Salmo 72

Salmo 72

¹O Diyos, ituro nʼyo po sa hari

ang iyong pamamaraan sa paghatol

at katuwiran,

²upang makatarungan siyang makapaghatol

sa inyong mga mamamayan,

pati na sa mga dukha.

³Sumagana sana ang mga kabundukan

upang mapagpala ang inyong mga mamamayan

dahil matuwid ang hari.

⁴Tulungan nʼyo siyang maipagtanggol

ang mga dukha

at durugin ang mga umaapi sa kanila.

⁵Nawaʼy katakutan ka nila, magpakailanman,[#72:5 Sa ibang manuskrito, Manatili sana sila.]

hanggang ang araw ay sumisikat,

hanggang ang buwan ay naroon sa kalangitan.

⁶Ang hari sanaʼy maging tulad ng ulan

na bumubuhos sa parang,

ulan na dumidilig sa kalupaan.

⁷Umunlad sana ang buhay ng mga matuwid

sa panahon ng kanyang pamumuno,

at maging maayos ang kalagayan ng tao

hanggang sa wakas ng panahon.

⁸Lumawak sana nang lumawak

ang kanyang kaharian,

mula sa ilog ng Eufrates

hanggang sa pinakadulo ng mundo.

⁹Magpasakop sana sa kanya

ang mga kaaway niyang nakatira sa ilang.

¹⁰Magbigay sana ng buwis sa kanya

ang mga hari ng Tarsis,

at mga kaloob ang mga hari

ng Sheba at Seba.

¹¹Magpasakop sana sa kanya

ang lahat ng hari

at ang lahat ng bansa ay maglingkod sa kanya.

¹²Inililigtas niya ang mga dukha

na humihingi ng tulong,

gayundin ang mga mahihirap

na walang tumutulong.

¹³Kahahabagan niya ang mga dukha

at nangangailangan

at silaʼy kanyang tutulungan.

¹⁴Ililigtas niya sila sa mga malulupit

at mapang-api

dahil para sa kanya,

ang buhay nilaʼy mahalaga.

¹⁵Mabuhay sana ang hari nang matagal.

Sanaʼy mabigyan siya ng ginto

mula sa Sheba.

Sanaʼy idalangin palagi ng mga tao

na pagpalain siya ng Diyos.

¹⁶Sumagana sana ang ani sa lupain

maging sa tuktok ng bundok,

katulad ng mga ani sa Lebanon.

Dumami rin sana ang mga tao

sa mga lungsod,

kasindami ng damo sa mga parang.

¹⁷Huwag sanang malimutan

ang pangalan ng hari

magpakailanman,

habang sumisikat pa ang araw.

Sa pamamagitan sana niya

ay pagpalain ng Diyos ang lahat ng bansa,

at sabihin sana ng mga ito

na siyaʼy pinagpala ng Diyos.

¹⁸Purihin ang Panginoong Diyos,

ang Diyos ng Israel,

na siyang tanging nakagagawa

ng mga bagay

na kamangha-mangha.

¹⁹Purihin ang kanyang dakilang pangalan

magpakailanman!

Mahayag sana sa buong mundo

ang kanyang kaluwalhatian.

²⁰Dito nagwawakas ang mga panalangin ni David

na anak ni Jesse.