Job 23

Sumagot si Job

¹Pagkatapos, sinabi ni Job,

²“Hanggang ngayoʼy labis pa rin

ang hinaing ko.

Pinahihirapan pa rin ako ng Diyos

sa kabila ng labis kong pagdaing.

³Kung alam ko lang

kung saan ko siya hahanapin;

kung makakapunta lang sana ako

sa kinaroroonan niya,

⁴sasabihin ko sa kanya ang aking kaso

at ilalahad ang aking katuwiran.

⁵Gusto kong malaman

kung ano ang isasagot niya sa akin

at gusto ko ring maintindihan

ang sasabihin niya.

⁶Makikipagtalo kaya siya sa akin

gamit ang kapangyarihan niya?

Hindi! Hindi niya iyon gagawin,

kundi pakikinggan niya ako.

⁷Ang taong matuwid na tulad ko

ay maaaring mangatuwiran

sa harap ng aking hukom,

at palalayain niya ako nang lubusan.

⁸“Akoʼy pumunta sa silangan,

ngunit wala siya roon;

pumunta ako sa kanluran,

ngunit hindi ko siya makita.

⁹Hindi ko siya natagpuan sa hilaga,

sapagkat siyaʼy nakakubli.

Hinanap ko siya sa timog,

ngunit siyaʼy natatakpan.

¹⁰Ngunit alam niya

ang aking ginagawa.

Pagkatapos niya akong subukan,

makikita niyang malinis ako

tulad ng purong ginto.

¹¹Sinunod ko ang kanyang

mga hakbang;

hindi ko ito sinuway.

¹²Sinusunod ko ang kanyang mga utos,

at iniingatan ko ito sa aking puso.

Pinahahalagahan ko ang mga salita niya

nang higit pa sa pang-araw-araw

kong pagkain.

¹³“Ngunit malaya ang Diyos

na gawin ang nais niyang gawin;

walang sinumang makahahadlang sa kanya.

¹⁴Kaya gagawin niya

ang binabalak niyang gawin sa akin,

at marami pa siyang planong

gagawin sa akin.

¹⁵Kaya natatakot ako sa kanya.

At kapag iniisip ko ito,

lalo akong natatakot.

¹⁶Pinahihina ng Diyos ang aking puso,

tinatakot ako ng Makapangyarihan.

¹⁷Ngunit hindi ako mananahimik

kahit na akoʼy pinapalibutan ng kadiliman,

kahit na akoʼy binabalot ng karimlan.