MGA TAGA ROMA 3

¹Ano nga ang kalamangan ng Judio? O ano ang pakinabang sa pagtutuli?

²Napakarami. Ang una sa lahat, ipinagkatiwala sa kanila ang mga aral ng Diyos.

³Ano nga kung ang ilan ay hindi tapat? Ang kanila bang kawalan ng katapatan ay nagpapawalang saysay sa katapatan ng Diyos?

⁴Huwag nawang mangyari! Hayaang ang Diyos ay maging tapat, kahit na ang bawat tao'y sinungaling, gaya ng nasusulat,[#Awit 51:4 (LXX)]

“Upang ikaw ay ariing-ganap sa iyong mga salita,

at magtagumpay ka kapag ikaw ay hinatulan.”

⁵Subalit kung ang ating kasamaan ay nagpapatibay sa katarungan ng Diyos, ano ang ating sasabihin? Ang Diyos ba ay di-makatarungan sa paglalapat ng parusa sa atin? (Nagsasalita ako sa paraan ng tao.)

⁶Huwag nawang mangyari! Sapagkat kung gayo'y paano hahatulan ng Diyos ang sanlibutan?

⁷Subalit kung sa pamamagitan ng aking kasinungalingan ay sumagana ang katotohanan ng Diyos sa ikaluluwalhati niya, bakit hinahatulan pa rin akong tulad sa isang makasalanan?

⁸At bakit hindi sabihin (gaya ng paninirang-puri sa atin ng iba na nagpapatotoo na sinasabi raw natin), “Gumawa tayo ng masama upang dumating ang mabuti?” Ang kahatulan sa kanila ay nararapat.

Walang Matuwid

⁹Ano ngayon? Tayo bang mga Judio ay nakakalamang? Hindi, kahit na sa anong paraan; sapagkat amin nang napatunayan na ang lahat ng tao, maging mga Judio at mga Griyego, ay nasa ilalim ng kapangyarihan ng kasalanan,

¹⁰gaya ng nasusulat,[#Awit 14:1-3 (LXX); Awit 53:1-3 (LXX)]

“Walang matuwid, wala, wala kahit isa;

¹¹wala ni isang nakakaunawa,

wala ni isang humahanap sa Diyos.

¹²Lahat ay lumihis, sama-sama silang nawalan ng kabuluhan;

walang gumagawa ng mabuti,

wala, wala kahit isa.”

¹³“Ang kanilang lalamunan ay isang libingang bukas;[#Awit 5:9 (LXX); Awit 140:3]

sa pamamagitan ng kanilang mga dila ay gumagawa sila ng pandaraya.”

“Ang kamandag ng mga ulupong ay nasa ilalim ng kanilang mga labi.”

¹⁴“Ang kanilang bibig ay punô ng panunumpa at kapaitan.”[#Awit 10:7 (LXX)]

¹⁵“Ang kanilang mga paa ay matutulin sa pagpapadanak ng dugo;[#Isa. 59:7, 8]

¹⁶pagkawasak at kalungkutan ang nasa kanilang mga landas,

¹⁷at ang daan ng kapayapaan ay hindi nila nakilala.”

¹⁸“Walang takot sa Diyos sa kanilang mga mata.”[#Awit 36:1]

¹⁹Ngayon ay nalalaman natin na anumang sinasabi ng kautusan, iyon ay sinasabi sa mga nasa ilalim ng kautusan; upang matahimik ang bawat bibig, at ang buong sanlibutan ay mapasailalim ng hatol ng Diyos.

²⁰Sapagkat sa pamamagitan ng mga gawa ng kautusan ay “walang tao na ituturing na ganap sa paningin niya,” sapagkat sa pamamagitan ng kautusan ay ang pagkakilala ng kasalanan.[#Awit 143:2; Ga. 2:16; #3:20 Sa Griyego ay .]

Ang Pag-aaring-ganap ng Diyos sa Tao

²¹Subalit ngayon ay ipinahahayag ang pagiging matuwid ng Diyos na hiwalay sa kautusan at pinatotohanan ng kautusan at ng mga propeta;

²²ang pagiging matuwid ng Diyos sa pamamagitan ng pananampalataya kay Jesu-Cristo sa lahat ng mga sumasampalataya. Sapagkat walang pagkakaiba,[#Ga. 2:16]

²³yamang ang lahat ay nagkasala, at hindi nakaabot sa kaluwalhatian ng Diyos;

²⁴sila ngayon ay itinuturing na ganap ng kanyang biyaya bilang kaloob sa pamamagitan ng pagtubos na na kay Cristo Jesus;

²⁵na siyang inialay ng Diyos bilang handog na pantubos sa pamamagitan ng kanyang dugo na mabisa sa pamamagitan ng pananampalataya. Ito ay kanyang ginawa upang maipakita ang pagiging matuwid ng Diyos, sapagkat sa kanyang banal na pagtitiis ay kanyang pinalampas ang mga kasalanang nagawa sa nakaraan;

²⁶upang mapatunayan sa panahong kasalukuyan na siya'y matuwid at upang siya'y maging ganap at taga-aring-ganap sa taong mayroong pananampalataya kay Jesus.[#3:26 o .]

²⁷Kaya nasaan ang pagmamalaki? Ito'y hindi kasama. Sa pamamagitan ng anong kautusan? Ng mga gawa? Hindi, kundi sa pamamagitan ng kautusan ng pananampalataya.

²⁸Sapagkat pinaninindigan natin na ang tao ay itinuturing na ganap sa pananampalataya na hiwalay sa mga gawa ng kautusan.

²⁹O ang Diyos ba ay Diyos ng mga Judio lamang? Hindi ba Diyos din siya ng mga Hentil? Oo, ng mga Hentil din naman;

³⁰yamang iisa ang Diyos, na kanyang ituturing na ganap ang pagtutuli sa pamamagitan ng pananampalataya, at ang di-pagtutuli sa pamamagitan ng pananampalataya.[#Deut. 6:4; Ga. 3:20]

³¹Kung gayon, pinawawalang-saysay ba natin ang kautusan sa pamamagitan ng pananampalataya? Huwag nawang mangyari; kundi pinagtitibay pa nga natin ang kautusan.