Salmo 88

Salmo 88

¹Panginoon , kayo ang Diyos

na aking Tagapagligtas.

Araw-gabi akong tumatawag sa inyo.

²Dinggin ninyo ang aking dalangin

panawagan ko nawaʼy sagutin.

³Napakaraming paghihirap

ang dumarating sa akin;

para bang ang kamatayaʼy unti-unting

lumalapit sa akin.

⁴Akoʼy kabilang na sa mga ibinaon sa lupa;

katulad koʼy taong hindi na

matutulungan pa.

⁵Pinabayaan na ako,

kasama ng mga patay,

parang isang nasawing nananahimik na lang

sa kanyang libingan,

na kinalimutan nʼyo na

at hindi tinutulungan.

⁶Parang inilagay nʼyo ako

sa napakalalim at napakadilim na hukay.

⁷Ang inyong poot ay sa akin ibinunton,

parang mga alon na humahampas sa akin.

⁸Inilayo nʼyo sa akin ang aking

mga kaibigan

at ginawa nʼyo akong kasuklam-suklam

sa kanilang harapan.

Para akong nakakulong

at hindi na makatakas pa.

⁹Dumidilim na ang paningin ko

dahil sa kalungkutan.

Panginoon , araw-araw akong tumatawag sa inyo

nang nakataas ang aking mga kamay.

¹⁰Gumagawa ba kayo ng himala sa mga patay?

Bumabangon ba sila para kayoʼy papurihan?

¹¹Ang katapatan nʼyo ba at pag-ibig

ay pinag-uusapan sa libingan?

¹²Makikita ba ang inyong mga himala

at katuwiran sa madilim na lugar

ng mga patay?

Doon sa lugar na iyon na

ang lahat ay kinakalimutan.

¹³Kaya Panginoon , humihingi ako

ng tulong sa inyo.

Tuwing umaga, akoʼy nananalangin sa inyo.

¹⁴Ngunit bakit nʼyo ako itinatakwil Panginoon ?

Bakit nʼyo ako pinagtataguan?

¹⁵Mula pa sa pagkabataʼy

hirap na ang dinanas,

at nalagay pa sa bingit ng kamatayan.

Tiniis ko ang mga nakakatakot

na ginawa nʼyo sa akin.

¹⁶Ang inyong galit ay humampas sa akin

na parang malakas na hangin.

Halos mamatay ako sa mga nakakatakot

na ipinaranas nʼyo sa akin.

¹⁷Dumating ang mga ito

na parang bahang lumamon sa akin.

¹⁸Inilayo nʼyo sa akin

ang mga mahal ko sa buhay

at mga kaibigan;

wala akong naging kasama

kundi kadiliman.