Tobiti atoa mawaidha ya mwisho

¹Basi Tobiti akaisha kushukuru.

²Na wakati alipopofuka macho umri wake amepata miaka hamsini na minane. Na baada ya miaka minane akajaliwa kuona tena; akatoa sadaka, akazidi kumcha Mungu na kumshukuru.

³Basi akazidi sana kuwa mzee; akamwita mwanawe, na watoto sita wa mwanawe, akamwambia, Mwanangu, uwatwae wanao; tazama, mimi ni mzee, nami ni tayari kuifariki dunia.

⁴Basi, mwanangu, uende Umedi; kwa maana nasadiki kabisa maneno yote yaliyonenwa na nabii juu ya Ninawi, ya kama utaangamizwa; bali kwa muda kutakuwako amani huko Umedi. Ndugu zetu watatawanyika duniani kutoka ile nchi nzuri, na Yerusalemu utakuwa ukiwa; na nyumba ya Mungu ndani yake itateketezwa, na kuwa ukiwa kwa muda.[#Neh 1:2—3:19]

⁵Hatimaye Mungu atawarehemu tena, na kuwarudisha katika nchi nao wataijenga nyumba, walakini si kama ile ya kwanza, hata majira ya zamani zile yatakapotimia. Kisha watarudi kutoka mahali walimofungwa; wataujenga Yerusalemu kwa heshima; nayo nyumba ya Mungu itajengwa ndani yake milele kwa jengo la utukufu; kama vile walivyoitabiria manabii.

⁶Na mataifa yote watageuka kumcha BWANA Mungu kwa kweli; nao watazizika sanamu zao.

⁷Na mataifa yote watamhimidi BWANA; na watu wake watamshukuru Mungu. Naye BWANA atawakuza watu wake; nao wote wampendao BWANA Mungu kwa kweli na kwa haki watafurahi, kwa kuwa amewarehemu ndugu zetu.

⁸Lakini wewe uishike torati na maagizo, ujioneshe kuwa mpenda sadaka na haki, ili ufanikiwe.

⁹Na sasa, mwanangu, uondoke kutoka Ninawi; kwa maana mambo yale aliyoyanena nabii hakika yatatokea.

¹⁰Mimi unizike kwa heshima, na mama yako pamoja nami; wala msizidi kukaa hapa Ninawi. Mwanangu, kumbuka Amani alivyomtenda Akiakaro aliyemlea; jinsi alivyomtoa kwenye nuru na kumleta kwenye giza, na jinsi alivyomlipa; lakini Akiakaro aliokoka, bali yule alipata malipo yake, maana yeye alishuka kwenye giza. Naye Manase alitoa sadaka, akaokoka katika tanzi la mauti ambalo kwamba amemtegea; bali Amani aliingia tanzini akaangamia.

Kifo cha Tobiti na Ana

¹¹Kwa hiyo, mwanangu, fikiri hayo iyatendayo sadaka, na jinsi haki iokoavyo. Naye alipokuwa katika kusema maneno hayo, akatoa roho pale kitandani; na umri wake amepata miaka mia moja hamsini na minane. Wakamzika kwa heshima nyingi.

¹²Na Ana alipokufa, mwanawe akamzika pamoja na baba yake. Lakini Tobia aliondoka, pamoja na mkewe na watoto wake, kwenda Ekbatana kwa mkwewe Ragueli.

¹³Huko alipata kuwa mzee mwenye heshima; akawazika wakweze kwa heshima nyingi; akazirithi mali zao, na zile za Tobiti baba yake.

¹⁴Akafa huko Ekbatana, mji wa Umedi, mwenye umri wa miaka mia moja ishirini na saba.

¹⁵Lakini kabla hajafa akapata habari za kuangamizwa Ninawi, ambao ulitekwa na Nebukadreza na Ahasuero; na kabla ya kufa kwake alipata kusimanga juu ya Ninawi. Ndio mwisho.