GALACIA 1

¹Si Pablo, na Apostol (hindi mula sa mga tao, ni sa pamamagitan man ng tao, kundi sa pamamagitan ni Jesucristo, at ng Dios Ama, na siyang sa kaniya'y muling bumuhay),[#tal. 11, 12.; #Gawa 9:6; 1 Tim. 1:1; Tit. 1:3.; #Gawa 2:24.]

²At ang lahat ng mga kapatid na mga kasama ko, sa mga iglesia ng Galacia:[#Fil. 4:21.; #Gawa 16:6.]

³Sumainyo nawa ang biyaya at kapayapaang mula sa Dios na Ama, at sa ating Panginoong Jesucristo,[#Rom. 1:7.]

⁴Na siyang nagbigay sa kaniyang sarili dahil sa ating mga kasalanan, upang tayo'y mailigtas dito sa kasalukuyang masamang sanglibutan, ayon sa kalooban ng ating Dios at Ama:[#Mat. 20:28; Rom. 4:25; Gal. 2:20.; #Juan 15:19.]

⁵Na sumakaniya ang kaluwalhatian magpakailan man. Siya nawa.

⁶Ako'y namamangha na kay dali ninyong nagsilipat sa ibang evangelio buhat sa tumawag sa inyo sa biyaya ni Cristo;[#tal. 15; Gal. 5:8.]

⁷Na ito'y hindi ibang evangelio : kundi mayroong ilan na sa inyo'y nagsisiligalig, at nangagiibig na pasamain ang evangelio ni Cristo.[#2 Cor. 11:4.; #Gawa 15:24; Gal. 5:10.]

⁸Datapuwa't kahima't kami, o isang anghel na mula sa langit, ang mangaral sa inyo ng anomang evangelio na iba sa aming ipinangangaral sa inyo, ay matakuwil.[#2 Cor. 11:14.]

⁹Ayon sa aming sinabi nang una, ay muling gayon ang aking sinasabi ngayon, Kung ang sinoman ay mangaral sa inyo ng anomang evangelio na iba kay sa inyong tinanggap na, ay matakuwil.[#Gal. 5:12.]

¹⁰Sapagka't ako baga'y nanghihikayat ngayon sa mga tao o sa Dios? o ako baga'y nagsisikap na magbigay-lugod sa mga tao? kung ako'y magbibigay-lugod pa sa mga tao, ay hindi ako magiging alipin ni Cristo.[#1 Tes. 2:4.]

¹¹Sapagka't aking ipinatatalastas sa inyo, mga kapatid, tungkol sa evangelio na aking ipinangaral, na ito'y hindi ayon sa tao.[#Rom. 2:16.]

¹²Sapagka't hindi ko tinanggap ito sa tao, ni itinuro man sa akin, kundi aking tinanggap sa pamamagitan ng pahayag ni Jesucristo.[#1 Cor. 11:23.; #2 Cor. 12:2, 7; Gal. 2:2; Ef. 3:3.]

¹³Sapagka't inyong nabalitaan ang aking pamumuhay nang nakaraang panahon sa relihion ng mga Judio, kung paanong aking inuusig na malabis, at nilipol ang iglesia ng Dios:[#Ef. 4:22; Heb. 13:7.; #Gawa 8:3.]

¹⁴At ako'y nangunguna sa relihion ng mga Judio ng higit kay sa marami sa aking mga kasing gulang sa aking mga kababayan, palibhasa'y totoong masikap ako sa mga sali't-saling sabi ng aking mga magulang.[#Fil. 3:6.; #Mat. 15:2; Col. 2:8.]

¹⁵Nguni't nang magalingin ng Dios na siyang sa akin ay nagbukod, buhat pa sa tiyan ng aking ina, at ako'y tawagin sa pamamagitan ng kaniyang biyaya,[#Rom. 1:1, 5.; #tal. 6.]

¹⁶Na ihayag ang kaniyang Anak sa akin, upang siya'y aking ipangaral sa gitna ng mga Gentil; pagkaraka'y hindi ako sumangguni sa laman at sa dugo:[#Gawa 9:15; Gal. 2:7, 8.]

¹⁷Ni inahon ko man sa Jerusalem silang mga apostol na nangauna sa akin: kundi sa Arabia ako naparoon; at muling nagbalik ako sa Damasco.[#Gal. 4:25.]

¹⁸Nang makaraan nga ang tatlong taon ay umahon ako sa Jerusalem upang dalawin si Cefas, at natira akong kasama niyang labing-limang araw.[#Gawa 9:23.; #Gawa 9:26-30.]

¹⁹Nguni't wala akong nakita sa mga ibang apostol, maliban na kay Santiago na kapatid ng Panginoon.[#Gawa 12:17.]

²⁰Tungkol nga sa mga bagay na isinusulat ko sa inyo, narito, sa harapan ng Dios, hindi ako nagsisinungaling.

²¹Pagkatapos ay naparoon ako sa mga lupain ng Siria at Cilicia.[#Gawa 15:23.; #Gawa 9:30.]

²²At hindi pa ako nakikilala sa mukha ng mga iglesia ng Judea na pawang kay Cristo.[#2 Cor. 5:17.]

²³Kundi ang kanila lamang naririnig na pinaguusapan ay, Yaong umuusig sa atin nang una, ngayo'y nangangaral ng pananampalataya na nang ibang panahon ay kaniyang sinisira;

²⁴At kanilang niluluwalhati ang Dios sa akin.[#2 Cor. 9:13.]