Ayubu asisitiza kuwa hana hatia

¹Ndipo Ayubu akajibu, na kusema,

²Nimesikia maneno mengi mfano wa hayo;

Ninyi nyote ni wafariji wenye kutaabisha.

³Je! Maneno yasiyo faida yatakuwa na mwisho?

Au, kuna nini kinachokukasirisha, hata ukajibu?

⁴Mimi nami ningeweza kunena kama ninyi;[#2 Fal 19:21; Zab 22:7; Yer 18:16; Omb 2:15]

Kama roho zenu zingekuwa mahali pa roho yangu,

Ningeweza kutunga maneno juu yenu,

Na kuwatikisia ninyi kichwa changu.

⁵Lakini ningewatia nguvu kwa kinywa changu,

Na maliwazo ya midomo yangu yangewatuliza.

⁶Nijapokuwa nanena, huzuni yangu haitulizwi;

Nijapokuwa najizuia, nimepunguziwa kitu gani?

⁷Lakini sasa amenichokesha;

Jamii yangu yote umeifanya ukiwa.

⁸Umenishika sana, na kuwa ushahidi juu yangu;

Na kukonda kwangu kwaniinukia, kwanishuhudia usoni pangu.

⁹Amenirarua katika ghadhabu zake, na kunionea;

Amesagasaga meno juu yangu;

Mtesi wangu hunikazia macho makali.

¹⁰Wamenifumbulia vinywa vyao;[#Zab 22:13; 1 Fal 22:24; Omb 3:30; Mik 5:1; Mt 26:67; Yn 18:22; Mdo 23:2; Zab 35:15]

Wamenipiga shavuni kwa kunitukana;

Hukutana pamoja juu yangu.

¹¹Mungu amenitia kwa hao wapotovu,

Na kunitupa mikononi mwao waovu.

¹²Nilikuwa katika raha, naye akanivunjavunja;

Naam, amenishika shingo, na kuniponda;

Tena amenisimamisha niwe shabaha yake.

¹³Wapigaji wake wa mishale hunizingira kotekote,

Hunipasua figo zangu, asinihurumie;

Nyonga zangu amezimwaga juu ya nchi.

¹⁴Hunivunja kwa uvunjifu juu ya uvunjifu;

Hunishambulia mfano wa jitu shujaa.

¹⁵Nimeshona nguo ya magunia juu ya mwili wangu,[#Zab 7:5]

Na nguvu zangu nimezibwaga mavumbini.

¹⁶Uso wangu umeharibika kwa kutoa machozi,

Na giza tupu liko katika kope zangu;

¹⁷Ijapokuwa hakuna udhalimu mikononi mwangu,

Na kuomba kwangu ni safi.

¹⁸Ee nchi, usiifunike damu yangu,[#Ayu 27:9]

Na kilio changu kisipate mahali pa kupumzika.

¹⁹Hata sasa, tazama, shahidi wangu yuko mbinguni.[#Ayu 19:25; Rum 1:9]

Na huyo atakayenidhamini yuko juu.

²⁰Rafiki zangu hunidharau;

Lakini jicho langu humwagia Mungu machozi;

²¹Laiti angemtolea mtu hoja mbele ya Mungu,[#Ayu 31:35]

Amtetee na mwanadamu mbele ya jirani yake.

²²Kwani ikiisha pita miaka michache,[#Mhu 12:5]

Nitakwenda njia hiyo ambayo sitarudi tena.