Salmo 148

Salmo 148

¹Purihin ang Panginoon !

Purihin ninyo ang Panginoon ,

kayong mga nasa langit.

²Purihin ninyo siya,

kayong lahat ng kanyang anghel na hukbo niya

sa langit.

³Purihin ninyo siya, araw, buwan

at nagniningning na mga bituin.

⁴Purihin ninyo siya, pinakamataas na langit

at tubig sa kalawakan.

⁵Lahat ng nilalang ay magpuri sa Panginoon !

Sa kanyang utos silang lahat ay nalikha.

⁶Inilagay niya sila sa kanilang kinalalagyan,

at mananatili roon magpakailanman,

ayon sa kanyang utos sa kanila.

⁷Purihin ang Panginoon ,

kayong nasa mundo,

malalaking hayop sa karagatan,

at lahat ng nasa kailaliman ng dagat,

⁸mga kidlat at ulan na yelo, niyebe, mga ulap,

at malalakas na hangin na sumusunod

sa kanyang utos,

⁹mga bundok, mga burol,

mga punongkahoy na namumunga o hindi,

¹⁰lahat ng mga hayop, maamo o mailap,

mga hayop na gumagapang at lumilipad.

¹¹Purihin ninyo ang Panginoon ,

kayong mga hari, mga pinuno,

mga tagapamahala,

at lahat ng tao sa mundo,

¹²mga kabataan, matatanda at mga bata.

¹³Lahat ay magpuri sa Panginoon ,

dahil siyaʼy dakila sa lahat,

at ang kanyang kapangyarihan

ay higit pa sa lahat ng nasa langit at lupa.

¹⁴Pinalalakas niya at pinararangalan

ang kanyang mga tapat na mamamayan,

ang Israel na kanyang pinakamamahal.

Purihin ang Panginoon !