¹Wimbo ulio bora, wa Sulemani.[#1 Fal 4:32]

Mazungumzo ya bibi arusi na marafiki

²Kubusu na anibusu kwa kinywa chake.

Maana pendo lako lapita divai;

³Manukato yako yanukia vizuri;[#Wim 6:8; Mt 25:1; 2 Kor 11:2]

Jina lako ni kama marhamu iliyomiminwa;

Kwa hiyo wanawali hukupenda.

⁴Nivute nyuma yako, na tukimbie;[#Yer 31:3; Hos 11:4; Yn 6:44; Flp 3:12; Zab 45:14; Yn 14:2; Efe 2:6]

Mfalme ameniingiza vyumbani mwake.

Tutafurahi na kukushangilia;

Tutalinena pendo lako kuliko divai;

Ndiyo, ina haki wakupende.

⁵Mimi ni mweusi mweusi, lakini napendeza,

Enyi binti za Yerusalemu,

Mfano wa hema za Kedari,

Kama mapazia yake Sulemani.

⁶Msinichunguze kwa kuwa ni mweusi mweusi,

Kwa sababu jua limeniunguza.

Wana wa mamangu walinikasirikia,

Waliniweka niwe mlinzi wa mashamba ya mizabibu;

Bali shamba langu mwenyewe sikulilinda.

⁷Nijulishe, ee mpendwa wa nafsi yangu,[#Yn 10:27]

Ni wapi utakapolisha kundi lako,

Ni wapi utakapolilaza adhuhuri.

Kwa nini niwe kama aliyefungiwa shela,

Karibu na makundi ya wenzako?

⁸Usipojua, wewe uliye mzuri katika wanawake,

Shika njia uzifuate nyayo za kondoo,

Na kuwalisha wana-mbuzi wako

Karibu na hema za wachungaji.

Mazungumzo ya bwana arusi, marafiki na bibi arusi

⁹Mpenzi wangu, nimekulinganisha[#Wim 2:2; 2 Nya 1:16]

Na farasi katika magari ya Farao.

¹⁰Mashavu yako ni mazuri kwa mashada,[#Eze 16:11]

Shingo yako kwa mikufu ya vito.

¹¹Tutakutengenezea mashada ya dhahabu,

Yenye vifungo vya fedha.

¹²Muda mfalme alipoketi juu ya kochi,

Nardo yangu ilitoa harufu yake.

¹³Mpendwa wangu ni kama mfuko wa manemane

Ukilazwa usiku maziwani mwangu.

¹⁴Mpendwa wangu ni kama kishada cha hina,

Katika mizabibu huko Engedi.

¹⁵Tazama, u mzuri, mpenzi wangu,[#Wim 4:1]

U mzuri, macho yako ni kama ya hua.

¹⁶Tazama, u mzuri, mpendwa wangu,

Wapendeza, na kitanda chetu ni majani;

¹⁷Nguzo za nyumba yetu ni mierezi,

Na viguzo vyetu ni miberoshi.