KITABU CHA TANO

Shukrani kwa Kukombolewa katika Dhiki

¹Mshukuruni BWANA kwa kuwa ni mwema,[#1 Nya 16:34; 2 Nya 5:13; 7:3; Ezr 3:11; Zab 100:5; 106:1; 118:1; 136:1; Yer 33:11; Mt 19:17]

Kwa maana fadhili zake ni za milele.

²Na waseme hivi waliokombolewa na BWANA,

Wale aliowakomboa na mkono wa mtesi.

³Akawakusanya kutoka nchi zote,[#Zab 106:47; Isa 49:12; Yer 29:14; Eze 39:27]

Mashariki na magharibi, kaskazini na kusini.

⁴Walitanga-tanga jangwani katika njia ya nyika;

Hawakuona mji wa kukaa.

⁵Waliona njaa, waliona na kiu,

Nafsi yao ilikuwa ikizimia ndani yao.

⁶Wakamlilia BWANA katika dhiki zao,[#Zab 50:15; Isa 41:17; Yer 29:12-14; Hos 5:15]

Akawaponya na shida zao.

⁷Akawaongoza kwa njia ya kunyoka,[#Ezr 8:21; Isa 63:12]

Wapate kwenda mpaka mji wa kukaa.

⁸Na wamshukuru BWANA, kwa fadhili zake,

Na maajabu yake kwa wanadamu.

⁹Maana hushibisha nafsi yenye shauku,[#Zab 34:10; Isa 55:1; Mt 5:6; Lk 1:53]

Na nafsi yenye njaa huijaza mema.

¹⁰Waliokaa katika giza na uvuli wa mauti,[#Ayu 36:8]

Wamefungwa katika taabu na chuma,

¹¹Kwa sababu waliyaasi maneno ya Mungu,[#Omb 3:42; Zab 73:24; Lk 7:30; Mdo 20:27]

Wakalidharau shauri lake Aliye juu.

¹²Hata akawadhili moyo kwa taabu,[#Isa 63:5]

Wakajikwaa wala hakuna msaidizi.

¹³Wakamlilia BWANA katika dhiki zao,

Akawaponya na shida zao.

¹⁴Aliwatoa katika giza na uvuli wa mauti,[#Zab 146:7; Mdo 12:7]

Akayavunja mafungo yao.

¹⁵Na wamshukuru BWANA kwa fadhili zake,

Na maajabu yake kwa wanadamu.

¹⁶Maana ameivunja milango ya shaba,[#Isa 45:2]

Ameyakata mapingo ya chuma.

¹⁷Wapumbavu, kwa sababu ya ukosaji wao,[#Zab 14:1; Mit 1:22; Omb 3:39]

Na kwa sababu ya maovu yao, hujitesa.

¹⁸Nafsi zao zachukia kila namna ya chakula,

Wameyakaribia malango ya mauti.

¹⁹Wakamlilia BWANA katika dhiki zao,

Akawaponya na shida zao.

²⁰Hulituma neno lake, huwaponya,[#Hes 21:8; 2 Fal 20:4; Mt 8:8]

Huwatoa katika maangamizo yao.

²¹Na wamshukuru BWANA kwa fadhili zake,

Na maajabu yake kwa wanadamu.

²²Na wamtolee dhabihu za kushukuru,[#Law 7:12; Zab 50:14; Ebr 13:15]

Na kuyasimulia matendo yake kwa kuimba.

²³Washukao baharini katika merikebu,

Wafanyao kazi yao katika maji mengi,

²⁴Hao huziona kazi za BWANA,

Na maajabu yake vilindini.

²⁵Maana husema, akavumisha upepo wa dhoruba,

Ukayainua juu mawimbi yake.

²⁶Wapanda mbinguni, watelemka vilindini,[#Zab 22:14; Isa 13:7; Nah 2:10]

Nafsi yao yayeyuka kwa hali mbaya.

²⁷Wayumba-yumba, wapepesuka kama mlevi,

Akili zao zote zawapotea.

²⁸Wakamlilia BWANA katika dhiki zao,

Akawaponya na shida zao.

²⁹Huituliza dhoruba, ikawa shwari,[#Zab 65:7; Isa 50:2; Mt 8:26; Mk 4:39-41]

Mawimbi yake yakanyamaza.

³⁰Ndipo walipofurahi kwa kuwa yametulia

Naye huwaleta mpaka bandari waliyoitamani.

³¹Na wamshukuru BWANA kwa fadhili zake,

Na maajabu yake kwa wanadamu.

³²Na wamtukuze katika kusanyiko la watu,

Na wamhimidi katika baraza ya wazee.

³³Amegeuza mito ikawa jangwa,[#1 Fal 17:1; Isa 34:9,10; Eze 30:12; Yoe 1:20; Nah 1:4]

Na chemchemi za maji zikawa nchi ya kiu.

³⁴Nchi ya matunda mengi ikawa uwanda wa chumvi,[#Mwa 13:10]

Kwa sababu ya ubaya wao walioikaa.

³⁵Amegeuza jangwa ikawa ziwa la maji,[#Isa 41:18]

Na nchi kavu ikawa chemchemi za maji.

³⁶Maana amewakalisha huko wenye njaa,[#Mdo 17:26]

Nao wametengeneza mji wa kukaa.

³⁷Wakapanda mbegu katika mashamba,

Na kutia mizabibu iliyotoa matunda yake.

³⁸Naye huwabariki wakaongezeka sana,[#Mwa 12:2]

Wala hayapunguzi makundi yao.

³⁹Kisha wakapungua na kudhilika,[#2 Fal 10:32; Ayu 12:21]

Kwa kuonewa na mabaya na huzuni.

⁴⁰Akawamwagia wakuu dharau,

Na kuwazungusha katika nyika isiyo na njia.

⁴¹Akamweka mhitaji juu mbali na mateso,[#1 Sam 2:8; 2 Sam 7:8; Ayu 8:7]

Akamfanyia jamaa kama kundi la kondoo.

⁴²Wanyofu wa moyo wataona na kufurahi,[#Ayu 22:19; 5:16; Mit 10:11]

Na uovu wa kila namna utajifumba kinywa.

⁴³Aliye na hekima na ayaangalie hayo;[#Yer 9:12; Dan 12:10]

Na wazitafakari fadhili za BWANA.