Salmo 8

Salmo 8

¹O Panginoon , aming Panginoon,

ang kadakilaan ng inyong pangalan

sa buong mundo ay matutunghayan,

at ipinakita nʼyo ang inyong kaluwalhatian

hanggang sa kalangitan.

²Kahit ang mga bata at sanggol

sa inyoʼy nagpupuri;

Kaya ang inyong mga kaaway

ay napapahiya at tumatahimik.

³Kapag akoʼy tumitingala

sa langit na inyong nilikha,

at aking pinagmamasdan ang buwan

at mga bituin sa kanilang kinalalagyan,

⁴akoʼy napapatanong,

“Ano ba ang tao upang inyong alalahanin?

Sino nga ba siya upang inyong kalingain?”

⁵Ginawa ninyong mas mababa

kaysa sa mga anghel

ang kanyang kalagayan.

Ngunit kinoronahan nʼyo siya

ng kaluwalhatian at karangalan.

⁶Ipinamahala nʼyo sa amin

ang inyong mga nilalang,

at ipinasailalim sa amin

ang lahat ng bagay:

⁷mga tupa, mga baka

at lahat ng mga mababangis na hayop,

⁸ang mga ibon sa himpapawid,

mga isda sa dagat

at lahat ng lumalangoy doon.

⁹O Panginoon , aming Panginoon,

ang kadakilaan ng inyong pangalan

sa buong mundo ay natutunghayan.