Salmo 25

Salmo 25

¹Panginoon kong Diyos, sa inyo,

akoʼy nananalangin.

²Sa inyo, o Diyos, akoʼy nagtitiwala.

Huwag nʼyo pong hayaan na mapahiya ako

at pagtawanan ng aking mga kaaway

dahil sa aking pagkatalo.

³Ang sinumang nagtitiwala sa inyo

ay hindi malalagay sa kahihiyan,

ngunit mapapahiya ang mga traydor.

⁴Ituro nʼyo sa akin, Panginoon ,

ang tamang pamumuhay,

ang tuwid na daan na dapat kong lakaran.

⁵Turuan nʼyo akong mamuhay ayon sa katotohanan,

dahil kayo ang Diyos na aking tagapagligtas.

Kayo ang lagi kong inaasahan.

⁶Panginoon , alalahanin po ninyo ang inyong dakilang pag-ibig at kabutihan,

na inyong ipinakita mula pa noong una.

⁷Alalahanin ninyo ako Panginoon ,

ayon sa inyong kabutihan at pag-ibig,

huwag ang mga kasalanan at pagsuway ko

mula pa noong aking pagkabata.

⁸Mabuti at matuwid po kayo, Panginoon ,

kaya tinuturuan nʼyo ng inyong pamamaraan

ang mga makasalanan.

⁹Pinapatnubayan nʼyo ang mga mapagpakumbaba upang gumawa ng tama.

Silaʼy tinuturuan nʼyo ng inyong pamamaraan.

¹⁰Lahat ng ginagawa nʼyo

ay nagpapakita ng inyong pag-ibig

at katapatan sa mga sumusunod

sa inyong mga kautusan.

¹¹Panginoon , alang-alang sa inyong pangalan,

patawarin nʼyo ako sa napakarami kong kasalanan.

¹²Ang sinumang may takot sa inyo, Panginoon ,

ay turuan nʼyo po ng daan na dapat niyang lakaran.

¹³Mabubuhay sila nang masagana,

at ang kanilang lahi ay patuloy na maninirahan

sa lupaing ipinangako ng Diyos.

¹⁴Malapít ang Panginoon sa mga taong

may takot sa kanya,

at itinuturo niya sa kanila ang kanyang kasunduan.

¹⁵Palagi akong umaasa sa inyo, Panginoon ,

dahil kayo ang palaging nagliligtas sa akin

sa kapahamakan.

¹⁶Lingunin nʼyo po ako at inyong kahabagan,

dahil akoʼy nag-iisa at naghihirap.

¹⁷Lalong lumalala ang bigat sa aking kalooban.

Hanguin nʼyo po ako sa aking mga kalungkutan.

¹⁸Tingnan nʼyo ang dinaranas kong mga kahirapan,

at patawarin nʼyo ang lahat kong kasalanan.

¹⁹Tingnan nʼyo kung gaano karami

ang aking mga kaaway

at kung gaano katindi

ang galit nila sa akin.

²⁰Iligtas nʼyo ako,

at ingatan ang aking buhay!

Nanganganlong ako sa inyo;

huwag nʼyong hayaan na mapahiya ako.

²¹Iligtas nawa ako ng pamumuhay ko nang matuwid

at walang kapintasan,

sapagkat sa inyo ako umaasa.

²²O Diyos, palayain nʼyo po ang Israel sa lahat ng hirap

na kanilang pinapasan.