Ombi la Msaada dhidi ya Watesaji

¹BWANA, Mungu wangu, nimekukimbilia Wewe,

Uniokoe na wote wanaonifuatia, uniponye.

²Asije akaipapura nafsi yangu kama simba,[#1 Pet 5:8]

Akiivunja-vunja pasipokuwa na wa kuponya.

³BWANA, Mungu wangu, ikiwa nimetenda haya,[#2 Sam 16:7]

Ikiwa mna uovu mikononi mwangu,

⁴Ikiwa nimemlipa mabaya[#1 Sam 24:7]

Yeye aliyekaa kwangu salama;

(Hasha! Nimemponya yeye

Aliyekuwa mtesi wangu bila sababu;)

⁵Basi adui na anifuatie,

Na kuikamata nafsi yangu;

Naam, aukanyage uzima wangu,

Na kuulaza utukufu wangu mavumbini.

⁶BWANA uondoke kwa hasira yako;[#Zab 94:2]

Ujiinue juu ya jeuri ya watesi wangu;

Uamke kwa ajili yangu;

Umeamuru hukumu.

⁷Kusanyiko la mataifa na likuzunguke,

Na juu yake uketi utawale.

⁸BWANA atawaamua mataifa,

BWANA, unihukumu mimi,

Kwa kadiri ya haki yangu,

Sawasawa na unyofu nilio nao.

⁹Ubaya wao wasio haki na ukome,[#Ufu 2:23; 1 Sam 16:7]

Lakini umthibitishe mwenye haki.

Kwa maana mjaribu mioyo na viuno

Ndiye Mungu aliye mwenye haki.

¹⁰Ngao yangu ina Mungu,

Awaokoaye wanyofu wa moyo.

¹¹Mungu ni mwamuzi mwenye haki,

Naam, Mungu aghadhibikaye kila siku.

¹²Mtu asiporejea ataunoa upanga wake;

Ameupinda uta wake na kuuweka tayari;

¹³Naye amemtengenezea silaha za kufisha,

Akifanya mishale yake kuwa ya moto.

¹⁴Tazama, huyu ana utungu wa uovu,

Amechukua mimba ya madhara, amezaa uongo.

¹⁵Amechimba shimo, amelichimba chini sana,[#Est 7:10; Mit 5:22]

Akatumbukia katika handaki aliyoifanya!

¹⁶Madhara yake yatamrejea kichwani pake,[#1 Fal 2:32]

Na dhuluma yake itamshukia utosini.

¹⁷Nitamshukuru BWANA kwa kadiri ya haki yake;

Nitaliimbia jina la BWANA aliye juu.