Salmo 103

Salmo 103

¹Pupurihin ko ang Panginoon !

Buong buhay kong pupurihin

ang kanyang kabanalan.

²Pupurihin ko ang Panginoon ,

at hindi kalilimutan

ang kanyang kabutihan.

³Pinatatawad niya

ang lahat kong kasalanan,

at pinagagaling

ang lahat kong karamdaman.

⁴Inililigtas niya ako

sa kapahamakan,

at pinagpapala ng kanyang pag-ibig at habag.

⁵Pinagkakalooban niya ako

ng mga mabubuting bagay

habang akoʼy nabubuhay.

Kaya akoʼy parang nasa

aking kabataan

at malakas tulad ng agila.

⁶Ang Panginoon ay matuwid

sa paghatol;

binibigyang-katarungan ang lahat ng inaapi.

⁷Ipinahayag niya kay Moises

ang kanyang pamamaraan,

at inihayag sa mamamayan ng Israel

ang kanyang mga gawang

makapangyarihan.

⁸Ang Panginoon ay mahabagin

at matulungin,

hindi madaling magalit

at sagana sa pagmamahal.

⁹Hindi siya palaging nanunumbat,

at hindi nananatiling galít.

¹⁰Hindi niya tayo pinarurusahan

ayon sa ating mga kasalanan.

Hindi niya tayo ginagantihan

batay sa ating pagkukulang.

¹¹Dahil kung gaano man kalaki

ang agwat ng langit sa lupa,

ganoon din kalaki ang pag-ibig ng Diyos

sa mga may takot sa kanya.

¹²Kung gaano kalayo

ang silangan sa kanluran,

ganoon din niya inilalayo sa atin

ang ating mga kasalanan.

¹³Kung paanong ang ama ay nahahabag

sa kanyang mga anak;

ganoon din ang pagkahabag ng Panginoon

sa mga may takot sa kanya.

¹⁴Sapagkat alam niya ang ating kahinaan,

alam niyang tayoʼy mula

sa alabok lamang.

¹⁵Ang buhay ng tao

ay tulad ng damo.

Tulad ng bulaklak sa parang,

itoʼy lumalago.

¹⁶At kapag umiihip ang hangin,

itoʼy nawawala at hindi na nakikita.

¹⁷Ngunit ang pag-ibig ng Panginoon

ay walang hanggan

sa sinumang may takot sa kanya;

ang matuwid niyang gawa

ay wala ring katapusan.

¹⁸Ang magkakamit nitoʼy ang tapat

sa kasunduan,

at tapat na sumusunod

sa kanyang kautusan.

¹⁹Itinatag ng Panginoon

ang kanyang trono

sa kalangitan,

at siyaʼy naghahari sa lahat.

²⁰Purihin ninyo ang Panginoon ,

kayong mga anghel niya,

na nakikinig at sumusunod

sa kanyang mga salita.

²¹Purihin ninyo ang Panginoon ,

kayong lahat na mga nilalang niya

sa langit, na naglilingkod sa kanya

at sumusunod

sa kanyang kalooban.

²²Purihin ninyo ang Panginoon ,

kayong lahat na mga nilalang niya

sa lahat ng dako

na kanyang pinaghaharian.

Purihin ang Panginoon !