¹Usiwawaonee wivu watu waovu,

Wala usitamani kuwa pamoja nao;

²Kwa maana moyo wao hufikiri dhuluma,

Na midomo yao huongea madhara.

³Nyumba hujengwa kwa hekima,

Na kwa ufahamu huthibitika,

⁴Na kwa maarifa vyumba vyake hujazwa

Vitu vyote vya thamani na vya kupendeza.

⁵Mtu mwenye hekima ana nguvu;

Naam, mtu wa maarifa huongeza uwezo;

⁶Maana kwa mashauri ya akili utafanya vita;

Na kwa wingi wa washauri huja wokovu.

⁷Kwa mpumbavu hekima haipatikani;

Hafumbui kinywa chake langoni.

⁸Mtu afikiriye kutenda maovu,

Watu watamwita mtundu;

⁹Fikira za mpumbavu ni dhambi,[#Mwa 6:5; Zab 119:113; Mt 9:4; Mdo 8:22; 2 Kor 10:5]

Na mwenye mzaha huwachukiza watu.

¹⁰Ukizimia siku ya taabu,

Nguvu zako ni chache.

¹¹Uwaokoe wanaochukuliwa ili wauawe;[#Isa 58:6,7; 1 Yoh 3:16]

Nao walio tayari kuchinjwa uwaopoe.

¹²Ukisema, Sisi hatukujua hayo;[#Ayu 34:11; Yer 32:19; Rum 2:6; Ufu 2:23]

Je! Yeye aipimaye mioyo siye afahamuye?

Naye ailindaye nafsi yako siye ajuaye?

Je! Hatamlipa kila mtu sawasawa na kazi yake?

¹³Mwanangu, ule asali, kwa maana ni njema,

Na sega la asali lililo tamu ulionjapo.

¹⁴Basi utaijua hekima kuwa tamu kwa nafsi yako;

Ikiwa umekwisha kuiona;

Ndipo itakapofuata thawabu;

Wala tumaini lako halitabatilika.

¹⁵Ewe mtu mbaya, usiyavizie makao yake mwenye haki;

Wala usipaharibu mahali pake pa kupumzika;

¹⁶Kwa maana mwenye haki huanguka mara saba akaondoka tena;[#Zab 34:19; Mik 7:8]

Bali wasio haki hukwazwa na mabaya.

¹⁷Usifurahi, adui yako aangukapo;

Wala moyo wako usishangilie ajikwaapo;

¹⁸BWANA asije akaliona hilo, likamkasirisha;

Akageuzia mbali naye hasira yake.

¹⁹Usikasirike kwa sababu ya watenda mabaya;

Wala usiwahusudu wabaya;

²⁰Kwa maana mtu mbaya hapati thawabu;[#Zab 11:6; Isa 3:11]

Taa ya mtu mbaya itazimika.

²¹Mwanangu, mche BWANA, na mfalme;[#Rum 13:7; 1 Pet 2:17]

Wala usishirikiane na wenye kigeugeu;

²²Maana msiba wao utatokea kwa ghafla;

Tena ni nani aujuaye uharibifu wa miaka yao.

Maneno mengine ya wenye hekima

²³Haya nayo pia ni maneno ya wenye akili.[#Kum 1:17; 2 Nya 19:7; Mit 18:5; Yn 7:24]

Kupendelea watu katika hukumu si kwema.

²⁴Amwambiaye mtu mwovu, Wewe una haki;[#Isa 5:23]

Makabila ya watu watamlaani, taifa watamchukia.

²⁵Bali kwao wakemeao furaha itakuwako;

Na baraka ya kufanikiwa itawajilia.

²⁶Aibusu midomo atoaye jawabu la haki.

²⁷Tengeneza kazi yako huko nje,

Jifanyizie kazi yako tayari shambani,

Ukiisha, jenga nyumba yako.

²⁸Usimshuhudie jirani yako pasipo sababu,[#Efe 4:25]

Wala usidanganye kwa midomo yako.

²⁹Usiseme, Nitamtenda kama alivyonitenda mimi;[#Mt 5:39]

Nitamlipa mtu huyo sawasawa na tendo lake.

³⁰Nilipita karibu na shamba la mvivu,

Na shamba la mizabibu la mtu asiye na akili.

³¹Kumbe! Lote pia limemea miiba;[#Yer 4:3; Mt 13:7,22; Ebr 6:8]

Uso wake ulifunikwa kwa viwawi;

Na ukuta wake wa mawe umebomoka.

³²Ndipo nilipoangalia na kufikiri sana;

Niliona, nikapata mafundisho.

³³Bado kulala kidogo, kusinzia kidogo,[#Mit 6:10-11]

Bado kukunja mikono upate usingizi!

³⁴Hivyo, umaskini wako huja kama mnyang'anyi,

Na uhitaji wako kama mtu mwenye silaha.