Salmo 56

Salmo 56

¹O Diyos, maawa kayo sa akin

sapagkat sinasalakay ako ng aking mga kaaway.

Palagi nila akong pinahihirapan.

²Kinukutya nila ako at laging sinasalakay.

Sa kanilang pagmamataas,

akoʼy kanilang kinakalaban.

³Kapag akoʼy natatakot, sa inyo ako magtitiwala.

⁴O Diyos, pinupuri ko kayo dahil sa inyong pangako.

Hindi ako matatakot dahil nagtitiwala ako sa inyo.

Ano baʼng magagawa ng isang hamak na tao sa akin? Wala!

⁵Binabaluktot lagi ng aking mga kaaway

ang mga sinasabi ko.

Lagi silang nagpaplano na saktan ako.

⁶Nagsasama-sama sila at nagsisipagtago,

binabantayan nila ang lahat ng kilos ko

at naghihintay ng pagkakataon

upang patayin ako.

⁷Huwag nʼyo silang hayaang matakasan

ang parusa ng kanilang kasamaan.

Ibagsak ninyo ang mga bansa

sa inyong matinding galit, O Diyos.

⁸Nalalaman nʼyo ang aking kalungkutan

at napapansin nʼyo ang aking

mga pag-iyak.

Hindi baʼt inilista nʼyo ito sa inyong aklat?

⁹Kapag tumawag ako sa inyo, O Diyos,

magsisitakas ang aking mga kaaway.

Alam ko ito dahil ikaw

ay aking kakampi.

¹⁰Panginoong Diyos, pinupuri ko kayo

dahil sa inyong mga salita at pangako.

¹¹Hindi ako matatakot dahil nagtitiwala ako sa inyo.

Ano baʼng magagawa ng isang

hamak na tao sa akin? Wala!

¹²Tutuparin ko, O Diyos,

ang mga pangako ko sa inyo.

Maghahandog ako ng alay

bilang pasasalamat sa inyo.

¹³Dahil iniligtas nʼyo ako sa kamatayan

at hindi nʼyo ako pinabayaang madapa.

Para mamuhay akong kasama kayo, O Diyos,

sa inyong liwanag na nagbibigay-buhay.