MGA AWIT 50

Ang Panginoon ang hahatol sa matuwid at sa masama. Awit ni Asaph.

¹Ang makapangyarihang Dios, ang Dios na Panginoon, ay nagsalita,

At tinawag ang lupa mula sa pagsikat ng araw hanggang sa paglubog niyaon.

²Mula sa Sion na kasakdalan ng kagandahan,[#Panag. 2:15; Awit 48:2.]

Sumilang ang Dios.

³Ang aming Dios ay darating at hindi tatahimik;

Isang apoy na mamumugnaw sa harap niya,

At magiging totoong malaking bagyo sa palibot niya.

⁴Siya'y tatawag sa langit sa itaas,[#Deut. 4:26.]

At sa lupa upang mahatulan niya ang kaniyang bayan:

⁵Pisanin mo ang aking mga banal sa akin;[#Deut. 33:3; Awit 30:4; 149:1, 5, 9; Is. 13:3.]

Yaong nangakikipagtipan sa akin sa pamamagitan ng hain.

⁶At ipahahayag ng langit ang kaniyang katuwiran;[#Awit 97:6.]

Sapagka't ang Dios ay siyang hukom. (Selah)

⁷Iyong dinggin, Oh aking bayan, at ako'y magsasalita;[#Awit 81:8.]

Oh Israel, at ako'y magpapatotoo sa iyo:

Ako'y Dios, iyong Dios.

⁸Hindi kita sasawayin dahil sa iyong mga hain;[#Awit 51:16.]

At ang iyong mga handog na susunugin ay laging nangasa harap ko.

⁹Hindi ako kukuha ng baka sa iyong bahay,[#Gawa 17:25.]

Ni ng kambing na lalake sa iyong mga kawan.

¹⁰Sapagka't bawa't hayop sa gubat ay akin,

At ang hayop sa libong burol.

¹¹Nakikilala ko ang lahat ng mga ibon sa mga bundok:

At ang mga mabangis na hayop sa parang ay akin.

¹²Kung ako'y magutom ay hindi ko sasaysayin sa iyo:

Sapagka't ang sanglibutan ay akin, at ang buong narito.

¹³Kakanin ko ba ang laman ng mga toro,

O iinumin ang dugo ng mga kambing?

¹⁴Ihandog mo sa Dios ang haing pasasalamat:[#Awit 69:30, 31; Os. 14:2; Heb. 13:15.]

At tuparin mo ang iyong mga panata sa Kataastaasan:

¹⁵At tumawag ka sa akin sa kaarawan ng kabagabagan;[#Awit 81:7; 107:6.]

Ililigtas kita, at iyong luluwalhatiin ako.

¹⁶Nguni't sa masama ay sinasabi ng Dios,

Anong iyong gagawin upang ipahayag ang aking mga palatuntunan,

At iyong kinuha ang aking tipan sa iyong bibig?

¹⁷Palibhasa't iyong kinapopootan ang pagtuturo,

At iyong iniwawaksi ang aking mga salita sa likuran mo.

¹⁸Pagka nakakita ka ng magnanakaw, pumipisan ka sa kaniya,

At naging kabahagi ka ng mga mapangalunya.

¹⁹Iyong ibinubuka ang iyong bibig sa kasamaan,

At ang iyong dila ay kumakatha ng karayaan.

²⁰Ikaw ay nauupo, at nagsasalita laban sa iyong kapatid;[#Job 19:18.]

Iyong dinudusta ang anak ng iyong sariling ina.

²¹Ang mga bagay na ito ay iyong ginawa, at ako'y tumahimik;[#Ec. 8:11, 12.]

Iyong inisip na tunay na ako'y gayong gaya mo:

Nguni't sasawayin kita, at aking isasaayos sa harap ng iyong mga mata.

²²Gunitain nga ninyo ito, ninyong nangakalilimot sa Dios,

Baka kayo'y aking pagluraylurayin at walang magligtas:

²³Ang naghahandog ng haing pasasalamat ay lumuluwalhati sa akin;[#tal. 14.]

At sa kaniya na nagaayos ng kaniyang pakikipagusap

Aking ipakikita ang pagliligtas ng Dios.