Isaias 40

Mga Salita ng Pag-asa

¹“Aliwin ninyo ang aking bayan,” sabi ng Diyos.

“Aliwin ninyo sila!

²Inyong ibalita sa mga taga-Jerusalem,

tapos na ang kanilang pagdurusa

sapagkat nabayaran na nila ng lubos

ang kasalanang ginawa nila sa akin.”

³Ganito ang isinisigaw ng isang tinig:[#Ecc. 48:10; Bar. 5:7; Mt. 3:3; Mc. 1:3; Jn. 1:23.; #Lu. 3:4-6.]

“Ihanda ninyo ang daraanan ni Yahweh sa ilang;

gumawa kayo ng mga tuwid na landas na kanyang lalakaran sa ilang.

⁴Tambakan ang mga libis,

patagin ang mga burol at bundok,

at pantayin ang mga baku-bakong daan.

⁵Mahahayag ang kaluwalhatian ni Yahweh,

at makikita ito ng lahat ng tao.

Si Yahweh mismo ang nagsabi nito.”

⁶“Magpahayag ka!” ang sabi ng tinig.[#San. 1:10-11; 1 Ped. 1:24-25.]

“Ano ang ipahahayag ko?” tanong ko.

Sumagot siya, “Ipahayag mong ang lahat ng tao ay tulad ng damo,

ang kanyang buhay ay tulad lamang ng bulaklak sa parang.

⁷Natutuyo ang damo, kumukupas ang mga bulaklak,

kapag sila'y mahipan ng hanging mula kay Yahweh.

Tunay ngang ang tao ay tulad ng damo.

⁸Oo, ang damo'y nalalanta, at kumukupas ang mga bulaklak,

ngunit ang salita ng ating Diyos ay mananatili magpakailanman.”

Ang Diyos ay Narito Na

⁹Umakyat ka sa tuktok ng bundok, O Zion,

magandang balita ay iyong ipahayag, O Jerusalem!

Sumigaw ka at huwag matatakot,

sabihin mo sa mga lunsod ng Juda,

“Narito na ang inyong Diyos!”

¹⁰Dumarating ang Panginoong Yahweh na taglay ang kapangyarihan,[#Isa. 62:11; Pah. 22:12.]

dala ang gantimpala sa mga hinirang.

¹¹At tulad ng pastol, pinapakain niya ang kanyang kawan;[#Eze. 34:15; Jn. 10:11.]

sa kanyang mga bisig, ang maliliit na tupa'y kanyang yayakapin.

Sa kanyang kandungan ay pagyayamanin,

at papatnubayan ang mga tupang may supling.

Walang Katulad ang Diyos

¹²Sino ang makakasukat ng tubig sa dagat sa pamamagitan ng kanyang kamay?

Sino ang makakasukat sa lawak ng kalangitan?

Sinong makakapaglagay ng lahat ng lupa sa isang sisidlan?

Sino kaya ang makakapagtimbang sa mga bundok at burol?

¹³Sino ang makakapagsabi ng dapat gawin ni Yahweh?[#Ro. 11:34; 1 Cor. 2:16.]

May makakapagturo ba o makakapagpayo sa kanya?

¹⁴Sino ang kanyang puwedeng sanggunian para maliwanagan?

Sinong nagturo sa kanya ng landas ng katarungan?

Sinong nagkaloob sa kanya ng kaalaman at ng paraan upang makaunawa?

¹⁵Sa harap ni Yahweh ang mga bansa ay walang kabuluhan,[#Kar. 11:22; Ecc. 10:16-17.]

tulad lang ng isang patak ng tubig sa isang sisidlan;

at ang mga pulo ay parang alikabok lamang ang timbang.

¹⁶Hindi sapat na panggatong ang lahat ng kahoy sa Lebanon.

Kulang pang panghandog ang lahat ng hayop sa gubat roon.

¹⁷Sa kanyang harapan, ay walang halaga ang lahat ng bansa.

¹⁸Saan ninyo ihahambing ang Diyos[#Gw. 17:29.]

at kanino ninyo siya itutulad?

¹⁹Siya ba'y maihahambing sa mga imaheng ginawa ng tao,

na binalutan ng ginto,

at ipinatong sa pilak?

²⁰Hindi rin siya maitutulad sa rebultong kahoy[#Kar. 13:11-19; Bar. 6:8-40.]

matigas man ang kahoy at hindi nabubulok,

na nililok upang hindi tumumba

at mabibili lang sa murang halaga.

²¹Hindi ba ninyo nalalaman?

Wala bang nagbalita sa inyo noon,

kung paano nagsimulang likhain ang sanlibutan?

²²Ang lumikha nito ay ang Diyos na nakaupo sa kanyang trono doon sa kalangitan;

mula roon ang tingin sa tao'y parang mga langgam.

Ang langit ay iniladlad niyang tulad ng kurtina,

tulad ng tolda upang matirahan.

²³Inaalis niya ang mga pinuno sa kapangyarihan,

at ginagawang walang kabuluhan.

²⁴Tulad nila'y mga halamang walang ugat,

bagong tanim at natutuyo agad;

at tila dayaming tinatangay ng hangin.

²⁵Kanino ninyo ihahambing ang banal na Diyos?

Mayroon ba siyang katulad?

²⁶Tumingala kayo sa langit![#Bar. 3:34-35.]

Sino ba ang lumikha ng mga bituin?

Sino ba ang sa kanila'y nagpapakilos,

at sino ba ang nagbigay ng kanilang pangalan?

Dahil sa kanyang dakilang kapangyarihan,

walang nawala sa kanila kahit isa man.

Si Yahweh ang Nagbibigay ng Kalakasan

²⁷Israel, bakit ka ba nagrereklamo

na tila hindi pansin ni Yahweh ang kabalisahan mo,

o hindi inalalayan sa kaapihang naranasan?

²⁸Hindi ba ninyo nalalaman, di ba ninyo naririnig?

Na itong si Yahweh, ang walang hanggang Diyos,

ang siyang lumikha ng buong daigdig?

Hindi siya napapagod;

sa isipan niya'y walang makakaunawa.

²⁹Ang mahihina't mga napapagod ay kanyang pinapalakas.

³⁰Kahit na ang mga kabataan ay napapagod

at nanlulupaypay.

³¹Ngunit muling lumalakas

at sumisigla ang nagtitiwala kay Yahweh.

Lilipad silang tulad ng mga agila.

Sila'y tatakbo ngunit hindi mapapagod,

sila'y lalakad ngunit hindi manghihina.