Job 34

¹Sinabi pa ni Elihu,

²“Kayong mga nagsasabing

marurunong at maraming nalalaman,

pakinggan ninyo akong mabuti.

³Sapagkat kung papaanong alam ng dila

ang masarap at hindi masarap na pagkain,

alam din ng tainga kung ano ang tama

at hindi tamang mga salita.

⁴Kaya alamin natin kung ano ang tama,

pag-aralan natin kung ano ang mabuti.

⁵“Sapagkat sinabi ni Job,

‘Wala akong kasalanan

ngunit hindi ako binigyan

ng Diyos ng katarungan.

⁶Kahit na matuwid ako,

itinuring akong sinungaling.

Kahit na wala akong

nagawang kasalanan,

binigyan niya ako ng karamdamang

walang kagalingan.’

⁷Walang taong katulad ni Job

na uhaw sa pangungutya.

⁸Ang gusto niyang makasama

ay masasama at makasalanang tao,

⁹dahil sinabi niya,

‘Walang pakinabang ang tao

kung magsisikap siyang

bigyan kasiyahan ang Diyos!’

¹⁰“Kaya makinig kayo sa akin,

kayong mga nagsasabing

kayo ay nakakaunawa.

Ang Diyos na Makapangyarihan

ay hindi gumagawa ng masama.

¹¹Ginagantihan niya ang tao

ayon sa mga ginawa nito;

pinakikitunguhan niya ang tao

ayon sa nararapat sa ugali nito.

¹²Tunay ngang hindi gagawa ng masama

ang Diyos na Makapangyarihan.

Hindi niya maaaring baluktutin

ang hustisya.

¹³May nagtalaga ba sa kanya

upang mamuno sa lupa?

May nagbilin ba sa kanya

upang mamahala sa buong sanlibutan?

¹⁴Kung loloobin ng Diyos

na kunin ang buhay

na ibinigay niya sa tao,

¹⁵lahat ng taoʼy mamamatay

at babalik sa lupa.

¹⁶“Job, kung ikaʼy may pang-unawa,

pakinggan mo ang sasabihin ko:

¹⁷Maaari ba namang mamuno ang Diyos

kung ayaw niya ng katarungan?

Hahatulan mo ba ang matuwid

at makapangyarihan?

¹⁸Hindi baʼt siya ang sumasaway

sa mga hari at pinunong masama

at walang kuwenta?

¹⁹Wala siyang itinatangi sa mga pinuno

at wala rin siyang pinapanigan,

mayaman man o mahirap,

dahil silang lahat ay pare-pareho niyang nilikha.

²⁰Kahit ang taong makapangyarihan

ay biglang mamamatay sa gabi

nang hindi ginagalaw ng tao.

²¹“Binabantayan ng Diyos

ang lahat ng ginagawa ng tao.

²²Walang madilim na lugar

na maaaring pagtaguan ng masama.

²³Hindi na kailangang

tawagin pa ng Diyos ang tao

upang humarap sa kanya

upang tanungin at hatulan.

²⁴Hindi na niya kailangang

imbestigahan pa ang taong namumuno

upang alisin ito sa katungkulan

at palitan ng iba.

²⁵Sapagkat alam niya

ang kanilang ginagawa,

inaalis niya sila sa kapangyarihan

at nililipol kahit gabi.

²⁶Hayagan niya silang pinaparusahan

dahil sa kanilang kasamaan.

²⁷Ginawa niya ito

dahil tumigil sila ng pagsunod sa kanya,

at binalewala ang kanyang pamamaraan.

²⁸Inaapi nila ang mga dukha,

at narinig ng Diyos

ang paghingi ng mga ito ng tulong.

²⁹Ngunit kahit na tumahimik

ang Diyos at magtago,

walang sinuman ang makapagsasabing

mali siya.

Ang totoo, binabantayan ng Diyos

ang tao at mga bansa,

³⁰upang patigilin ang pamumuno

ng mga hindi makadiyos,

para hindi nila mabitag mga tao.

³¹“Sakaling may magsabi sa Diyos,

‘Napagdusahan ko na ang aking kaparusahan;

hindi na ako muling gagawa ng kasalanan,’

³²o, ‘Sabihin nʼyo sa akin

ang kasalanan ko;

kung nagkasala ako,

hindi ko na ito muling gagawin.’

³³Papaano sasagutin ng Diyos

ang kahilingan mo kung hindi ka magsisisi?

Ikaw ang magpapasya nito

at hindi ako.

Kaya sabihin mo sa akin

kung ano ang pasya mo.

³⁴“Ang mga taong marurunong

at may pang-unawa,

na nakikinig sa akin,

³⁵ay makapagsasabing ang mga sinasabi mo Job

ay kamangmangan at walang kabuluhan.

³⁶Dapat ka ngang lubusang subukin, Job,

dahil nagsasalita kang tulad

ng isang masamang tao.

³⁷Dinadagdagan mo pa ang kasalanan mo

dahil sa paghihimagsik mo sa Diyos.

Minamasama moʼt kinukutya

ang Diyos sa harap namin.”