Ayubu anyenyekezwa na kutoshelezwa

¹Ndipo Ayubu akamjibu BWANA, na kusema.

²Najua ya kuwa waweza kufanya mambo yote,[#Yer 32:17; Mt 3:9; Mk 14:36; Lk 1:37; Efe 3:20]

Na ya kuwa makusudi yako hayawezi kuzuilika.

³Ni nani huyu afichaye ushauri bila maarifa?[#Ayu 38:2; 1 Tim 1:7; Zab 40:5]

Kwa maana, nimesema maneno nisiyoyafahamu,

Mambo ya ajabu ya kunishinda mimi, nisiyoyajua.

⁴Sikiliza, nakusihi, nami nitanena;[#Ayu 38:3]

Nitakuuliza neno, nawe niambie.

⁵Nilikuwa nimesikia habari zako, kwa kusikia kwa masikio;[#Rum 10:17; Hes 12:8,9; Isa 6:1]

Bali sasa jicho langu linakuona.

⁶Kwa sababu hiyo najichukia nafsi yangu, na kutubu

Katika mavumbi na majivu.

Marafiki wa Ayubu waaibishwa

⁷Basi ikawa, baada ya BWANA kumwambia Ayubu maneno hayo, BWANA akamwambia huyo Elifazi Mtemani, Hasira zangu zinawaka juu yako, na juu ya hao rafiki zako wawili; kwa kuwa ninyi hamkunena yaliyo sawa katika habari zangu, kama alivyonena mtumishi wangu Ayubu.

⁸Basi sasa, jitwalieni ng'ombe dume saba, na kondoo dume saba, mkamwendee mtumishi wangu Ayubu, mjisongezee sadaka ya kuteketezwa; na huyo mtumishi wangu Ayubu atawaombea ninyi; kwa kuwa nitamridhia yeye, nisiwatende kulingana na upumbavu wenu; kwani ninyi hamkunena maneno yaliyonyoka katika habari zangu, kama alivyonena mtumishi wangu Ayubu.[#Hes 23:1; Ebr 10:4; Mt 5:24; Mwa 20:17; Ebr 7:25; Yak 5:16]

⁹Basi Elifazi, Mtemani, na Bildadi, Mshuhi, na Sofari, Mnaamathi, wakaenda, wakafanya kama vile BWANA alivyowaamuru; naye BWANA akamridhia Ayubu.

Ayubu arejeshewa mali yake maradufu

¹⁰Kisha BWANA akamrejeshea Ayubu mali yake, hapo alipowaombea rafiki zake; BWANA naye akampa Ayubu mara mbili kuliko hayo aliyokuwa nayo kwanza.[#Ayu 1:1-3; Isa 40:2]

¹¹Ndipo wakamwendea ndugu zake wote, wanaume kwa wanawake, nao wote waliojuana naye hapo zamani, wakala chakula pamoja naye katika nyumba yake; nao wakampa pole na kumliwaza kwa ajili ya mateso hayo yote aliyoleta BWANA juu yake; kila mtu akampa kipande cha fedha, na pete ya dhahabu kila mmoja.[#Ayu 19:13]

¹²Basi hivyo BWANA akaubariki huo mwisho wa Ayubu zaidi ya mwanzo wake; naye alikuwa na kondoo elfu kumi na nne, na ngamia elfu sita, na jozi za ng'ombe elfu moja, na punda wake elfu moja.[#Ayu 8:7; 1:3]

¹³Tena alikuwa na watoto wa kiume saba, na binti watatu.

¹⁴Akamwita huyo wa kwanza jina lake Yemima; na wa pili akamwita jina lake Kesia; na wa tatu akamwita jina lake Keren-hapuhu.

¹⁵Katika nchi hiyo yote hawakuwapo wanawake waliokuwa wazuri kama hao wana wa Ayubu; na baba yao akawapa urithi pamoja na ndugu zao wa kiume.

¹⁶Kisha baada ya mambo hayo Ayubu akaishi miaka mia moja na arubaini, naye akawaona wanawe, na wana wa wanawe, hadi kizazi cha nne.[#Ayu 5:26]

¹⁷Basi Ayubu akafa, akiwa mzee sana mwenye kujawa na siku.[#Mwa 25:8]