Salmo 105

Salmo 105

¹Pasalamatan nʼyo ang Panginoon .

Sambahin nʼyo siya!

Ihayag sa mga tao ang kanyang mga ginawa.

²Awitan nʼyo siya ng mga papuri;

ihayag ang lahat ng kamangha-mangha niyang mga gawa.

³Purihin nʼyo ang kanyang banal na pangalan.

Magalak kayo, kayong mga lumalapit sa Panginoon .

⁴Magtiwala kayo sa Panginoon ,

at sa kanyang kalakasan.

Palagi kayong dumulog sa kanya.

^5-6Kayong mga lahi ni Abraham na lingkod ng Diyos,

at mga lahi rin ni Jacob na kanyang hinirang,

alalahanin ninyo ang kahanga-hanga niyang mga gawa,

mga himala, at ang kanyang paghatol.

⁷Siya ang Panginoon na ating Diyos,

siya ang humahatol sa buong mundo.

⁸Hindi siya makakalimot sa kanyang pangako kailanman;

ang kanyang pangako para sa maraming salinlahi

⁹ang pangako niya kay Abraham,

gayon din kay Isaac.

¹⁰Ipinagpatuloy niya ang kasunduang ito kay Jacob,

at magpapatuloy ito magpakailanman.

¹¹Sinabi niya sa bawat isa sa kanila,

“Ibibigay ko sa iyo ang lupain ng Canaan

bilang pamana ko sa iyo at sa iyong mga angkan.”

¹²Nooʼy iilan pa lang

ang mga mamamayan ng Diyos,

at mga dayuhan pa lang sila

sa lupain ng Canaan.

¹³Nagpalipat-lipat sila sa mga bansa

at mga kaharian.

¹⁴Ngunit hindi pinahintulutan ng Diyos

na apihin sila.

Bilang proteksyon sa kanila

ay sinaway niya ang mga hari.

¹⁵Sinabi niya,

“Huwag ninyong galawin ang hinirang

kong mga lingkod,

huwag ninyong saktan

ang aking mga propeta.”

¹⁶Nagpadala ang Diyos ng taggutom

sa lupain ng Canaan.

Kinuha niyang lahat

ang kanilang pagkain.

¹⁷Ngunit may pinauna na siya sa Ehipto

na tutulong sa kanila.

Si Jose na ipinagbili roon

bilang alipin.

¹⁸Kinadenahan ang kanyang mga paa

at nilagyan ng bakal ang kanyang leeg,

¹⁹hanggang sa nangyari

ang kanyang propesiya.

Ang mga sinabi ng Panginoon na naganap sa kanya

ay nagpatunay na siyaʼy matuwid.

²⁰Pinalaya siya ng hari ng Ehipto

na namamahala sa maraming tao,

²¹at ginawa siyang tagapamahala

ng kanyang palasyo at mga ari-arian.

²²Bilang tagapamahala,

may kapangyarihan siyang turuan

ang mga pinuno sa nasasakupan ng hari

pati ang kanyang mga tagapayo.

²³Pagkatapos, pumunta si Jacob

at ang kanyang pamilya sa Ehipto,

na lupain ng mga lahi ni Ham,

at doon sila nanirahan bilang dayuhan.

²⁴Pinarami ng Panginoon

ang kanyang mga mamamayan,

at naging makapangyarihan kaysa

sa mga Ehipsiyo na kanilang kaaway.

²⁵Pinahintulutan ng Panginoon na galitin

at lokohin ng mga Ehipsiyo

ang mga mamamayan na kanyang lingkod.

²⁶Sinugo niya si Moises na kanyang lingkod

at si Aaron na kanyang hinirang.

²⁷Ipinakita nila sa lupain ng mga lahi ni Ham

ang mga himala na ginawa ng Diyos.

²⁸Pinadilim ng Diyos ang lupain ng Ehipto,

ngunit sumuway pa rin sila sa kanyang mga utos.

²⁹Ginawa niyang dugo ang kanilang mga tubig,

kaya namatay ang kanilang mga isda.

³⁰Napuno ng palaka ang kanilang lupain,

at pinasok pati ang mga silid ng kanilang mga pinuno.

³¹Nag-utos ang Diyos,

at dumating sa kanilang lupain

ang napakaraming niknik at lamok.

³²Sa halip na ulan ang ibinigay sa kanilang lupain,

yelo ang bumagsak na may kasamang mga kidlat.

³³Sinira niya ang tanim nilang mga ubas, mga puno ng igos,

at iba pang mga punongkahoy.

³⁴Sa kanyang utos, dumating ang mga balang,

at mga tipaklong na hindi mabilang.

³⁵At kinaing lahat ang kanilang mga tanim,

pati ang mga bunga nito.

³⁶Pinatay ng Diyos ang lahat nilang panganay na lalaki.

³⁷Pagkatapos nito, pinalabas niya ang mga taga-Israel

sa lupain ng Ehipto na wala ni isa mang napahamak,

at may dala pa silang mga pilak at ginto.

At sa kanilaʼy wala ni isa mang napahamak.

³⁸Natuwa ang mga Ehipsiyo

nang umalis ang mga taga-Israel,

dahil takot sila sa kanila.

³⁹Naglagay ang Diyos ng ulap na lililim sa kanila

at kung gabi namaʼy apoy

upang magbigay sa kanila ng liwanag.

⁴⁰Ang mga taoʼy humingi ng makakain,

at pinadalhan sila ng Diyos ng mga pugo,

at binusog niya sila ng pagkaing

mula sa langit.

⁴¹Pinabitak niya ang bato at bumukal ang tubig.

Umagos ito na parang ilog sa tuyong lupa.

⁴²Ang lahat ng ito ay ginawa ng Diyos

dahil hindi niya kinalimutan ang kanyang pangako

kay Abraham na kanyang lingkod.

⁴³Pinalabas niya sa Ehipto

ang kanyang mga mamamayan

na masayang-masaya at sumisigaw sa kagalakan.

⁴⁴Ibinigay niya sa kanila

ang mga lupain ng ibang bansa;

ipinamana sa kanila ang pinaghirapan ng iba

⁴⁵upang sundin nila ang kanyang

mga tuntunin at kautusan.

Purihin ang Panginoon !