Bwana, BWANA wa majeshi, ana kazi atakayofanya katika nchi ya Wakaldayo.[#Isa 13:5]

²⁶Njooni juu yake toka mpaka ulio mbali;

Zifungueni ghala zake;

Mfanyeni kuwa magofu na kumharibu kabisa;

Msimsazie kitu chochote.

²⁷Wachinjeni mafahali wake wote;[#Zab 22:12; Isa 34:7; Yer 48:44]

Na wateremkie machinjoni;

Ole wao! Maana siku yao imewadia,

Wakati wa kujiliwa kwao.

²⁸Sauti yao wakimbiao na kuokoka,[#Yer 51:10]

Kutoka katika nchi ya Babeli,

Ili kutangaza katika Sayuni kisasi cha BWANA, Mungu wetu,

Kisasi cha hekalu lake.

²⁹Waiteni wapiga mishale juu ya Babeli,[#Ufu 18:6; Omb 3:64; 2 The 1:6; Isa 47:10]

Naam, wote waupindao upinde;

Pangeni hema kumzunguka pande zote;

Ili asiokoke hata mtu mmoja wao;

Mlipeni kwa kadiri ya kazi yake;

Mtendeni sawasawa na yote aliyoyatenda;

Kwa sababu amefanya kiburi juu ya BWANA,

Juu yake aliye Mtakatifu wa Israeli.

³⁰Kwa sababu hiyo vijana wake wataanguka katika njia zake kuu, na watu wake wa vita, wote pia, watanyamazishwa katika siku hiyo, asema BWANA.[#Yer 49:26; 51:4]

³¹Tazama, mimi ni juu yako, Ewe mwenye kiburi, asema Bwana, BWANA wa majeshi; maana siku yako imewadia, wakati nitakapokujia.

³²Na mwenye kiburi atajikwaa, na kuanguka, wala hapana atakayemwinua; nami nitawasha moto katika miji yake, nao utawala wote wamzungukao pande zote.[#Yer 21:14]

³³BWANA wa majeshi asema hivi, Wana wa Israeli, na wana wa Yuda wameonewa sana, na pia wana wa Yuda vivyo hivyo, watekaji wao wote wamewashikilia sana; na wamekataa kuwaachilia waondoke.

³⁴Mkombozi wao ni hodari; BWANA wa majeshi ndilo jina lake; yeye atawatetea kwa bidii, apate kuistarehesha nchi, na kuwasumbua wakaao katika Babeli.[#Ufu 18:8; Mit 23:11; Isa 47:4]

³⁵Upanga uko juu ya Wakaldayo, asema BWANA, na juu yao wakaao Babeli, na juu ya wakuu wake, na juu ya watu wake wenye hekima.[#Dan 5:30; Isa 37:13]

³⁶Upanga uko juu ya hao wajisifuo, nao watapumbazika; upanga uko juu ya mashujaa wake, nao watafadhaika.

³⁷Upanga uko juu ya farasi wao, na juu ya magari yao ya vita; na juu ya watu wote waliochanganyika ndani yake, nao watakuwa kama wanawake; upanga u juu ya hazina zake, nazo zitaibwa.[#Yer 25:20; 51:30; Nah 3:13]

³⁸Ukosefu wa mvua uko juu ya maji yake, nayo yatakaushwa; maana ni nchi ya sanamu za kuchongwa, nao wameingiwa na wazimu kwa ajili ya sanamu.[#Isa 44:27; Ufu 16:12; Yer 51:32,36]

³⁹Basi, wanyama wakali wa jangwani, pamoja na mbwamwitu, watakaa huko, na mbuni watakaa ndani yake; wala haitakaliwa na watu milele; wala hakuna mtu atakayekaa huko tangu kizazi hadi kizazi.[#Ufu 18:2; Isa 13:21; Yer 51:37; 25:12]

⁴⁰Kama vile ilivyotokea Mungu alipoangusha Sodoma na Gomora, na miji iliyokuwa karibu nayo, asema BWANA; kadhalika hakuna mtu atakayekaa huko, wala hakuna mwanadamu atakayekaa huko kama wageni wakaavyo.[#Mwa 19:24-25; Kum 29:23; Isa 1:9; Yer 49:18; Amo 4:11; Sef 2:9; 2 Pet 2:6; Yud 1:7]

⁴¹Angalia, watu wanakuja watokao kaskazini; na taifa kubwa, na wafalme wengi wataamshwa toka pande za mwisho za dunia.[#Yer 6:22; Ufu 17:16]

⁴²Wanashika upinde na mkuki;[#Isa 13:18; 5:30]

Ni wakatili, hawana huruma;

Sauti yao inanguruma kama bahari,

Nao wamepanda farasi;

Kila mmoja amejipanga kama aendaye vitani,

Juu yako, Ee binti Babeli.

⁴³Mfalme wa Babeli amesikia habari zao,[#Yer 49:24]

Na mikono yake imekuwa dhaifu;

Dhiki imemshika, na maumivu,

Kama ya mwanamke akiwa katika uchungu wa kujifungua.

⁴⁴Angalia, atapanda kama simba toka kiburi cha Yordani juu ya malisho yasiyonyauka; lakini nitamkimbiza ghafla ayaache; na yeye aliye mteule nitamweka juu yake; maana ni nani aliye kama mimi? Tena ni nani atakayeniandikia muda? Tena ni mchungaji yupi atakayesimama mbele zangu?[#Ayu 41:10; Dan 5:2,20]

⁴⁵Basi, lisikieni shauri la BWANA,[#Zab 33:11; Isa 14:24; Yer 51:11; Mdo 4:28; Efe 1:11; 1 Kor 1:27]

Alilolifanya juu ya Babeli;

Na makusudi yake aliyoyakusudia

Juu ya nchi ya Wakaldayo.

Hakika watawaburura, naam, wadogo wa kundi;

Hakika malisho yao yatafadhaika kwa ajili yao.

⁴⁶Kwa kishindo cha kutwaliwa Babeli nchi itatetemeka,[#Ufu 18:9]

Na kilio chake chasikiwa katika mataifa.