Ndoto nyingine

¹Naingia bustanini mwangu, dada yangu, bibi arusi,[#Wim 4:16; Lk 15:7; Yn 3:29]

Nachuma manemane yangu na rihani,

Nala sega la asali na asali yangu,

Nanywa divai yangu na maziwa.

Kaleni, rafiki zangu, kanyweni,

Naam, nyweni sana, wapendwa wangu.

²Nilikuwa nimelala, lakini moyo wangu uko macho,[#Mit 8:4; Ufu 3:20]

Sikiliza! Mpendwa wangu anabisha!

Nifungulie, dada yangu, mpenzi wangu,

Hua wangu, mkamilifu wangu,

Kwa maana kichwa changu kimelowa umande,

Nywele zangu zina manyunyu ya usiku.

³Nimeivua kanzu yangu; niivaeje?

Nimenawa miguu; niichafueje?

⁴Mpendwa wangu aliutia mkono wake tunduni,

Na moyo wangu ukasisimuka kwa ajili yake.

⁵Nikaondoka nimfungulie mpendwa wangu;

Mikono yangu ilidondosha manemane,

Na vidole vyangu matone ya manemane,

Penye vipini vya komeo.

⁶Nilimfungulia mpendwa wangu,[#Hes 5:15; Omb 3:8]

Lakini mpendwa wangu amegeuka amepita;

(Nimezimia nafsi yangu aliponena),

Nikamtafuta, nisimpate,

Nikamwita, asiniitikie.

⁷Walinzi wazungukao mjini waliniona,[#Wim 3:3; Mdo 20:29,30]

Wakanipiga na kunitia jeraha,

Walinzi walindao kuta zake

Wakaninyang'anya shela yangu.

⁸Nawasihi, enyi binti za Yerusalemu,

Ninyi mkimwona mpendwa wangu,

Ni nini mtakayomwambia?

Ya kwamba nazimia kwa mapenzi.

Maongezi ya marafiki na bibi arusi

⁹Mpendwa wa namna gani ni mpendwa wako,

Wewe uliye mzuri katika wanawake,

Mpendwa wa namna gani ni mpendwa wako,

Hata wewe utusihi hivyo?

¹⁰Mpendwa wangu ni mweupe, tena mwekundu,

Mashuhuri miongoni mwa elfu kumi;

¹¹Kichwa chake ni kama dhahabu safi sana,

Nywele zake ni za ukoka, nyeusi kama kunguru;

¹²Macho yake ni kama hua penye vijito,[#Wim 1:15]

Wakioga kwa maziwa, wakiikalia mito iliyojaa;

¹³Mashavu yake ni kama matuta ya rihani

Ambayo hufanyizwa manukato;

Midomo yake ni kama nyinyoro,

Inadondosha matone ya manemane;

¹⁴Mikono yake ni kama mianzi ya dhahabu,

lliyopambwa kwa zabarajadi;

Kiwiliwili chake kama kazi ya pembe,

Iliyonakishiwa kwa yakuti samawi;

¹⁵Miguu yake ni kama nguzo za marimari,

Zilizowekwa juu ya misingi ya dhahabu;

Sura yake ni kama Lebanoni,

Ni bora mfano wa mierezi;

¹⁶Kinywa chake kimejaa maneno matamu,[#Zab 45:2; Yer 31:3; Rum 8:35; Flp 3:8]

Ndiye mzuri sana kwa ujumla.

Ni huyu mpendwa wangu, ni huyu rafiki yangu,

Enyi binti za Yerusalemu.