Habakuk 2

¹Sinabi ni Habakuk, “Aakyat ako sa tore,

sa aking bantayan

at hihintayin ko kung ano ang sasabihin

sa akin ng Panginoon

at kung ano ang kanyang sagot

sa aking hinaing.”

Ang Sagot ng Diyos kay Habakuk

²Ito ang sagot ng Panginoon

kay Habakuk:

“Isulat mo nang malinaw

sa malalapad na bato

ang pahayag na ito

upang madaling basahin

ng magpapahayag nito.

³Sapagkat hindi pa dumarating

ang takdang panahon

para mangyari ito.

Ngunit hindi magtatagal

at tiyak na mangyayari ito.

Kahit magtagal nang kaunti,

hintayin mo lang,

dahil tiyak na mangyayari ito

sa takdang panahon.

⁴“Tingnan mo ang mga taong mapagmataas.

Hindi matuwid ang kanilang pamumuhay.

Ngunit ang taong matuwid ay mabubuhay

dahil sa kanyang pananampalataya.

⁵Ang totoo,

hindi maaasahan ang kayamanan.

At ang mga taong mapagmataas

na sakim sa kayamanan

ay laging balisa at walang kasiyahan.

Tulad nilaʼy kamatayan na hindi makukuntento.

Kaya binibihag nila ang maraming bansa.

⁶“Ngunit kukutyain sila ng mga bansang iyon sa pamamagitan ng mga salitang ito,

‘Nakakaawa naman kayo,

kayong nangunguha

ng mga bagay na hindi sa inyo

at nagpapayaman sa pamamagitan

ng pandaraya.

Hanggang kailan pa ninyo ito gagawin?’

⁷Biglang dadating ang inyong

mga inutangan.

Sasalakayin nila kayo at sasamsamin

ang lahat ng inyong ari-arian,

habang nanginginig kayo sa takot

at walang kalaban-laban.

⁸Dahil maraming bansa

ang sinamsaman ninyo

ng mga ari-arian,

kayo naman ang sasamsaman

ng mga natitirang tao

sa mga bansang iyon.

Mangyayari ito sa inyo

dahil sa inyong pagpatay ng mga tao

at pamiminsala sa kanilang mga lupain

at mga bayan.

⁹“Nakakaawa kayo,

kayong nagpapatayo ng mga bahay

sa pamamagitan

ng perang nakuha ninyo

sa masamang paraan.

Pinatitibay ninyo ang inyong mga bahay

upang makaligtas kayo

kapag dumating ang kapahamakan.

¹⁰Dahil sa pagpatay ninyo

ng maraming tao,

kayo rin ay papatayin

at wawasakin ang inyong mga bahay.

¹¹Ang mga bato sa pader

ay sisigaw laban sa inyo,

at sa mga biga ng bahay

ay aalingawngaw ang mga hinaing.

¹²“Nakakaawa kayo,

kayong nagpapatayo ng lungsod

sa pamamagitan ng pagdanak ng dugo.

Handa kayong pumatay

upang itoʼy maitayo.

¹³Ngunit ang mga ipinatayo ninyo

sa mga taong binihag ninyo

ay susunugin lang,

kaya mawawalan ng kabuluhan

ang inyong pinagpaguran.

Itinakda na iyan ng Panginoon

ng mga Hukbo.

¹⁴Sapagkat kung paanong ang karagatan

ay puno ng tubig,

ang lahat ng tao sa mundo

ay mapupuno rin ng kaalaman

tungkol sa kadakilaan ng Panginoon .

¹⁵“Kahabag-habag kayong mga nagpapainom

sa inyong kapwa,

ibinubuhos ninyo ang alak

hanggang silaʼy malasing

upang makita ninyo silang huboʼt hubad.

¹⁶Ngayon kayo naman ang ilalagay

sa kahihiyan sa halip na parangalan,

dahil parurusahan kayo

ng Panginoon .

Kayo naman ang paiinumin niya

sa tasa ng kanyang galit,

at kapag lasing na kayo,

makikita ang inyong kahubaran

at malalagay kayo sa kahihiyan.

¹⁷Pinutol ninyo ang mga puno sa Lebanon,

at dahil dito,

namatay ang mga hayop doon.

Kaya ngayon,

kayo naman ang pipinsalain

at manginginig sa takot.

Mangyayari ito sa inyo

dahil sa pagpatay ninyo ng mga tao

at pagpinsala sa kanilang mga lupain

at mga bayan.

¹⁸“Ano ang kabuluhan

ng mga diyos-diyosan?

Ang mga itoʼy gawa

ng mga tao lamang,

mga imaheng nagtuturo

ng kasinungalingan.

At bakit nagtitiwala dito

ang taong may gawa sa kanya?

Ni hindi nga ito makapagsalita.

¹⁹Nakakaawa kayong nagsasabi

sa rebultong kahoy o bato,

‘Gumising ka at tulungan kami.’

Ni hindi nga iyan

makapagtuturo sa inyo.

At kahit pa balot iyan ng ginto at pilak,

wala naman itong buhay.”

²⁰Ngunit ang Panginoon

ay nasa kanyang banal na Templo.

Kaya ang buong mundo

ay mananahimik sa kanyang harapan.