Job 40

¹Sinabi pa ng Panginoon kay Job,

²“Makikipagtalo ka pa rin ba sa akin,

ako na Diyos na Makapangyarihan?

Sinasabi mong nagkamali ako.

Ngayon, sagutin mo ako.”

³Kaya sinagot ni Job ang Panginoon ,

⁴“Hindi po ako karapat-dapat

na sumagot sa inyo.

Tatahimik na lamang po ako.

⁵Marami na akong nasabi,

kaya hindi na po ako magsasalita.”

⁶At sinagot ng Panginoon si Job mula sa ipuipo,

⁷“Ihanda mo ang iyong sarili,

at sagutin mo ang mga tanong ko.

⁸“Gusto mo bang patunayan na mali ako

upang palabasin na ikaw ang tama?

⁹Ang kamay mo baʼy makapangyarihan

tulad ng sa Diyos?

Dadagundong ba ang boses mo

tulad ng sa kanya?

¹⁰Kung magagawa mo iyan,

patunayan mo na ikaw nga

ay makapangyarihan, marangal at dakila.

¹¹Ipakita mo ang matindi mong galit

sa taong mayayabang at ibagsak sila.

¹²Wasakin mo ang taong masasama

sa kanilang kinatatayuan.

¹³Ilibing mo silang lahat sa lupa,

sa lugar ng mga patay.

¹⁴Kapag nagawa mo ang mga ito,

ako ang pupuri sa iyo

at tatanggapin kong may kakayahan ka

na iligtas ang iyong sarili.

¹⁵“Tingnan mo ang Behemot,[#40:15 : Maaaring isang elepante o hipopotamus o dambuhalang hayop panlupa.]

nilalang ko rin siya katulad mo.

Kumakain ito ng damo na tulad ng baka,

¹⁶ngunit napakalakas nito,

at napakatibay ng katawan.

¹⁷Ang buntot niyaʼy

tuwid na tuwid

na parang kahoy ng sedro,

at ang mga hitaʼy matipuno.

¹⁸Ang mga buto nitoʼy

tulad ng tubong tanso o bakal.

¹⁹Kahanga-hanga siya sa lahat

ng aking nilalang.

Ngunit ako na Manlilikha niya

ay hindi niya matatalo.

²⁰Nanginginain siya sa mga kabundukan

habang naglalaro ang mga hayop sa gubat

malapit sa kanya.

²¹Nagpapahinga siya

sa matitinik na halamang

natatabunan ng talahib.

²²Ang mga halamang matinik

at ang iba pang mga punongkahoy

sa tabi ng batis

ay nagiging kanlungan niya.

²³Hindi siya natatakot

kahit na rumaragasa

ang tubig sa ilog.

Tahimik pa rin siya

kahit halos natatabunan na siya

ng tubig ng Ilog Jordan.

²⁴Sino ang makakahuli sa kanya

sa pamamagitan ng pagbulag sa kanya?

Sino ang makakabitag sa kanya

at makakakawit sa ilong niya?