MGA AWIT 128

¹Ang bawat may takot sa Panginoon ay mapalad,

na sa kanyang mga daan ay lumalakad.

²Kakainin mo ang bunga ng paggawa ng iyong mga kamay;

ikaw ay magiging masaya at ito'y magiging mabuti sa iyo.

³Ang asawa mo'y magiging gaya ng mabungang puno ng ubas

sa loob ng iyong tahanan;

ang mga anak mo'y magiging gaya ng mga puno ng olibo

sa palibot ng iyong hapag-kainan.

⁴Narito, ang taong may takot sa Panginoon ,

ay pagpapalain ng ganito.

⁵Pagpalain ka ng Panginoon mula sa Zion!

Ang kaunlaran ng Jerusalem ay iyo nawang masaksihan

sa lahat ng mga araw ng iyong buhay!

⁶Ang mga anak ng iyong mga anak ay iyo nawang mamasdan,

mapasa Israel nawa ang kapayapaan!