¹Waambieni ndugu zenu wanaume, Ami na ndugu zenu wanawake, Ruhama.[#2:1 maana yake ni Watu wangu.; #2:1 maana yake ni Aliyehurumiwa.]

Uzinzi, Adhabu na Ukombozi wa Israeli

²Msihini mama yenu, msihini; kwa maana yeye si mke wangu, wala mimi si mume wake; na ayawekee mbali mambo ya uasherati wake yasiwe mbele ya uso wake, na mambo ya uzinzi wake yasiwe kati ya maziwa yake;[#Isa 50:1; Yer 3:1,9,13; Eze 16:25; Hos 1:2]

³nisije nikamvua nguo zake akawa uchi, nikamweka katika hali aliyokuwa nayo siku ya kuzaliwa kwake, na kumfanya kama jangwa, na kumweka kama nchi kame, na kumfisha kwa kiu;[#Yer 13:22; Eze 19:13; Amo 8:11]

⁴naam, sitawaonea rehema watoto wake; kwa maana ni watoto wa uzinzi.

⁵Maana mama yao amezini; yeye aliyewachukua mimba ametenda mambo ya aibu; maana alisema, Nitafuatana na wapenzi wangu, wanipao chakula changu na maji yangu, sufu yangu na kitani yangu, mafuta yangu na vileo vyangu.[#Yer 44:17]

⁶Basi kwa ajili ya hayo, angalia, nitaiziba njia yako kwa miiba, nami nitafanya kitalu juu yake, asipate kuyaona mapito yake.[#Ayu 19:8]

⁷Naye atawafuata wapenzi wake, lakini hatawapata; atawatafuta, lakini hatawaona; ndipo atakaposema, Nitakwenda nikamrudie mume wangu wa kwanza; kwa maana hali yangu ya zamani ilikuwa njema kuliko hali yangu ya sasa.[#Lk 15:18; Eze 16:8]

⁸Maana hakujua ya kuwa mimi ndiye aliyempa ngano, na divai, na mafuta, na kumwongezea fedha na dhahabu, walivyovitumia kwa ajili ya Baali.

⁹Basi kwa ajili ya hayo, nitaitwaa tena ngano yangu kwa wakati wake, na divai yangu kwa wakati wake, nami nitamnyang’anya sufu yangu na kitani yangu, vya kumfunika uchi wake.

¹⁰Na sasa nitaifunua aibu yake mbele ya macho ya wapenzi wake, wala hapana mtu atakayemwokoa katika mkono wangu.

¹¹Tena nitaikomesha furaha yake yote, na sikukuu zake, na siku zake za mwandamo wa mwezi, na sabato zake, na makusanyiko yake yote yaliyoamriwa.[#Isa 24:7; Yer 7:34; Amo 8:10]

¹²Nami nitaiharibu mizabibu yake na mitini yake, ambayo alisema, Hii ndiyo ujira wangu niliopewa na wapenzi wangu; nami nitaifanya kuwa msitu, na wanyama wa mashamba wataila.[#Isa 5:5]

¹³Nami nitamwadhibu kwa sababu ya siku za Mabaali, aliowafukizia uvumba; hapo alipojipamba kwa pete masikioni mwake, na kwa vito asema BWANA.[#Amu 3:7; Eze 23:40]

¹⁴Kwa hiyo angalia, mimi nitamshawishi, na kumleta nyikani, na kusema naye maneno ya kumtuliza moyo.[#Eze 20:35]

¹⁵Nami nitampa mashamba yake ya mizabibu toka huko, na bonde la Akori kuwa mlango wa tumaini; naye ataniitikia huko, kama siku zile za ujana wake, na kama siku ile alipopanda kutoka nchi ya Misri.[#Isa 65:10; Omb 3:21; Zek 9:12; 1 Kor 13:13; Yos 7:24-26]

¹⁶Tena siku hiyo itakuwa, asema BWANA, utaniita Ishi, wala hutaniita tena Baali.[#2:16 maana yake ni Mume wangu.; #2:16 maana yake ni Bwana wangu.]

¹⁷Kwa maana nitayaondoa majina ya Mabaali kinywani mwake, wala hawatatajwa tena kwa majina yao.[#Kut 23:13]

¹⁸Nami siku hiyo nitafanya agano na wanyama wa mashamba kwa ajili yao, tena na ndege wa angani, tena na wadudu wa nchi; nami nitavivunja upinde na upanga na silaha vitoke katika nchi, nami nitawalalisha salama salimini.[#Ayu 5:23; Zek 9:10; Isa 11:6; 2:4; Law 26:5; Yer 23:6]

¹⁹Nami nitakuposa uwe wangu kwa milele; naam, nitakuposa kwa haki, na kwa hukumu, na kwa ufadhili, na kwa rehema.

²⁰Nami nitakuposa kwa uaminifu; nawe utamjua BWANA.[#Isa 54:13; Yer 31:33]

²¹Tena itakuwa siku hiyo, mimi nitaitika, asema BWANA; nitaziitikia mbingu, nazo zitaiitikia nchi;[#Zek 8:12]

²²nayo nchi itaiitikia nafaka na divai na mafuta; nayo yataiitikia Yezreeli.

²³Nami nitampanda katika nchi kwa ajili yangu mwenyewe; nami nitamrehemu yeye asiyepewa rehema; nami nitawaambia wale wasiokuwa watu wangu, Ninyi ndinyi watu wangu; nao watasema, Wewe ndiwe Mungu wangu.[#Zek 10:9; 13:9; Rum 9:25; 1 Pet 2:10]