Kawikaan 2

Ang Kahalagahan ng Karunungan

¹Anak, tanggapin at ingatan mo sa iyong puso

ang mga itinuturo at iniuutos ko sa iyo.

²Pakinggan mo kung ano

ang makapagbibigay sa iyo

ng karunungan at kaalaman.

³Manawagan ka

upang ikaʼy maging marunong,

at magsumamo ka

upang ikaʼy makaunawa

⁴na parang naghahanap ka ng pilak

o anumang nakatagong kayamanan.

⁵Kung gagawin mo ito, malalaman mo

kung ano ang pagkatakot sa Panginoon

at mauunawaan mo ang tungkol sa kanya.

⁶Sapagkat ang Panginoon

ang nagbibigay ng karunungan,

kaalaman, at ng pang-unawa.

⁷Pinagtatagumpay niya

ang taong matuwid,

siyaʼy kalasag

ng mga walang kapintasan.

⁸Sapagkat siya ang nagbabantay

sa kanilang daraanan,

at ang kanilang landas

ay kanyang iingatan.

⁹Sa gayoʼy mauunawaan mo

kung ano ang tama at mali,

kung alin ang makatarungan,

at masusunod mo ang daang mabuti

para sa iyo.

¹⁰Sapagkat lalong lalawak

ang iyong karunungan

at magbibigay ito sa iyo

ng kaligayahan.

¹¹Kapag nakakaunawa ka

at marunong magpasya nang tama,

iingatan ka nito.

¹²Ilalayo ka ng karunungan

sa masamang pag-uugali

at sa mga taong nagsasalita

ng masama.

¹³Pinili ng mga taong ito na iwanan

ang magandang pag-uugali

at sumunod sa pamamaraan

ng mga nasa kadiliman.

¹⁴Natutuwa sila sa paggawa ng masama

at nasisiyahan sa mga kalikuan nito.

¹⁵Masama ang pag-uugali nila

at hindi matuwid ang kanilang pamumuhay.

¹⁶Ilalayo ka ng karunungan

sa masamang babae

na gustong umakit sa iyo

sa pamamagitan ng kanyang

matatamis na salita.

¹⁷Iniwan ng ganyang babae

ang napangasawa niya

noong kanyang kabataan.

Kinalimutan niya

ang pangako niya sa Diyos

nang silaʼy ikasal.

¹⁸Kapag pumunta ka sa kanyang tahanan,

didiretso ka sa iyong kamatayan,

dahil ito ang daan patungo sa libingan.

Sapagkat ito ang daan

tungo sa daigdig ng mga patay.

¹⁹Kung sino man ang pupunta sa kanya

ay hindi na makakauwi;

makakalimutan na niya ang daan

patungo sa lugar ng mga buháy.

²⁰Kaya tularan mo

ang pamumuhay ng mabubuting tao

at mamuhay ka nang matuwid.

²¹Sapagkat ang taong namumuhay

nang matuwid at walang kapintasan

ay mabubuhay nang matagal

dito sa daigdig.

²²Ngunit ang masasamâ

ay palalayasin.

Bubunuting parang

ugat ang mga taksil.