Yesu aponya katika siku ya sabato

¹Baada ya hayo palikuwa na sikukuu ya Wayahudi; naye Yesu akapanda kwenda Yerusalemu.

²Na huko Yerusalemu karibu na mlango wa kondoo pana bwawa la maji liitwalo kwa Kiebrania Bethzatha, nalo lilikuwa na matao matano.

³Ndani ya hayo jamii kubwa ya wagonjwa walikuwa wamelala, vipofu, viwete, nao waliopooza, [wakingoja maji yachemke.

⁴Kwa maana kuna wakati ambapo malaika hushuka, akaingia katika lile bwawa, akayatibua maji. Basi yeye aliyeingia wa kwanza baada ya maji kutibuliwa, akapona ugonjwa wote uliokuwa umempata.]

⁵Na hapa palikuwa na mtu, ambaye amekuwa mgonjwa muda wa miaka thelathini na minane.

⁶Yesu alipomwona huyu amelala, naye akijua ya kuwa amekuwa katika hali hiyo siku nyingi, alimwambia, Wataka kuwa mzima?

⁷Yule mgonjwa akamjibu, Bwana, mimi sina mtu wa kunitia katika bwawa, maji yanapotibuliwa; ila wakati ninapokuja mimi, mtu mwingine hushuka mbele yangu.

⁸Yesu akamwambia, Simama, jitwike godoro lako, uende.[#Mt 9:6]

⁹Mara yule mtu akawa mzima, akajitwika godoro lake, akaenda. Nayo ilikuwa ni sabato siku hiyo.[#Yn 9:14]

¹⁰Kwa sababu hiyo Wayahudi wakamwambia yule aliyeponywa, Leo ni sabato, wala si halali kwako kujitwika godoro.[#Neh 13:19; Yer 17:21; Lk 6:2]

¹¹Akawajibu, Yeye aliyenifanya kuwa mzima ndiye aliyeniambia, Jitwike godoro lako, uende.

¹²Basi wakamwuliza, Yule aliyekuambia, Jitwike, uende, ni nani?[#Lk 5:21]

¹³Lakini yule mtu aliyeponywa hakumjua ni nani; maana Yesu alikuwa amejitenga, kwa sababu palikuwa na watu wengi mahali pale.

¹⁴Baada ya hayo Yesu akamkuta ndani ya hekalu, akamwambia, Angalia, umekuwa mzima; usitende dhambi tena, lisije likakupata jambo lililo baya zaidi.[#Yn 8:11]

¹⁵Yule mtu akaenda zake, akawapasha habari Wayahudi ya kwamba ni Yesu aliyemfanya kuwa mzima.

¹⁶Kwa sababu hiyo Wayahudi wakamwudhi Yesu, kwa kuwa alitenda hayo siku ya sabato.[#Mt 12:14]

¹⁷Akawajibu, Baba yangu anatenda kazi hata sasa, nami ninatenda kazi.[#Yn 9:4]

¹⁸Basi kwa sababu hiyo Wayahudi walizidi kutaka kumwua, kwa kuwa hakuivunja sabato tu, bali pamoja na hayo alimwita Mungu Baba yake, akijifanya sawa na Mungu.[#Yn 7:30; 10:33]

Mamlaka ya Mwana

Basi Yesu akajibu, akawaambia, Amin, amin, nawaambia,

¹⁹Mwana hawezi kutenda neno mwenyewe ila lile ambalo anamwona Baba akilitenda; kwa maana yote ayatendayo yeye, ndiyo ayatendayo Mwana vile vile.[#Yn 3:11,32]

²⁰Kwa kuwa Baba ampenda Mwana, naye humwonesha yote ayatendayo mwenyewe; hata na kazi kubwa zaidi kuliko hizo atamwonesha, ili ninyi mpate kustaajabu.[#Yn 3:35]

²¹Maana kama Baba awafufuavyo wafu na kuwahuisha, vivyo hivyo na Mwana awahuisha wale awatakao.

²²Tena Baba hamhukumu mtu yeyote, bali amempa Mwana hukumu yote;[#Dan 7:13,14; Mdo 17:31]

²³ili watu wote wamheshimu Mwana kama vile wanavyomheshimu Baba. Asiyemheshimu Mwana hamheshimu Baba aliyemtuma.[#Flp 2:10,11; 1 Yoh 2:23; Lk 10:16]

²⁴Amin, amin, nawaambia, Yeye alisikiaye neno langu na kumwamini yeye aliyenituma ana uzima wa milele; wala haingii hukumuni, bali amepita kutoka mautini kuingia uzimani.[#Yn 3:16,18; 8:51; 1 Yoh 3:14]

²⁵Amin, amin, nawaambia, Saa inakuja, na sasa ipo, wafu watakapoisikia sauti ya Mwana wa Mungu, na wale waisikiao watakuwa hai.[#Mt 8:22; Efe 2:5,6]

²⁶Maana kama vile Baba alivyo na uzima nafsini mwake, vivyo hivyo alimpa na Mwana kuwa na uzima nafsini mwake.[#Yn 1:1-4]

²⁷Naye akampa amri ya kufanya hukumu kwa sababu ni Mwana wa Adamu.[#Dan 7:10,14; Yn 5:22]

²⁸Msistaajabie maneno hayo; kwa maana saa inakuja, ambayo watu wote waliomo makaburini wataisikia sauti yake.

²⁹Nao watatoka; wale waliofanya mema kwa ufufuo wa uzima, na wale waliotenda mabaya kwa ufufuo wa hukumu.[#Dan 12:2; Yn 6:40; Mt 16:27]

Shuhuda kwa Yesu

³⁰Mimi siwezi kufanya neno mwenyewe; kama nisikiavyo ndivyo nihukumuvyo; na hukumu yangu ni ya haki, kwa sababu siyatafuti mapenzi yangu mimi, bali mapenzi yake aliyenituma.[#Yn 5:19; 6:38]

³¹Mimi nikijishuhudia mwenyewe, ushuhuda wangu si kweli.[#Yn 8:14]

³²Yuko mwingine anayenishuhudia; nami najua ya kuwa ushuhuda wake anaonishuhudia ni kweli.[#Yn 5:36,37; 1 Yoh 5:9]

³³Ninyi mlituma watu kwa Yohana, naye akaishuhudia kweli.[#Yn 1:19-27; 3:27-30]

³⁴Si kwamba ninaupokea ushuhuda wa wanadamu; lakini ninasema haya ili ninyi mpate kuokoka.

³⁵Yeye alikuwa taa iwakayo na kung'aa, nanyi mlipenda kuishangilia nuru yake kwa muda.[#Lk 1:17]

³⁶Lakini ushuhuda nilio nao mimi ni mkuu kuliko ule wa Yohana; kwa kuwa zile kazi alizonipa Baba ili nizimalize, kazi hizo zenyewe ninazozitenda, zanishuhudia ya kwamba Baba amenituma.[#1 Yoh 5:9; Yn 1:33; 3:2]

³⁷Naye Baba aliyenituma amenishuhudia. Sauti yake hamkuisikia wakati wowote, wala sura yake hamkuiona.[#Mt 3:17; Mk 1:11; Lk 3:22; Kum 4:12]

³⁸Wala neno lake hamnalo likikaa ndani yenu, kwa kuwa ninyi hammwamini yule aliyetumwa na yeye.

³⁹Mnayachunguza maandiko kwa sababu mnadhani kuwa ndani yake ninyi mna uzima wa milele; na maandiko yayo hayo ndiyo yanayonishuhudia.[#Lk 24:27,44; 2 Tim 3:15-17; 1 Pet 1:11]

⁴⁰Wala hamtaki kuja kwangu mpate kuwa na uzima.

⁴¹Mimi siupokei utukufu kwa wanadamu.

⁴²Lakini nimewajua ninyi ya kuwa hamna upendo wa Mungu ndani yenu.

⁴³Mimi nimekuja kwa jina la Baba yangu, wala ninyi hamnipokei; mwingine akija kwa jina lake mwenyewe, mtampokea huyo.[#Mt 24:5]

⁴⁴Mnawezaje kuamini ninyi mnaopokeana utukufu ninyi kwa ninyi, na utukufu ule utokao kwa Mungu aliye wa pekee hamwutafuti?[#Yn 12:43; Mt 23:5-7]

⁴⁵Msidhani kwamba mimi nitawashitaki kwa Baba; yuko anayewashitaki, ndiye Musa, mnayemtumaini ninyi.[#Kum 31:26]

⁴⁶Kwa maana kama mngalimwamini Musa, mngeniamini mimi; kwa sababu yeye aliandika habari zangu.[#Mwa 3:15; 49:10; Kum 18:15]

⁴⁷Lakini msipoyaamini maandiko yake, mtayaamini maneno yangu vipi?[#Yn 7:19; Lk 16:31]