Salmo 106

Salmo 106

¹Purihin nʼyo ang Panginoon !

Magpasalamat kayo sa kanya

dahil siyaʼy mabuti;

ang kanyang pag-ibig ay walang hanggan.

²Walang makapagsasabi

at makapagpupuri nang lubos

sa makapangyarihang gawa ng Panginoon .

³Mapalad ang taong gumagawa nang tama

at matuwid sa lahat ng panahon.

⁴Panginoon , alalahanin nʼyo ako

kapag tinulungan nʼyo na ang inyong mga mamamayan;

iligtas nʼyo rin ako kapag iniligtas nʼyo na sila,

⁵upang akoʼy maging bahagi rin ng kaunlaran ng inyong bansang hinirang,

at makadama rin ng kanilang kagalakan,

at maging kasama nila sa pagpupuri sa inyo.

⁶Kami ay nagkasala sa inyo katulad ng aming mga ninuno;

masama ang aming ginawa.

⁷Nang silaʼy nasa Ehipto, hindi nila pinansin

ang kahanga-hangang mga ginawa ninyo.

Nilimot nila ang mga kabutihang

ipinakita nʼyo sa kanila,

at silaʼy naghimagsik sa inyo doon sa Dagat na Pula.

⁸Ngunit iniligtas nʼyo pa rin sila,

para kayo ay maparangalan

at maipakita ang inyong kapangyarihan.

⁹Inutusan ng Panginoon ang Dagat na Pula,

at ito ay natuyo;

pinangunahan niya ang kanyang mga mamamayan

na makatawid na parang lumalakad lamang sa disyerto.

¹⁰Iniligtas niya sila sa kanilang mga kaaway.

¹¹Tinabunan niya ng tubig

ang kanilang mga kaaway,

at walang sinumang nakaligtas sa kanila.

¹²Kaya naniwala sila sa kanyang mga pangako,

at umawit sila ng mga papuri sa kanya.

¹³Ngunit muli nilang kinalimutan

ang kanyang mga ginawa,

at hindi na nila hinintay

ang kanyang mga payo.

¹⁴Doon sa ilang, sinubok nila ang Diyos

dahil sa labis nilang pananabik sa pagkain.

¹⁵Kaya ibinigay niya sa kanila ang kanilang hinihiling,

ngunit binigyan din sila ng karamdaman

na nagpahina sa kanila.

¹⁶Sa kanilang kampo, nainggit sila

kay Moises at kay Aaron

na itinalagang maglingkod sa Panginoon .

¹⁷Kaya bumuka ang lupa sa kinaroroonan ni Datan at ni Abiram

at ng kanilang sambahayan

at silaʼy nilamon.

¹⁸At may apoy pang naging kasunod

na tumupok sa kanilang masasamang tagasunod.

¹⁹Doon sa Horeb ay gumawa

ang mga taga-Israel ng gintong baka

at sinamba nila ang diyos-diyosang ito.

Itoʼy ginawa nilang diyos at kanilang sinamba.

²⁰Ang kanilang dakilang Diyos ay pinalitan nila

ng imahen ng toro na kumakain ng damo.

^21-22Kinalimutan nila ang Diyos na nagligtas sa kanila

at gumawa ng mga kamangha-manghang bagay at himala doon sa Ehipto

na lupain ng mga lahi ni Ham,

at doon sa Dagat na Pula.

²³Nilipol na sana ng Diyos ang kanyang

mga mamamayan

kung hindi namagitan si Moises na kanyang lingkod.

Nakiusap si Moises na huwag sana niyang ituloy

na iparanas ang kanyang galit

upang hindi sila malipol.

²⁴Tinanggihan nila ang magandang lupain

dahil hindi sila naniwala sa pangako ng Diyos sa kanila.

²⁵Nagsipagreklamo sila sa loob ng kanilang mga tolda

at hindi sumunod sa Panginoon .

²⁶Kaya sumumpa siya na papatayin niya sila doon sa ilang,

²⁷at ikakalat ang kanilang mga angkan

sa ibang mga bansa

at nang doon na sila mamatay.

²⁸Inihandog nila ang kanilang mga sarili

sa diyos-diyosang si Baal doon sa bundok ng Peor,

at kumain sila ng mga handog

na inialay sa mga patay.

²⁹Ginalit nila ang Panginoon

dahil sa kanilang masasamang gawa,

kaya dumating sa kanila ang salot.

³⁰Ngunit namagitan si Finehas,

kaya tumigil ang salot.

³¹Ang ginawang iyon ni Finehas ay ibinilang na matuwid,

at itoʼy hindi makakalimutan ng mga tao magpakailanman.

³²Doon sa Bukal sa Meriba, ginalit ng mga taga-Israel ang Panginoon ,

kaya nalagay sa gipit si Moises dahil sa kanila;

³³Sapagkat ginalit nila si Moises,

kaya nakapagsalita siya ng mga salitang

hindi na niya napag-isipan.

³⁴Hindi pinatay ng mga taga-Israel

ang mga taga-Canaan

taliwas sa utos ng Panginoon .

³⁵Sa halip, nakisama pa sila sa mga ito

at sumunod sa kanilang mga kaugalian.

³⁶Sinamba rin nila ang kanilang mga diyos-diyosan,

at ito ang nagtulak sa kanila sa kapahamakan.

³⁷Inihandog nila ang kanilang mga anak

sa mga demonyo.

³⁸Pinatay nila ang kanilang mga walang malay na anak;

Inihandog nila ang mga ito

sa mga diyos-diyosan ng Canaan,

sa ganooʼy dinungisan nila ang lupain.

³⁹Dinungisan din nila ang kanilang mga sarili.

Dahil sa kanilang ginawang iyon,

nagtaksil sila sa Diyos;

katulad nilaʼy isang babaeng nakiapid.

⁴⁰Kaya nagalit ang Panginoon

sa kanyang mga mamamayan,

at silaʼy kanyang kinasuklaman.

⁴¹Ipinaubaya niya sila sa mga bansang kanilang kaaway,

at sinakop sila ng mga bansang iyon.

⁴²Inapi sila ng kanilang mga kaaway,

at inalipin sila ng mga ito.

⁴³Maraming beses silang iniligtas ng Diyos,

ngunit sinasadya nilang maghimagsik sa kanya,

kaya ibinagsak sila dahil sa kanilang kasalanan.

⁴⁴Ngunit kapag silaʼy tumatawag sa Diyos,

tinutulungan pa rin niya sila sa kanilang mga paghihirap.

⁴⁵Inaalaala ng Diyos ang kanyang kasunduan sa kanila,

at dahil sa kanyang malaking pag-ibig sa kanila,

napawi ang kanyang galit.

⁴⁶Niloob niya na silaʼy kaawaan

ng mga bumihag sa kanila.

⁴⁷Panginoon naming Diyos iligtas nʼyo kami,

at muling tipunin sa aming lupain

mula sa mga bansa,

upang makapagpasalamat kami

at makapagbigay-puri sa inyong kabanalan.

⁴⁸Purihin ang Panginoon ,

ang Diyos ng Israel, magpakailanman.

At ang lahat ay magsabing,

“Amen!”

Purihin ang Panginoon !