Mateo 15

Ang mga Nakapagpaparumi sa Tao

¹Pagkatapos noon, lumapit kay Hesus ang ilang mga Pariseo at mga tagapagturo ng Kautusan galing sa Jerusalem. Tinanong nila si Hesus,

²“Bakit nilalabag ng iyong mga alagad ang kaugalian ng ating mga ninuno? Hindi sila naghuhugas ng kamay bago kumain.”

³Sumagot si Hesus, “At kayo din naman, bakit ninyo nilalabag ang utos ng Diyos dahil sa inyong mga tradisyon?

⁴Halimbawa, sinabi ng Diyos, ‘Igalang ninyo ang inyong mga magulang,’ at ‘Ang lumalapastangan sa kanyang mga magulang ay dapat patayin.’[#15:4 Exo. 20:12; Deu. 5:16.; #15:4 Exo. 21:17; Lev. 20:9.]

⁵Ngunit itinuturo naman ninyo na kapag sinabi ng isang anak sa kanyang mga magulang na ang tulong na ibibigay niya sana sa kanila ay nakalaan na sa Diyos,

⁶hindi na niya kailangang tumulong sa kanila. Pinawawalang-halaga ninyo ang utos ng Diyos dahil sa inyong mga tradisyon.

⁷Mga pakitang-tao! Tamang-tama ang sinabi ng Diyos tungkol sa inyo sa pamamagitan ni Isaias:

⁸‘Iginagalang ako ng mga taong ito sa mga labi lang nila,

ngunit malayo sa akin ang kanilang mga puso.

⁹Ang pagsamba nila sa akiʼy walang kabuluhan;

pawang tuntunin ng tao ang kanilang katuruan.’ ”

¹⁰Tinawag ni Hesus ang mga tao at sinabi sa kanila, “Makinig kayo at unawain ang sasabihin ko.

¹¹Hindi ang pumapasok sa bibig ng tao ang nagpaparumi sa kanya kundi ang mga lumalabas dito.”

¹²Pagkatapos ay lumapit sa kanya ang mga alagad at tinanong siya, “Alam nʼyo po bang nasaktan ang mga Pariseo dahil sa mga sinabi ninyo?”

¹³Sumagot siya, “Lahat ng halamang hindi itinanim ng aking Amang nasa langit ay bubunutin.

¹⁴Hayaan ninyo sila. Sila ay mga bulag na taga-akay. Kung ang bulag ang aakay sa kapwa niya bulag, pareho silang mahuhulog sa hukay.”

¹⁵Sumagot si Pedro, “Pakipaliwanag nʼyo po sa amin ang paghahalintulad na sinabi nʼyo kanina.”

¹⁶Sinabi ni Hesus sa kanila, “Hindi pa rin ba ninyo naintindihan?

¹⁷Hindi ba ninyo alam na ang lahat ng pumapasok sa bibig ay napupunta sa tiyan at pagkatapos ay lumalabas sa katawan?

¹⁸Ngunit ang mga salitang lumalabas sa bibig ng isang tao ay nagmumula sa puso, at ang mga ito ang nagpaparumi sa kanya.

¹⁹Sapagkat sa puso ng tao nagmumula ang masasamang pag-iisip na nagtutulak sa kanya para pumatay, mangalunya, gumawa ng seksuwal na imoralidad, magnakaw, magsinungaling at manira ng kapwa.

²⁰Ang mga bagay na ito ang nakapagpaparumi sa isang tao. Ngunit ang kumain nang hindi naghuhugas ng kamay ay hindi nakapagpaparumi sa tao.”

Ang Pananampalataya ng Babaeng Hentil

²¹Umalis si Hesus mula roon at pumunta sa mga lugar na malapit sa Tiro at Sidon.

²²May isang babaeng Cananeo na naninirahan doon. Lumapit siya kay Hesus at nagmakaawa. Sinabi niya, “Panginoon, Anak ni David, maawa po kayo sa akin! Sinasapian po ng demonyo ang anak kong babae at labis siyang pinahihirapan nito.”

²³Ngunit hindi sumagot si Hesus. Kaya lumapit sa kanya ang kanyang mga alagad at sinabi, “Paalisin nʼyo na po ang babaeng iyan, dahil sunod siya nang sunod sa atin at nag-iingay.”

²⁴Sinabi ni Hesus sa babae, “Sinugo ako para lang sa mga Israelita na parang mga tupang naliligaw.”

²⁵Ngunit lumapit pa ang babae kay Hesus at lumuhod sa harap niya, at sinabi, “Panginoon, tulungan nʼyo po ako!”

²⁶Sinagot siya ni Hesus, “Hindi tamang kunin ang pagkain ng mga anak at ihagis sa mga aso.”

²⁷Sumagot naman ang babae, “Tama po kayo, Panginoon, ngunit kahit ang mga aso ay kumakain ng mga tirang nahuhulog mula sa mesa ng kanilang amo.”

²⁸At sinabi sa kanya ni Hesus, “Napakalaki ng iyong pananampalataya! Matutupad ang hinihiling mo.” At sa sandaling iyon ay gumaling ang anak ng babae.

Pinakain ni Hesus ang Apat na Libo

²⁹Mula roon, pumunta si Hesus sa tabi ng Lawa ng Galilea. Pagkatapos, umakyat siya sa bundok at naupo roon.

³⁰Maraming tao ang pumunta sa kanya na may dalang mga pilay, bulag, paralitiko, pipi, at marami pang mga may sakit. Inilapit sila sa paanan ni Hesus at pinagaling niya silang lahat.

³¹Namangha nang husto ang mga tao nang makita nilang nakakapagsalita ang mga pipi, gumaling ang mga paralitiko, nakakalakad ang mga pilay, at nakakakita ang mga bulag. Kaya pinuri nila ang Diyos ng Israel.

³²Tinawag ni Hesus ang kanyang mga alagad at sinabi, “Naaawa ako sa mga taong ito. Tatlong araw ko na silang kasama at wala na silang makain. Ayaw kong pauwiin sila nang gutom at mahihilo sila sa daan.”

³³Sumagot ang kanyang mga alagad, “Saan po tayo kukuha ng sapat na pagkain dito sa ilang para sa ganito karaming tao?”

³⁴Tinanong sila ni Hesus, “Ilan ang tinapay nʼyo diyan?”

Sinabi nila, “Pito po, at ilang maliliit na isda.”

³⁵Pinaupo ni Hesus ang mga tao.

³⁶Kinuha niya ang pitong tinapay at ang mga isda at nagpasalamat sa Diyos. Pagkatapos, hinati-hati niya ang pagkain at ibinigay sa kanyang mga alagad, at ipinamigay naman nila ito sa mga tao.

³⁷Kumain silang lahat at nabusog. Pagkatapos, inipon nila ang mga natirang pagkain at nakapuno sila ng pitong basket.

³⁸Ang bilang ng mga lalaking kumain ay mga apat na libo maliban pa sa mga babae at mga bata.

³⁹Matapos pauwiin ni Hesus ang mga tao, sumakay siya sa bangka at pumunta sa lupain ng Magadan.