Wapelelezi watumwa Kanaani

¹Kisha BWANA akanena na Musa, akamwambia,

²Tuma watu, ili waende wakaipeleleze nchi ya Kanaani, niwapayo wana wa Israeli; katika kabila la baba zao mtamtuma mtu mmoja, kila mtu na awe mkuu kati yao.[#Hes 3:2,8; Kum 1:22; 9:23]

³Basi Musa akawatuma kutoka nyika ya Parani kama alivyoagizwa na BWANA; wote walikuwa ni watu walio vichwa vya wana wa Israeli.

⁴Na majina yao ni haya; katika kabila la Reubeni, Shamua mwana Zakuri.

⁵Katika kabila la Simeoni, Shafati mwana wa Hori.

⁶Katika kabila la Yuda, Kalebu mwana wa Yefune.[#Hes 14:6,30; 26:65; 34:19; Yos 14:6]

⁷Katika kabila la Isakari, Igali mwana wa Yusufu.

⁸Katika kabila la Efraimu, Hoshea mwana wa Nuni

⁹Katika kabila la Benyamini, Palti mwana wa Rafu.

¹⁰Katika kabila la Zabuloni, Gadieli mwana wa Sodi.

¹¹Katika kabila la Yusufu, yaani, katika kabila la Manase, Gadi mwana wa Susi.

¹²Katika kabila la Dani, Amieli mwana wa Gemali.

¹³Katika kabila la Asheri, Sethuri mwana wa Mikaeli.

¹⁴Katika kabila la Naftali, Nabi mwana wa Wofsi.

¹⁵Katika kabila la Gadi, Geueli mwana wa Maki.

¹⁶Hayo ndiyo majina ya hao watu waliotumwa na Musa waende kuipeleleza nchi. Na huyo Hoshea mwana wa Nuni, Musa akamwita jina lake Yoshua.[#Kut 17:9; Mdo 7:45; Ebr 4:8]

¹⁷Musa akawatuma ili waipeleleze nchi ya Kanaani, akawaambia, Pandeni sasa katika Negebu mkapande milimani,[#Mwa 14:10; Kum 1:19; Amu 1:9,19]

¹⁸mkaitazame nchi ni ya namna gani; na watu wanaokaa ndani yake, kama ni wenye nguvu au dhaifu, kama ni wengi au wachache;

¹⁹na nchi wanayoikaa kama ni nzuri au mbaya na kama wanakaa katika kambi au katika ngome;

²⁰nayo nchi ni ya namna gani, kama ni nchi ya utajiri au ya umaskini; kama ina misitu au haina. Kuweni na mioyo ujasiri, mkayalete matunda ya nchi. Basi wakati ule ulikuwa wakati wa kuiva zabibu za kwanza.[#Kum 8:7,8; Neh 9:25-35; Eze 20:6; 34:14; Kum 31:6; Yos 1:6,9; Ebr 13:6]

²¹Basi wakapanda wakaipeleleza nchi toka jangwa la Sini hadi Rehobu, mpaka kuingia Hamathi.

²²Wakapanda katika Negebu, wakafika Hebroni; na Ahimani, na Sheshai, na Talmai, wana wa Anaki, walikuwako huko. Nao Hebroni ulijengwa miaka saba kabla ya Soani wa Misri.[#Amu 1:10; Zab 78:12]

²³Wakafika bonde la Eshkoli, na huko wakakata tawi lenye kishada kimoja cha zabibu, wakalichukua kwa mti kati ya watu wawili; wakaleta makomamanga pia, na tini.

²⁴Bonde lile liliitwa bonde la Eshkoli kwa sababu ya hicho kishada walichokata huko wana wa Israeli.[#13:24 Maana yake ni ‘shada’.]

Taarifa ya wapelelezi

²⁵Wakarejea baada ya kuipeleleza nchi, mwisho wa siku arubaini.

²⁶Wakaenda wakafika kwa Musa, na kwa Haruni, na kwa mkutano wote wa wana wa Israeli, katika jangwa la Parani, huko Kadeshi; wakawaletea habari, wao na mkutano wote, wakawaonesha matunda ya nchi.

²⁷Wakamwambia wakasema, Tulifika nchi ile uliyotutuma, kwa hakika, ni nchi yenye wingi wa maziwa na asali, uthibitisho, haya ndiyo matunda yake.[#Kut 3:8; 13:5; 33:3; Kum 1:25]

²⁸Lakini watu wanaokaa katika nchi ile ni wenye nguvu, na miji yao ina maboma, nayo ni makubwa sana; na pamoja na hayo tuliwaona wana wa Anaki huko.[#Kum 1:28; 9:1,2]

²⁹Amaleki anakaa katika nchi ya Negebu; na Mhiti, na Myebusi, na Mwamori wanakaa katika milima, na Mkanaani anakaa karibu na bahari; na kando ya ukingo wa Yordani.[#Kut 17:8; Amu 6:3; Hes 14:43; 1 Sam 14:48; 15:3; 30:1]

³⁰Kalebu akawatuliza watu mbele ya Musa, akasema, Na tupande mara moja tukaimiliki; maana twaweza kushinda bila shaka.[#Yos 14:7; Zab 60:12; 118:10; Isa 11:10; Rum 8:31; Flp 4:13; Ebr 11:33,34]

³¹Bali wale watu waliopanda pamoja naye wakasema, Hatuwezi kupanda tupigane na watu hawa; kwa maana wana nguvu kuliko sisi.

³²Wakawaletea wana wa Israeli habari mbaya ya ile nchi waliyoipeleleza, wakasema, Ile nchi tuliyopita kati yake ili kuipeleleza, ni nchi inayowala wakazi wake; na watu wote tuliowaona ndani yake ni watu wakubwa mno.[#Mt 23:13; Amo 2:9]

³³Kisha, huko tuliwaona Wanefili, wana wa Anaki, waliotoka kwa hao Wanefili; tukajiona nafsi zetu kuwa kama mapanzi; nao ndivyo walivyotuona sisi.[#Mwa 6:4; 1 Sam 17:4-7; Isa 40:22]