Onyo kuhusu kuwa Makini

¹Kwa hiyo imetupasa kuyaangalia zaidi hayo yaliyosikiwa tusije tukayakosa.

²Kwa maana, ikiwa lile neno lililonenwa na malaika lilikuwa imara, na kila kosa na uasi ulipata ujira wa haki,[#Mdo 7:38,53; Gal 3:19]

³sisi je! Tutapataje kupona, tusipojali wokovu mkuu namna hii? Ambao kwanza ulinenwa na Bwana, kisha ukathibitika kwetu na wale waliosikia;[#Ebr 10:29; 12:25]

⁴Mungu naye akishuhudu pamoja nao kwa ishara na ajabu na nguvu za namna nyingi, na kwa magawanyo ya Roho Mtakatifu, kama alivyopenda mwenyewe.[#Mk 16:20; 1 Kor 12:4,11]

Kutukuka kwa Kujishusha

⁵Maana hakuuweka chini ya malaika ulimwengu ule ujao tunaounena, ila mtu mmoja ameshuhudia hivi mahali fulani, akisema,

⁶Mwanadamu ni nini hata umkumbuke,[#Zab 8:4-6]

Ama mwana wa binadamu, hata umwangalie?

⁷Umemfanya mdogo punde kuliko malaika,

Umemvika taji ya utukufu na heshima,

Umemtawaza juu ya kazi za mikono yako;

⁸Umeweka vitu vyote chini ya nyayo zake.[#1 Kor 15:27]

Kwa maana katika kuweka vitu vyote chini yake hakusaza kitu kisichowekwa chini yake. Lakini sasa bado hamjaona vitu vyote kutiwa chini yake,

⁹ila twamwona yeye aliyefanywa mdogo punde kuliko malaika, yaani, Yesu, kwa sababu ya maumivu ya mauti, amevikwa taji ya utukufu na heshima, ili kwa neema ya Mungu aionje mauti kwa ajili ya kila mtu.[#Flp 2:8,9]

¹⁰Kwa kuwa ilimpasa yeye, ambaye kwa ajili yake na kwa njia yake vitu vyote vimekuwapo, akileta wana wengi waufikilie utukufu, kumkamilisha kiongozi mkuu wa wokovu wao kwa njia ya mateso.[#Rum 11:36]

¹¹Maana yeye atakasaye na hao wanaotakaswa wote pia watoka kwa mmoja. Kwa ajili hii haoni haya kuwaita ndugu zake;[#Mk 3:34,35; Mt 25:40; Yn 20:17]

¹²akisema,[#Zab 22:22]

Nitalihubiri jina lako kwa ndugu zangu;

Katikati ya kanisa nitakuimbia sifa.

¹³Na tena,[#Isa 8:17,18; 2 Sam 22:3]

Nitakuwa nimemtumaini yeye.

Na tena,

Tazama, mimi nipo hapa na watoto niliopewa na Mungu.

¹⁴Basi, kwa kuwa watoto wameshiriki damu na mwili, yeye naye vivyo hivyo alishiriki yayo hayo, ili kwa njia ya mauti amharibu yeye aliyekuwa na nguvu za mauti, yaani, Ibilisi,[#2 Tim 1:10; Yn 12:31; Ufu 12:10; 1 Kor 15:56]

¹⁵awaache huru wale ambao kwamba maisha yao yote kwa hofu ya mauti walikuwa katika hali ya utumwa.

¹⁶Maana ni hakika, hatwai asili ya malaika, ila atwaa asili ya mzao wa Ibrahimu.[#Isa 41:8,9]

¹⁷Hivyo ilimpasa kufananishwa na ndugu zake katika mambo yote, apate kuwa kuhani mkuu mwenye rehema, mwaminifu katika mambo ya Mungu, ili afanye suluhu kwa dhambi za watu wake.[#Zab 22:22; Flp 2:7]

¹⁸Na kwa kuwa mwenyewe aliteswa alipojaribiwa, aweza kuwasaidia wao wanaojaribiwa.[#Ebr 4:15]