¹Yaani, utakatifu, kumbukumbu lake ladumu milele, ambao hukubalika mbele za Mungu na wanadamu;[#Sira 16:3]

²ukiwapo, watu huuiga; ukiwa umeondoka, watu huutamani; siku zote za milele unaendelea umevikwa taji la kushinda, umeshinda katika mashindano ya tuzo zisizo na janaba.

³Bali uzao uzidio wa wasio haki hauleti faida, wala kwa wana wa haramu hawatatia mizizi, wala kushikisha miche imara.

⁴Kwa kuwa iwapo imetoa matawi na kufanikiwa kwa muda kitambo, hata hivyo itatikiswa kwa upepo, na kwa nguvu za dhoruba itang'olewa.

⁵Nayo matawi hayo yatavunjika yasijekomaa, matunda yatakuwa hayafai, yasiyoiva kamwe, hafifu.

⁶Maana watoto waliozaliwa isivyo halali huwashuhudia wazazi wao uovu wao, hapo Mungu atakapowachunguza.

Kifo cha mwadilifu kabla ya wakati

⁷Walakini mwenye haki, ingawa amekufa kabla ya wakati wake, atastarehe.

⁸Kwa maana uzee ulio na heshima, siyo kama kitu chake ni wingi wa wakati tu, wala kipimo chake idadi ya miaka;

⁹bali ufahamu ni kama mvi kwao wanadamu, na maisha safi ni kama uzee ulio mtimilifu.

¹⁰Huyo alionekana amempendeza Mungu, akapendwa naye, hata pindi alipokaa katikati ya wakosaji akachukuliwa.[#Mwa 5:21-24; Sira 44:16; Ebr 11:5]

¹¹Naye akahamishwa ili uovu usimgeuzie nia yake, wala hila isimdanganye roho yake;

¹²mradi usihiri wa utukufu hufumba yaliyo mazuri, na uvuruvuru wa tamaa hupotosha akili zilizo nyofu.

¹³Huyo alikamilika katika siku chache, akatimiza miaka mingi;

¹⁴na kwa kuwa roho yake ilimpendeza BWANA, akafanya haraka ya kuondoka katikati ya uovu. Lakini kwa habari ya waovu, hao huona lakini hawafahamu, wala hawatii mioyoni mwao neno hili,

¹⁵ya kwamba neema na rehema zina wateule wake, naye huwaangalia watakatifu wake.

Ushindi wa wenye haki

¹⁶Mwenye haki aliyefariki dunia

Atawahukumu wasio haki walio hai,

Na ujana uliokamilika upesi

Miaka mingi ya mzee aliye dhalimu.

¹⁷Kwa maana wasio haki watauona mwisho wake mwenye hekima, lakini hawatafahamu makusudi ya BWANA juu yake, wala kwa sababu gani alimweka salama.

¹⁸Hivyo wataona na kudhihaki, lakini BWANA atawacheka.

¹⁹Hata na baadaye watakuwa kama maiti iliyotiwa fedheha, na lawama miongoni mwa wafu milele. Yeye atawatupa chini hali ya kutekewa, atawatikisa mpaka misingi, nao wataharibika ukiwa, wataona uchungu, na kumbukumbu lao litapotea.

Hukumu ya mwisho

²⁰Wao watatokea kwa hofu na woga, watakapohesabiwa dhambi zao; na mbele ya nyuso zao matendo yao yasiyo haki yatawatia hatiani.