Salmo 17

Salmo 17

¹O Panginoon , pakinggan ninyo

ang taimtim kong dalangin.

Dinggin nʼyo po ang hiling kong katarungan.

²Alam nʼyo kung sino ang gumagawa ng matuwid,

kaya sabihin nʼyo na wala akong kasalanan.

³Siniyasat nʼyo ang puso ko,

at kahit sa gabiʼy sinusubukan nʼyo ako,

ngunit wala kayong nakitang

anumang kasalanan sa akin.

Napagpasyahan ko na hindi ako

magsasalita ng masama

⁴gaya ng ginagawa ng iba.

Dahil sa inyong mga salita,

iniiwasan ko ang paggawa

ng masama at kalupitan.

⁵Palagi kong sinusunod ang inyong kagustuhan,

at hindi ako bumabaling sa kaliwa

o sa kanan man.

⁶O Diyos sa inyo akoʼy dumadalangin,

dahil alam kong akoʼy inyong diringgin.

Pakinggan nʼyo po ang aking mga hiling.

⁷Ipakita nʼyo ang inyong pag-ibig

sa pamamagitan ng inyong kahanga-hangang gawa.

Alam ko, sa inyong kapangyarihan,

inyong inililigtas ang mga taong

nanganganlong sa inyo

mula sa kanilang mga kaaway.

⁸Ingatan nʼyo ako katulad ng pag-iingat

ng tao sa kanyang mga mata,

at kalingain nʼyo gaya ng inahing manok

sa kanyang mga sisiw sa ilalim

ng kanyang mga pakpak.

⁹Ipagtanggol nʼyo po ako

sa aking mga kaaway

na nakapaligid sa akin

at nagtatangka sa aking buhay.

¹⁰Silaʼy mga walang awa

at mayayabang magsalita.

¹¹Akoʼy hinanap nila

at ngayoʼy kanilang napapaligiran.

Naghihintay na lamang sila ng pagkakataong itumba ako.

¹²Para silang mga leon

na nakakubliʼt nag-aabang,

at nakahandang sumakmal ng mga biktima.

¹³O Panginoon , mga kaaway koʼy talunin.

Sa pamamagitan ng inyong tabak,

akoʼy inyong iligtas mula

sa mga taong masasama.

¹⁴Iligtas nʼyo ako sa mga makamundong tao

na ang gusto lamang ay ang mga bagay ng sanlibutan.

Kaming mga minamahal ninyo

ay biyayaan ng kasaganaan,

pati ang aming mga anak,

hanggang sa aming kaapu-apuhan.

¹⁵Dahil akoʼy matuwid, makikita ko kayo.

At sapat na sa akin ang makita ka sa aking paggising.