Job 12

Sumagot si Job

¹Sumagot si Job,

²“Ang akala nʼyo baʼy kayo lang

ang marunong

at wala nang matitirang marunong

kapag namatay kayo?

³Ako man ay marunong din

gaya ninyo;

hindi kayo nakahihigit sa akin.

Alam ko rin

ang lahat ng sinasabi ninyo.

⁴“Ngunit naging katawa-tawa ako

sa aking mga kaibigan,

kahit na matuwid ako

at walang kapintasan,

at kahit sinagot ng Diyos

ang mga dalangin ko noon.

⁵Ang mga taong naghihirap

na gaya ko

na tila mabubuwal

ay kinukutya ng mga taong

walang problema.

⁶Ngunit ang mga tulisan

at ang mga taong ginagalit ang Diyos

ay namumuhay nang payapa

gayong ang dinidiyos nilaʼy

ang sarili nilang kakayahan.

⁷“Ang mga hayop ay iyong tanungin

at ikaʼy kanilang tuturuan,

o di kayaʼy ang mga ibon sa himpapawid

at ikaʼy kanilang papayuhan.

⁸Kausapin mo ang lupa

at ikaʼy kanyang tuturuan,

o kayaʼy hayaan mong magpahayag saʼyo

ang mga isda sa karagatan.

⁹Sa lahat nang mga ito,

mayroon bang hindi nakakaalam?

Ang kamay ng Panginoon mismo

ang gumawa nito?

¹⁰Nasa kamay niya

ang buhay o hininga

ng bawat nilalang, pati na ng tao.

¹¹Kung alam ng dila ng tao

kung alin ang masarap

o hindi masarap na pagkain,

alam din ng tainga ng tao

kung alin ang mabuti

o masamang salita.

¹²Maraming alam sa buhay

ang matatanda,

dahil habang tumatagal

ang buhay nila,

lalong dumarami

ang kanilang nalalaman.

¹³“Ngunit ang Diyos

ay hindi lang nagtataglay

ng karunungan,

nasa kanya rin

ang kapangyarihan,

at siya lang ang nakakaunawa

kung ano ang dapat gawin.

¹⁴Walang makapag-aayos

ng kanyang sinisira,

at walang makapagpapalaya

sa kanyang ikinukulong.

¹⁵Kung pipigilin niya ang ulan,

matutuyo ang lupa,

at kung ibubuhos naman niya ito,

babahain ang lupa.

¹⁶Makapangyarihan siyaʼt matagumpay,

at nasa ilalim ng kanyang kapangyarihan

ang mandaraya at ang dinadaya.

¹⁷Inaalisan niya ng karunungan

ang mga tagapayo,

at ginagawang mangmang

ang mga hukom.

¹⁸Pinaaalis niya ang mga hari

sa kanilang trono at ipinabibihag.

¹⁹Tinatanggal niya sa tungkulin

ang mga pari

at ang mga taong

may kapangyarihan.

²⁰Pinatatahimik niya

ang mga pinagkakatiwalaang tagapayo

at inaalis ang karunungan ng matatanda.

²¹Hinahamak niya

ang mararangal na tao

at inaalisan ng kakayahan

ang mga may kapangyarihan.

²²Ang mga lihim ay kanyang inihahayag,

at ang madilim ay pinapalitan ng liwanag.

²³Pinalalakas niya ang mga bansa

at pinapalawak ang kanilang teritoryo,

ngunit ibinabagsak din niya ito

at winawasak.

²⁴Ginagawa niyang mangmang

ang kanilang mga pinuno

at inililigaw sila sa ilang.

²⁵Kaya para silang bulag

na nangangapa sa dilim

at susuray-suray na parang

mga lasing.”