Lk 22

Mpango wa Kumwua Yesu

¹Ikakaribia sikukuu ya mikate isiyotiwa chachu, iitwayo Sikukuu ya Pasaka.[#Mt 26:1-5; Mk 14:1,2]

²Na wakuu wa makuhani na waandishi walikuwa wakitafuta njia ya kumwua; maana walikuwa wakiwaogopa watu.[#Lk 20:19]

³Shetani akamwingia Yuda, aitwaye Iskariote, naye ni mmoja wa wale Thenashara.[#Mt 26:14-16; Mk 14:10,11; #Yn 13:2,27]

⁴Akaondoka, akaenda akasema na wakuu wa makuhani na majemadari, jinsi atakavyoweza kumtia mikononi mwao.

⁵Wakafurahi, wakapatana naye kumpa fedha.

⁶Akakubali, akatafuta nafasi ya kumsaliti kwao pasipokuwapo mkutano.

Maandalizi ya Pasaka

⁷Ikafika siku ya mikate isiyotiwa chachu, ambayo ilipasa kuchinja pasaka.[#Mt 26:17-29; Mk 14:12-25; #Kut 12:18-20]

⁸Akawatuma Petro na Yohana, akisema, Nendeni, mkatuandalie pasaka tupate kuila.

⁹Wakamwambia, Wataka tuandae wapi?

¹⁰Akawaambia, Tazama, mtakapoingia mjini mtakutana na mwanamume akichukua mtungi wa maji; mfuateni mkaingie katika nyumba atakayoingia yeye.

¹¹Na mtamwambia mwenye nyumba, Mwalimu akuambia, Ki wapi chumba cha wageni, nipate kula pasaka humo pamoja na wanafunzi wangu?

¹²Naye atawaonyesha chumba kikubwa orofani, kimekwisha andikwa; andaeni humo.

¹³Wakaenda, wakaona kama alivyowaambia, wakaiandaa pasaka.[#Lk 19:32]

Kuanzishwa kwa Chakula cha Bwana

¹⁴Hata saa ilipofika aliketi chakulani, yeye na wale mitume pamoja naye.

¹⁵Akawaambia, Nimetamani sana kuila pasaka hii pamoja nanyi kabla ya kuteswa kwangu;

¹⁶kwa maana nawaambia ya kwamba siili tena hata itakapotimizwa katika ufalme wa Mungu.[#Lk 13:29]

¹⁷Akapokea kikombe, akashukuru, akasema, Twaeni hiki, mgawanye ninyi kwa ninyi;

¹⁸Maana nawaambia ya kwamba tangu sasa sinywi mazao ya mzabibu hata ufalme wa Mungu utakapokuja.

¹⁹Akatwaa mkate, akashukuru, akaumega, akawapa, akisema, [Huu ndio mwili wangu unaotolewa kwa ajili yenu; fanyeni hivi kwa ukumbusho wangu.[#1 Kor 11:23-25; Mdo 27:35]

²⁰Kikombe nacho vivyo hivyo baada ya kula; akisema, Kikombe hiki ni agano jipya katika damu yangu, inayomwagika kwa ajili yenu.][#Kut 24:8; Yer 31:31; Zek 9:11]

²¹Walakini, tazama, mkono wake yeye anayenisaliti upo hapa pamoja nami mezani,[#Yn 13:21,22]

²²Kwa kuwa Mwana wa Adamu aenda zake kama ilivyokusudiwa; lakini, ole wake mtu yule amsalitiye!

²³Wakaanza kuulizana wao kwa wao, ni yupi miongoni mwao atakayelitenda jambo hilo.

Mashindano kuhusu Ukubwa

²⁴Yakatokea mashindano kati yao, kwamba ni nani anayehesabiwa kuwa mkubwa.[#Mt 18:1; Mk 9:34; Lk 9:46]

²⁵Akawaambia, Wafalme wa Mataifa huwatawala, na wenye mamlaka juu yao huitwa Wenye fadhili;[#Mt 20:25-27; Mk 10:42-44]

²⁶lakini kwenu ninyi sivyo; bali aliye mkubwa kwenu na awe kama aliye mdogo; na mwenye kuongoza kama yule atumikaye.[#Mt 23:11; Mk 9:35]

²⁷Maana aliye mkubwa ni yupi? Yeye aketiye chakulani, au yule atumikaye? Siye yule aketiye chakulani? Lakini mimi kati yenu ni kama atumikaye.[#Yn 13:12-15]

²⁸Nanyi ndinyi mliodumu pamoja nami katika majaribu yangu.

²⁹Nami nawawekea ninyi ufalme, kama vile Baba yangu alivyoniwekea mimi;[#Lk 12:32]

³⁰mpate kula na kunywa mezani pangu katika ufalme wangu; na kuketi katika viti vya enzi, huku mkiwahukumu kabila kumi na mbili za Israeli.[#Mt 19:28]

Yesu Atabiri kuhusu Petro Kumkana

³¹Akasema, Simoni, Simoni, tazama, Shetani amewataka ninyi apate kuwapepeta kama vile ngano;[#Mt 26:31-35; Mk 14:27-31; Yn 13:36-38; #2 Kor 2:11; Amo 9:9]

³²lakini nimekuombea wewe ili imani yako isitindike; nawe utakapoongoka waimarishe ndugu zako.[#Yn 17:11,15,20; Zab 51:13]

³³Akamwambia, Bwana, niwapo pamoja nawe, mimi ni tayari kwenda gerezani au hata kifoni.

³⁴Akasema, Nakuambia, Petro, jogoo hatawika leo, kabla wewe hujanikana mara tatu ya kuwa hunijui.

Mfuko, Mkoba, na Upanga

³⁵Akawauliza, Je! Hapo nilipowatuma hamna mfuko, wala mkoba, wala viatu, mlipungukiwa na kitu? Wakasema, La![#Mt 10:9-10; Mk 6:8-9; Lk 9:3; 10:4]

³⁶Akawaambia, Lakini sasa mwenye mfuko na auchukue, na mkoba vivyo hivyo; naye asiye na upanga, na auze joho yake akanunue.

³⁷Kwa kuwa nawaambia, hayo yaliyoandikwa hayana budi kutimizwa kwangu; ya kuwa, Alihesabiwa pamoja na wahalifu. Kwa sababu yanipasayo yanao mwisho wake.[#Isa 53:12; Lk 22:52]

³⁸Wakasema, Bwana, tazama, hapa pana panga mbili. Akawaambia, Basi.

Yesu Aomba katika Mlima wa Mizeituni

³⁹Akatoka akaenda mpaka mlima wa Mizeituni kama ilivyokuwa desturi yake; wanafunzi wake nao wakafuatana naye.[#Mt 26:30,36-46; Mk 14:26,32-42; #Lk 21:37; Yn 18:1]

⁴⁰Alipofika mahali pale aliwaambia, Ombeni kwamba msiingie majaribuni.

⁴¹Mwenyewe akajitenga nao kama kiasi cha kutupa jiwe, akapiga magoti akaomba,

⁴²akisema, Ee Baba, ikiwa ni mapenzi yako, uniondolee kikombe hiki; walakini si mapenzi yangu, bali yako yatendeke. [[#Mt 6:10]

⁴³Malaika kutoka mbinguni akamtokea akamtia nguvu.[#1 Fal 19:5; Yn 12:29]

⁴⁴Naye kwa vile alivyokuwa katika dhiki, akazidi sana kuomba; hari yake ikawa kama matone ya damu yakidondoka nchini.]

⁴⁵Alipoondoka katika kuomba kwake, akawajia wanafunzi wake, akawakuta wamelala usingizi kwa huzuni.

⁴⁶Akawaambia, Mbona mmelala usingizi? Ondokeni, mkaombe, msije mkaingia majaribuni.

Kusalitiwa na Kukamatwa kwa Yesu

⁴⁷Basi alipokuwa katika kusema, tazama, mkutano wa watu, na yule aitwaye Yuda, ambaye ni mmoja wa wale Thenashara, amewatangulia. Akamkaribia Yesu ili kumbusu.[#Mt 26:47-56; Mk 14:43-49; Yn 18:2-11]

⁴⁸Yesu akamwambia, Yuda, wamsaliti Mwana wa Adamu kwa kumbusu?

⁴⁹Na wale waliokuwa karibu naye walipoona yatakayotukia, walisema, Bwana, tuwapige kwa upanga?

⁵⁰Mmoja wao akampiga mtumwa wa Kuhani Mkuu, akamkata sikio la kuume.

⁵¹Yesu akajibu akasema, Mwe radhi kwa hili. Akamgusa sikio, akamponya.

⁵²Yesu akawaambia wakuu wa makuhani, na maakida wa hekalu, na wazee, waliokuja juu yake, Je! Mmekuja wenye panga na marungu kama kukamata mnyang’anyi?[#Lk 22:37]

⁵³Kila siku nilipokuwa pamoja nanyi hekaluni hamkuninyoshea mikono, lakini hii ndiyo saa yenu, na mamlaka ya giza.[#Lk 19:47; 21:37; Yn 7:30; 8:20; Kol 1:13]

Petro Amkana Yesu

⁵⁴Wakamkamata, wakamchukua, wakaenda naye nyumbani kwa Kuhani Mkuu. Na Petro alimfuata kwa mbali.[#Mt 26:57,58,69-75; Mk 14:53,54,66-72; Yn 18:12-18,25-27]

⁵⁵Na walipokwisha washa moto katikati ya kiwanja, waliketi pamoja, naye Petro akaketi kati yao.

⁵⁶Ndipo mjakazi mmoja akamwona ameketi mwangani, akamkazia macho akasema, Na huyu alikuwa pamoja naye.

⁵⁷Akakana, akisema, Ee mwanamke, simjui.

⁵⁸Baadaye kitambo mtu mwingine alimwona akasema, Wewe nawe u mmoja wao. Petro akasema, Ee mtu, si mimi.

⁵⁹Halafu, yapata saa moja, mtu mwingine alikaza kusema, Hakika na huyu alikuwa pamoja naye, kwa kuwa yeye pia ni Mgalilaya.

⁶⁰Petro akasema, Ee mtu, sijui usemalo. Na papo hapo alipokuwa katika kusema, jogoo aliwika.

⁶¹Bwana akageuka akamtazama Petro. Petro akalikumbuka lile neno la Bwana jinsi alivyomwambia, Leo kabla hajawika jogoo utanikana mara tatu.[#Lk 22:34]

⁶²Akatoka nje akalia kwa majonzi.

Kumdhihaki na Kumpiga Yesu

⁶³Na wale watu waliokuwa wakimshika Yesu walimfanyia dhihaka, wakampiga.[#Mt 26:67,68; Mk 14:65]

⁶⁴Wakamfunika macho, kisha wakamwuliza-uliza wakisema, Tabiri, ni nani aliyekupiga?

⁶⁵Wakamtolea na maneno mengine mengi ya kumtukana.

Yesu Mbele ya Baraza

⁶⁶Hata kulipokucha, walikutanika jamii ya wazee, na wakuu wa makuhani, na waandishi, wakamleta katika baraza yao, wakisema,[#Mt 26:59-66; Mk 14:55-64]

⁶⁷Kama wewe ndiwe Kristo, tuambie. Akawaambia, Nijapowaambia, hamtasadiki kabisa.[#Yn 3:12; 8:45; 10:24]

⁶⁸Tena, nikiwauliza, hamtajibu.

⁶⁹Lakini tangu sasa Mwana wa Adamu atakuwa ameketi upande wa kuume wa Mungu Mwenyezi.[#Dan 7:13; Zab 110:1]

⁷⁰Wakasema wote, Basi, wewe ndiwe Mwana wa Mungu? Akawaambia, Ninyi mwasema kwamba mimi ndiye.

⁷¹Wakasema, Basi, tuna haja gani tena ya ushuhuda? Maana, sisi wenyewe tumesikia maneno ya kinywa chake.