Salmo 140

Salmo 140

¹Panginoon , iligtas nʼyo ako sa mga taong masama at malupit.

²Nagpaplano sila ng masama

at palaging pinag-aaway ang mga tao.

³Ang kanilang mga dila

ay parang mga makamandag na ahas;

at ang kanilang mga salita

ay parang kamandag ng ahas.

⁴Panginoon , ingatan nʼyo ako sa masasama at malulupit

na mga taong nagpaplanong akoʼy ipahamak.

⁵Ang mga hambog ay naglagay

ng mga bitag para sa akin;

naglagay sila ng lambat sa aking dinadaanan upang ako ay hulihin.

⁶Panginoon , kayo ang aking Diyos.

Dinggin nʼyo Panginoon ang pagsamo ko sa inyo.

⁷O Makapangyarihang Panginoon ,

kayo ang aking makapangyarihang Tagapagligtas;

iniingatan nʼyo ako sa panahon ng digmaan.

⁸Panginoon , huwag nʼyong ipagkaloob sa masama

ang kanilang mga hinahangad.

Huwag nʼyong payagang silaʼy magtagumpay sa kanilang mga plano,

baka silaʼy magmalaki.

⁹Mangyari sana ang masasamang plano

ng aking mga kaaway

na nakapaligid sa akin sa sarili nila.

¹⁰Mabagsakan sana sila ng mga nagniningas na baga,

at ihulog sana sila sa hukay nang hindi na sila makabangon pa.

¹¹Madali sanang mawala sa lupa

ang mga taong nagpaparatang ng mali

laban sa kanilang kapwa.

Dumating sana ang salot sa mga taong malupit upang lipulin sila.

¹²Panginoon , alam kong iniingatan nʼyo ang karapatan ng mga dukha,

at binibigyan nʼyo ng katarungan ang mga nangangailangan.

¹³Tiyak na pupurihin kayo ng mga matuwid

at sa piling nʼyo silaʼy mananahan.