Salmo 132

Salmo 132

¹Panginoon , huwag nʼyong kalilimutan si David

at ang lahat ng paghihirap na kanyang tiniis.

²Alalahanin nʼyo ang pangako niya sa inyo Panginoon ,

kayo na Makapangyarihang Diyos ni Jacob.

Ipinangako niya,

³“Hindi ako uuwi sa aking bahay

ni hihimlay sa aking higaan.

⁴Hindi ko hahayaang dalawin ako ng antok

ni ipikit ang aking mga mata

⁵hanggaʼt hindi ako nakakakita ng lugar

na matitirhan ng Panginoon ,

ang Makapangyarihang Diyos ni Jacob.”

⁶Nang kami ay nasa Efrata nabalitaan namin kung nasaan ang Kaban ng Kasunduan,

at natagpuan namin ito sa kapatagan ng Jaar.

⁷Sinabi namin, “Pumunta tayo sa tahanan ng Panginoon ,

at sumamba tayo sa kanya sa harap ng kanyang trono.”

⁸Panginoon , pumasok po kayo sa inyong tahanan

kasama ang Kahon ng inyong Kasunduan,

na simbolo ng inyong kapangyarihan.

⁹Sanaʼy palaging mamuhay ng matuwid

ang inyong mga pari,

at umawit nang may kagalakan

ang inyong mga tapat na mamamayan.

¹⁰Alang-alang kay David na inyong lingkod,

huwag ninyong itatakwil ang haring inyong hinirang.

¹¹Nangako kayo noon kay David,

at itoʼy tiyak na inyong tutuparin

at hindi babawiin.

Sinabi ninyo, “Isa sa iyong angkan

ang papalit bilang hari.

¹²At kung ang iyong angkan ay tutupad

sa aking kasunduan at susunod

sa mga turo sa kanila,

ang kanilang mga anak ay maghahari rin

magpakailanman.”

¹³Sapagkat pinili ng Panginoon ang Zion

hinangad niya ito na maging tahanan niya.

Sinabi niya,

¹⁴“Ito ang aking tirahan magpakailanman;

dito ako maninirahan dahil ito ang nais ko.

¹⁵Bibiyayaan ko ang Zion

ng lahat niyang pangangailangan,

mga mamamayan niyang dukha

ay aking bubusugin.

¹⁶Ililigtas ko ang kanyang mga pari,

at ang kanyang tapat na mamamayan

ay aawit sa kagalakan.

¹⁷“Paghahariin ko sa Zion ang haring

mula sa angkan ni David,

at gagawin ko siyang parang ilawan

na pumapatnubay sa mga tao.

¹⁸Hihiyain ko ang kanyang mga kaaway,

ngunit pauunlarin ko ang kaharian niya.”