Isaias 9

Pag-asa sa Darating na Mesias

¹Subalit hindi mananatili ang kadiliman sa mga naghihinagpis magpakailanman. Noong unaʼy hinamak niya ang lupain ng Zebulun at lupain ng Neftali, ngunit sa darating na araw ay pararangalan niya ang dinadaanan patungo sa lawa, ang lupain sa ibayo ng Ilog Jordan, ang Galilea na lugar ng mga Hentil.

²Ang mga taong nabubuhay sa kadiliman

ay nakakita

ng matinding kaliwanagan.

Kahit silaʼy nababalot

ng matinding kadiliman,

sila ay maliliwanagan.

³Panginoon , pinalawak ninyo

ang kanilang bansa

at silaʼy nag-uumapaw sa tuwa.

Nagagalak sila sa inyong harapan

katulad ng mga taong nagagalak

sa panahon ng anihan,

katulad ng mga mandirigmang nagdiriwang

sa paghahati-hati nila

ng mga nasamsam.

⁴Binali ninyo ang pamatok

na naging pabigat,

ang tungkod sa kanilang balikat,

ang pamalo ng kanilang mang-aapi

katulad noong nalupig ang Midian.

⁵Ang mga bota ng mga sundalo

at ang mga uniporme nilang

tigmak ng dugo

ay susunugin bilang panggatong sa apoy.

⁶Ipapanganak ang isang batang lalaki

na maghahari sa amin.

Tatawagin siyang,

“Kahanga-hangang Tagapayo,

Diyos na Makapangyarihan,

Walang Hanggang Ama,

at Prinsipe ng Kapayapaan.”

⁷Hindi magwawakas ang pag-unlad

ng kanyang pamamahala,

at maghahari ang kapayapaan.

Siya ang magmamana ng kaharian ni David.

Patatatagin niya ito at paghahariang

may katarungan at katuwiran

magpakailanman.

Sisiguraduhin ng Panginoon

ng mga Hukbo na matutupad ito.

Ang Galit ng Diyos sa Israel

⁸Sinabi ng Panginoon

na parurusahan niya ang Israel,

ang lahi ni Jacob.

⁹At alam ito ng lahat ng tao sa Efraim,[#9:9 : O malalaman.; #9:9 : Ginagamit na pantukoy sa Israel.]

pati ng mga nasa Samaria

na kabisera nito.

Ngunit nagmamataas pa rin sila

at payabang na sinasabi,

¹⁰“Mawasak man ang mga itinayo naming bahay

na yari sa brik at kahoy na sikomoro,

papalitan naman namin ito

ng bato at kahoy na sedro.”

¹¹Ngunit palalakasin ng Panginoon

ang mga kaaway ni Rezin

laban sa kanila,

at uudyukan ang lahat

ng mga kalaban niya.

¹²Sasakmalin ng mga taga-Aram

ang Israel sa gawing silangan

at mga Filisteo sa gawing kanluran.

Ngunit hindi pa rin humuhupa

ang poot ng Panginoon ,

at nakahanda pa rin siyang

magparusa sa kanila.

¹³Ngunit ayaw pa ring magbalik-loob

ng mga Israelita

kahit na silaʼy naparusahan,

at ayaw din nilang hanapin

ang Panginoon ng mga Hukbo.

¹⁴Kaya puputulin ng Panginoon

ang buntot at ulo ng Israel,

ang sanga ng maharlikang palma

at ang hamak na tambo

sa isang araw lamang.

¹⁵Ang ulo ay ang mga pinuno

at ang mga iginagalang na tao,

at ang buntot

ay ang mga sinungaling na propeta.

¹⁶Ang mga namumuno sa mga taong ito

ang nagliligaw sa kanila,

kaya ang mga sumusunod

ay naliligaw ng daan.

¹⁷Dahil dito, hindi nalulugod ang Panginoon

sa mga kabataan nilang lalaki,

at hindi niya kinakaawaan

ang kanilang mga ulilaʼt mga biyuda.

Sapagkat masama ang lahat

at hindi makadiyos;

nakakahiya ang lahat ng sinasabi nila.

Kaya hindi pa rin humuhupa

ang poot ng Panginoon,

at nakahanda pa

siyang magparusa sa kanila.

¹⁸Sapagkat ang kasamaan nila

ay tulad ng apoy

na tumutupok ng mga halamang

may tinik.

Naglalagablab itong tulad ng apoy

na tumutupok ng mga kahoy,

at ang makapal na usok

ay pumapailanlang.

¹⁹Dahil sa galit

ng Panginoon ng mga Hukbo,

masusunog ang buong lupain,

at magiging panggatong

sa apoy ang mga tao.

Hindi nila kahahabagan

kahit ang sarili nilang kababayan.

²⁰Anumang pagkain ang makita nila

ay kukunin nila at kakainin,

ngunit hindi pa rin sila mabubusog.

Kaya pati ang kanilang mga anak

ay kanilang kakainin.

²¹Mag-aaway ang mga taga-Manases

at ang mga taga-Efraim,

at lulusubin nilang dalawa ang Juda.

Subalit ang poot ng Panginoon

ay hindi pa rin humuhupa

at nakahanda pa

siyang magparusa sa kanila.