1 Timoteo 3

Mga Dapat na Katangian ng Tagapangasiwa at Tagapaglingkod

¹Mapagkakatiwalaan ang salitang ito: Ang sinumang nagnanais na maging tagapangasiwa ng iglesya ay naghahangad ng marangal na gawain.

²Ang isang tagapangasiwa ay dapat walang kapintasan, tapat sa kanyang asawa, hindi madaling magalit, marunong magpigil sa sarili, kagalang-galang, bukas ang tahanan sa mga tao, at may kakayahang magturo.[#3:2 : O may magandang reputasyon.]

³Hindi siya dapat lasenggo, hindi marahas kundi mahinahon, hindi palaaway, at hindi mukhang pera.

⁴Kailangan ding mahusay siyang mamahala sa pamilya niya; iginagalang at sinusunod ng mga anak niya.

⁵Sapagkat kung hindi siya marunong mamahala sa sariling pamilya, paano siya makakapangasiwa nang maayos sa iglesya ng Diyos?

⁶Dapat ay hindi siya bagong mananampalataya, at baka maging mayabang siya at mahatulan katulad ng diyablo.

⁷Bukod pa rito, kailangang iginagalang siya ng mga hindi miyembro ng iglesya upang hindi siya mapintasan at hindi mahulog sa bitag ng diyablo.

⁸Ganoon din naman sa mga tagapaglingkod sa iglesya: Kailangang kagalang-galang sila, tapat sa kanilang salita, hindi lasenggo, at hindi gahaman sa pera.[#3:8 : O kayaʼy diyakono.]

⁹Kailangang pinanghahawakan nila ang katotohanan tungkol sa pananampalataya kay Kristo nang may malinis na konsensiya.

¹⁰Kailangan ding masubok muna sila; at kung mapatunayang karapat-dapat, hayaan silang makapaglingkod bilang tagapaglingkod.

¹¹Kailangang kagalang-galang din ang mga asawa nila, hindi mapanira sa kapwa, hindi madaling magalit, at mapagkakatiwalaan sa lahat ng bagay.

¹²Ang mga tagapaglingkod ay dapat isa lamang ang asawa at mahusay mamahala sa kanilang mga anak at buong sambahayan

¹³sapagkat ang mga naglilingkod nang mabuti bilang tagapaglingkod ay iginagalang ng mga tao at lalong lumalago ang katiyakan nila sa kanilang pananampalataya kay Kristo Hesus.

Mga Dahilan ng Tagubilin ni Pablo

¹⁴Kahit umaasa akong makakapunta diyan saʼyo sa lalong madaling panahon, isinulat ko pa rin ang mga tagubiling ito upang

¹⁵kahit maantala ako, alam mo na kung ano ang dapat maging ugali ng mga mananampalataya bilang pamilya ng Diyos. Tayong mga mananampalataya ang iglesya ng buháy na Diyos, ang haligi at saligan ng katotohanan.

¹⁶Hindi maikakaila na ang hiwaga ng ating pananampalataya ay napakadakila:[#3:16 : Sa literal, pagiging maka-Diyos.]

Nagpakita siya bilang tao,

pinatotohanan ng Espiritu

na siyaʼy matuwid,

nakita siya ng mga anghel,

ipinangaral sa mga bansa,

pinaniwalaan ng mundo,

at dinala sa langit.