¹Hekima huenea kwa nguvu nyingi toka pembe hii hata pembe hii ya dunia, na kuyaratibisha mambo yote kwa jinsi ya kufaa.

Upendo wa Sulemani kwa Hekima

²Ndiyo niliyoipenda tangu ujana wangu na kuitafutatafuta, nikatamani kujichukulia hiyo mithili ya bibi arusi, nikawa na shauku ya uzuri wake.[#Sira 15:2]

³Huona fahari juu ya ungwana wake, kwa sababu hupewa kukaa na Mungu, naye BWANA, Mfalme wa wote, ameipenda.

⁴Mradi hufunuliwa maarifa ya Mungu, kumchagulia matendo yake.[#Mit 8:27-30]

⁵Hata ikiwa mali ni kitu cha kutamaniwa katika maisha haya, utajiri ni nini kuliko Hekima, iendeshayo mambo yote?

⁶Na ikiwa busara ndiyo itendayo kazi, nani aliye fundi wa kazi zote zilizopo kupita Hekima?

⁷Kama mtu akipenda haki, basi matunda ya kazi ya Hekima ni adabu; maana huwafundisha watu kiasi, na ufahamu, na haki, na ushujaa; wala hakuna mambo ya kuwafaa zaidi kwa maisha.

⁸Na hata mtu akiwa anatamani kuelewa na maarifa mengi ya malimwengu, Hekima hujua mambo ya kale, na kutambua mambo yajao; Hufahamu maneno ya fumbo, na kufumbua vitendawili; hutangulia kutambua ishara na maajabu, na matokeo ya majira na nyakati.

Hekima ni ya lazima kwa watawala

⁹Basi nilikusudia kujichukulia hiyo ikae nami, nikijua ya kwamba itaniletea mawazo mema kwa mashauri yake, na faraja nzuri wakati wa masumbufu na huzuni.

¹⁰Kwa ajili yake nitatukuzwa katika makutano, na kuheshimiwa machoni pa wazee ingawa ni kijana.

¹¹Nitaonekana kuwa mwelekevu nitoapo hukumu, na mbele ya wafalme nitapewa staha.

¹²Nikinyamaa, wataningojea; nikiifumbua midomo yangu, watanisikiliza; nikiongeza kunena, watautia mkono kinywani.

¹³Kwa ajili yake nitajaliwa kupata sifa ya milele, na kuwaachia wanifuatao kumbukumbu la daima.

¹⁴Nitatawala watu, na mataifa watatumikishwa chini yangu.

¹⁵Wafalme wa kutisha wataniogopa kwa kusikia habari zangu; na miongoni mwa watu wangu nitajionesha kuwa mtawala stadi na hodari wa vita.

¹⁶Niingiapo nyumbani mwangu nitastarehe pamoja nayo; yaani, kuzungumza nayo si uchungu wala kukaa nayo si hofu; bali ni furaha na changamko.

Sulemani atoa sababu za kumwomba Bwana Hekima

¹⁷Basi nilitafakari mambo hayo, nikafikiri moyoni mwangu ya kama kutokuharibika kunahusiana na Hekima,

¹⁸na urafiki wake unao ukunjufu wa moyo, na kazi za mikono yake zaleta mali isiyopungua, na kuzungumza nayo kwa bidii ni ufahamu, na kupatana na maneno yake huongeza heshima; hivyo nilizunguka nikitafuta-tafuta jinsi ya kujichukulia hiyo.

¹⁹Nami nilikuwa mtoto mwenye adabu, nikajaliwa roho mwema;

²⁰walakini afadhali tuseme, nikiwa mwema, niliingia katika mwili mzuri;

²¹lakini nilitambua ya kwamba siwezi kuwa na Hekima, nisipopewa na Mungu; naam, tena, hata kujua ni nani atoaye neema ni kazi ya ufahamu; basi, nilimwomba BWANA na kumsihi; na kwa moyo wangu wote nilimwambia: