¹BWANA akafululiza kumjibu Ayubu, na kusema,

²Je! Mwenye hoja atashindana na Mwenyezi?[#Ayu 9:3; Isa 45:9]

Mwenye kujadiliana na Mungu, na ajibu yeye.

Jibu la Ayubu kwa Mungu

³Ndipo Ayubu akamjibu Mungu, na kusema,

⁴Tazama, mimi si kitu kabisa, nikujibu nini?[#Ezr 9:6; Zab 51:4; Ayu 29:9; Zab 39:9; Zek 2:13]

Naweka mkono wangu kinywani pangu.

⁵Nimenena mara moja, nami sitajibu;

Naam, nimenena mara mbili, lakini sitaendelea zaidi.

Mungu amchochea Ayubu

⁶Ndipo BWANA akamjibu Ayubu katika upepo wa kisulisuli, na kusema,[#Ayu 38:1; Zab 50:3]

⁷Jifunge viuno kama mwanamume,[#Ayu 38:3; 42:4]

Mimi nitakuuliza neno, nawe niambie.

⁸Je! Hata hukumu yangu utaibatilisha?[#Zab 51:4]

Utanitia mimi hatiani, upate kuhesabiwa haki?

⁹Au je! Wewe una mkono kama Mungu?[#Ayu 37:4; Zab 29:3]

Waweza kutoa ngurumo kwa sauti kama yeye?

¹⁰Haya! Jivike sasa fahari na ukuu;[#Zab 93:1]

Jipambe heshima na enzi.

¹¹Mwaga mafuriko ya hasira zako,

Ukamtazame kila mtu mwenye kiburi, ukamdhalilishe.

¹²Mtazame kila mtu mwenye kiburi ukamshushe,[#Isa 2:12; Dan 4:37; Lk 18:14]

Ukawakanyage waovu hapo wasimamapo.

¹³Wafiche mavumbini pamoja,

Wafunge nyuso zao mahali palipositirika.

¹⁴Ndipo mimi nami nitazikiri habari zako,

Ya kuwa mkono wako wa kulia waweza kukuokoa.

¹⁵Mwangalie huyo kiboko, niliyemwumba pamoja nawe;

Yeye hula nyasi kama ng'ombe,

¹⁶Tazama basi, nguvu zake zimo katika viuno vyake,

Na uwezo wake u katika mishipa ya tumbo lake.

¹⁷Yeye hutikisa mkia wake mfano wa mwerezi;

Mishipa ya mapaja yake yanaungamana pamoja.

¹⁸Mifupa yake ni kama mirija ya shaba;

Mbavu zake ni kama vipande vya chuma.

¹⁹Yeye ni wa kwanza kwa hayo matendo makuu ya Mungu;

Ni Muumba wake tu awezaye kumkabili kwa upanga wake.

²⁰Hakika milima humtolea chakula;[#Zab 104:14]

Hapo wachezapo wanyama pori wote.

²¹Hulala chini ya miti yenye vivuli,

Mafichoni penye mianzi, na matopeni.

²²Hiyo miti yenye vivuli humfunika kwa vivuli vyao;

Mierebi ya vijito humzunguka.

²³Tazama, mto ukifurika, yeye hatetemeki;[#Mwa 13:10; Yer 12:5]

Hujiona yu salama, ijapokuwa Yordani hufurika hata kinywani pake.

²⁴Je! Mtu yeyote atamnasa akiwa yu macho,

Au, kumtoboa pua yake kwa mtego?