Josue 10

Natalo ng Israel ang mga Hari sa Timog

¹Nabalitaan ni Haring Adoni-zedek ng Jerusalem na inagaw ni Josue ang Ai at nilipol nang lubusan at pinatay ang hari nito, gaya ng ginawa niya sa Jerico at sa hari nito. Nabalitaan din niya na ang mga taga-Gibeon ay nakipagkaibigan na sa mga Israelita at namuhay kasama nila.

²Natakot siya at ang mga tao sa kanyang nasasakupan dahil alam niya na ang Gibeon ay isang makapangyarihang lungsod na may sarili ring hari. Mas malaki pa ito sa Ai at ang mga sundalo nitoʼy mahuhusay makipaglaban.

³Kaya nagpadala ng mensahe si Haring Adoni-zedek ng Jerusalem kina Haring Hoham ng Hebron, Haring Piram ng Jarmut, Haring Jafia ng Laquis, at Haring Debir ng Eglon.

⁴Ito ang mensahe niya, “Tulungan nʼyo akong lusubin ang Gibeon dahil nakipagkaibigan ito kay Josue at sa mga Israelita.”

⁵Kaya nagkaisa ang limang hari ng mga Amoreo: ang hari ng Jerusalem, Hebron, Jarmut, Laquis at Eglon. Tinipon nila ang mga sundalo nila at nilusob ang Gibeon.

⁶Nagsugo agad ng mensahero ang mga taga-Gibeon kay Josue sa kampo nito sa Gilgal. Sinabi nila, “Huwag nʼyo kaming pabayaan, kaming mga lingkod ninyo. Pumunta po kayo agad dito at iligtas kami. Tulungan nʼyo kami dahil pinagtutulungan kami ng lahat ng hari ng mga Amoreo na nakatira sa mga kabundukan.”

⁷Kaya umalis si Josue sa Gilgal kasama ang lahat ng sundalo niya, pati ang lahat ng mahuhusay na mandirigma.

⁸Sinabi ng Panginoon kay Josue, “Huwag kang matakot sa kanila. Ipapasakamay ko sila saʼyo. Wala kahit isa sa kanila ang makakatalo sa iyo.”

⁹Buong gabing naglakad sina Josue mula sa Gilgal, at bigla silang lumusob sa mga kalaban na walang kamalay-malay.

¹⁰Sinindak ng Panginoon ang mga kalaban nang makaharap nila ang mga Israelita, at marami sa kanila ang pinatay doon sa Gibeon. Ang iba sa kanilaʼy hinabol at pinatay sa daang paakyat sa Bet-horon hanggang sa Azeka at Makeda.

¹¹Patuloy ang paghabol sa kanila ng mga Israelita habang bumababa sila galing sa Bet-horon. At nang papunta sila sa Azeka, pinaulanan sila ng Panginoon ng malalaking yelo at namatay sila. Mas marami pang namatay sa kanila sa yelo kaysa sa espada ng mga Israelita.

¹²Nang araw na pinagtagumpay ng Panginoon ang mga Israelita laban sa mga Amoreo, nanalangin si Josue sa Panginoon . Pagkatapos, sinabi niya habang nakikinig ang mga Israelita, “Araw, tumigil ka sa taas ng Gibeon! Ikaw naman buwan, tumigil ka sa taas ng Lambak ng Ayalon.”

¹³Kaya tumigil ang araw at ang buwan hanggang sa natalo nang lubusan ng mga Israelita ang mga kalaban nila.

Ang pangyayaring ito ay nakasulat sa Aklat ni Jashar. Tumigil ang araw sa gitna ng langit, at hindi ito lumubog sa buong araw.

¹⁴Hindi pa nagkaroon ng ganitong pangyayari bago noon o simula noon, na dininig ng Panginoon ang isang tao. Tunay ngang nakikipaglaban ang Panginoon para sa Israel!

¹⁵Pagkatapos, bumalik si Josue at ang lahat ng mga Israelita sa kampo nila sa Gilgal.

Pinatay ang Limang Hari ng mga Amoreo

¹⁶Nakatakas ang limang hari at nagtago sa kuweba sa Makeda.

¹⁷Ngunit may nakakita sa kanila na doon sila nagtatago, at sinabi nila ito kay Josue.

¹⁸Kaya sinabi ni Josue, “Tabunan nʼyo ng malalaking bato ang bukana ng kuweba at pabantayan ninyo.

¹⁹Ngunit huwag kayong manatili roon kundi habulin nʼyo at lusubin ang mga naiwang kalaban. Siguraduhin ninyong hindi sila makakapasok sa mga lungsod nila. Dahil ibibigay sila sa inyo ng Panginoon na inyong Diyos.”

²⁰Naubos sana ni Josue at ng mga Israelita ang mga kalaban nila. Ngunit mayroon ding nakaligtas at nakapasok sa mga napapaderang lungsod nito.

²¹At bumalik ang lahat ng sundalo kay Josue sa kampo nila sa Makeda. Mula noon, wala nang nagtangkang magsalita laban sa mga Israelita.

²²At nag-utos si Josue, “Buksan nʼyo ang kuweba at dalhin dito sa akin ang limang hari.”

²³Kaya pinalabas nila sa kuweba ang limang hari: ang hari ng Jerusalem, Hebron, Jarmut, Laquis at Eglon.

²⁴Nang madala na ang limang hari kay Josue, tinipon ni Josue ang lahat ng mga Israelita at sinabi niya sa mga kumander ng mga sundalo niya, “Halikayo, at tapakan nʼyo ang leeg ng mga haring ito.” Kaya lumapit sila at tinapakan nila ang leeg ng mga haring iyon.

²⁵Sinabi sa kanila ni Josue, “Huwag kayong matakot o kayaʼy panghinaan ng loob. Magpakatatag kayo at magpakatapang. Ito ang gagawin ng Panginoon sa lahat ng kalaban ninyo.”

²⁶At pinatay ni Josue ang limang hari at ipinabitin sa limang puno hanggang hapon.

²⁷Nang lumubog na ang araw, ipinakuha ni Josue ang mga bangkay nila at ipinatapon sa kuweba na pinagtaguan nila. Tinakpan nila ang bunganga ng kuweba ng malalaking bato na hanggang ngayon ay naroon pa.

Ang Pagsakop sa mga Lungsod sa Timog

²⁸Nang araw na iyon, sinakop ni Josue ang Makeda. Pinapatay niya ang lahat ng naninirahan dito, pati na ang hari nito. Nilipol niya ito nang lubusan, at walang naiwang buhay. Ginawa ni Josue sa hari ng Makeda ang ginawa rin niya sa hari ng Jerico.

²⁹Mula sa Makeda, pumunta si Josue at ang mga Israelita sa Libna at nilusob ito.

³⁰Ipinasakamay ng Panginoon sa Israel ang lungsod at ang hari nito. Pinatay nila ang lahat ng naninirahan dito, at walang naiwang buhay. Ginawa ni Josue sa hari ng Libna ang ginawa niya sa hari ng Jerico.

³¹Mula sa Libna, pumunta si Josue at ang mga Israelita sa Laquis. Pinalibutan nila ito at nilusob.

³²Ibinigay ng Panginoon ang Laquis sa mga Israelita sa ikalawang araw ng labanan. Gaya ng ginawa nila sa Libna, pinatay din nila ang lahat ng naninirahan sa Laquis.

³³Habang nilulusob nila ang Laquis, si Haring Horam ng Gezer at ang mga sundalo nito ay tumulong sa Laquis, pero natalo sila ni Josue, at walang naiwang buháy sa kanila.

³⁴Mula sa Laquis, pumunta si Josue at ang mga Israelita sa Eglon. Pinalibutan din nila ito at nilusob.

³⁵Sa mismong araw na iyon, nasakop nila ang Eglon at pinatay ang lahat ng naninirahan dito. Nilipol nila ito nang lubusan gaya ng ginawa nila sa Laquis.

³⁶Mula sa Eglon, umahon si Josue at ang mga Israelita sa Hebron at nilusob ito.

³⁷Sinakop nila ang lungsod, at pinatay nila ang hari at ang lahat ng naninirahan dito, pati na ang mga tao sa karatig baryo. Walang naiwang buhay. Winasak nila nang lubusan ang buong lungsod gaya ng ginawa nila sa Eglon.

³⁸Pagkatapos nito, bumalik si Josue at ang mga Israelita at lumusob sa Debir.

³⁹Inagaw nila ang lungsod at pinatay ang hari at ang lahat ng naninirahan dito, pati ang mga tao sa karatig baryo. Nilipol nila ito nang lubusan, at walang naiwang buhay. Ang ginawa nila sa Hebron at Libna at sa mga hari nito ay ginawa rin nila sa Debir at sa hari nito.

⁴⁰Sinakop nga ni Josue ang buong lupain – ang mga kabundukan, ang Negeb, ang kaburulan sa kanluran at mga libis, pati na ang mga hari nito. Nilipol nang lubusan nina Josue ang lahat ng naninirahan dito, at walang naiwang buhay. Ginawa nila ito ayon sa utos ng Panginoon , ang Diyos ng Israel.[#10:40 : Tingnan ang talababa sa 9:1.]

⁴¹Sinakop ni Josue ang mga lugar mula sa Kades-barnea hanggang sa Gaza, at mula sa buong lupain ng Goshen hanggang sa Gibeon.

⁴²Sinakop ni Josue ang lahat ng lupain at ang mga hari nito sa minsanang paglusob lamang, dahil ang Panginoon , ang Diyos ng Israel, ang tumulong sa kanila sa pakikipaglaban.

⁴³Pagkatapos, bumalik si Josue at ang lahat ng Israelita sa kampo nila sa Gilgal.