MIKAS 1

Panaghoy para sa Samaria at Jerusalem

¹Ang salita ng Panginoon na dumating kay Mikas na Morastita, sa mga araw nina Jotam, Ahaz, at Hezekias, na mga hari ng Juda, na nakita niya tungkol sa Samaria at Jerusalem.[#2 Ha. 15:32-38; 2 Cro. 27:1-7; 2 Ha. 16:1-20; 2 Cro. 28:1-27; 2 Ha. 18:1–20:21; 2 Cro. 29:1–32:33]

²Pakinggan ninyo, kayong mga taong-bayan, kayong lahat,

pakinggan mo, O lupa, at ng lahat ng naroon;

at ang Panginoong Diyos ay maging saksi nawa laban sa inyo,

ang Panginoon mula sa kanyang banal na templo.

³Sapagkat narito, ang Panginoon ay dumarating mula sa kanyang dako,

at siya'y bababa at lalakad sa matataas na dako ng lupa.

⁴At ang mga bundok ay matutunaw sa ilalim niya,

at ang mga libis ay mabibiyak,

na parang pagkit na malapit sa apoy,

parang tubig na ibinuhos mula sa isang mataas na lugar.

⁵Lahat ng ito'y dahil sa pagsuway ng Jacob,

at dahil sa mga kasalanan ng sambahayan ni Israel.

Ano ang pagsuway ng Jacob?

Hindi ba ang Samaria?

At ano ang kasalanan ng sambahayan ng Juda?

Hindi ba ang Jerusalem?

⁶Kaya't gagawin ko ang Samaria na parang bunton sa parang,

isang lugar upang taniman ng ubasan;

at aking ibubuhos ang kanyang mga bato sa libis,

at aking ililitaw ang kanyang mga pundasyon.

⁷Lahat ng kanyang larawang inanyuan ay dudurugin,

ang lahat ng kanyang mga upa ay susunugin,

at ang lahat ng kanyang diyus-diyosan ay aking sisirain;

sapagkat kung paanong tinipon niya ang mga upa ng isang masamang babae

ay muling gagamitin ang mga upa ng masamang babae.

⁸Dahil dito tataghoy ako at tatangis,

ako'y aalis na nakayapak at hubad;

ako'y uungol na parang asong-gubat

at tatangis na gaya ng mga buwitre.

⁹Sapagkat ang kanyang mga sugat ay walang lunas;

at ito'y dumating sa Juda;

ito'y umabot hanggang sa pintuan ng aking bayan,

hanggang sa Jerusalem.

Ang Kaaway ay Papalapit sa Jerusalem

¹⁰Huwag ninyo itong sabihin sa Gat,

huwag kayong tumangis,

sa Bethle-Aphra

ay gumulong kayo sa alabok.

¹¹Dumaan ka,

O mamamayan ng Saphir,

sa kahubaran at kahihiyan;

ang mamamayan ng Zaanan

ay hindi lumalabas;

ang taghoy ng Bet-esel

ay mag-aalis sa iyo ng kanyang dakong kinatatayuan.

¹²Sapagkat ang mga mamamayan ng Maroth

ay balisang naghihintay ng mabuti,

sapagkat ang kasamaan ay bumaba mula sa Panginoon

hanggang sa pintuan ng Jerusalem.

¹³Isingkaw mo ang kabayo sa karwahe,

mga mamamayan ng Lakish;

kayo ang pasimula ng kasalanan sa anak na babae ng Zion:

sapagkat sa iyo ay natagpuan ang pagsuway ng Israel.

¹⁴Kaya't ikaw ay magbibigay ng kaloob ng pamamaalam

sa Moreshet-gat;

ang mga bahay sa Achzib ay magiging mapandayang bagay

sa mga hari ng Israel.

¹⁵Muli akong magdadala sa iyo ng mananakop,

O naninirahan sa Maresha,

ang kaluwalhatian ng Israel

ay darating sa Adullam.

¹⁶Magpakalbo ka, at pagupit ka

para sa mga anak ng iyong kaluguran;

magpakalbo kang gaya ng agila;

sapagkat sila'y patungo sa pagkabihag mula sa iyo.